នាវាដឹកប្រេង​អ៊ីរ៉ង់​យ៉ាងតិច​៥គ្រឿង កាលពីមុននេះ ​បាន​ធ្វើនាវាចរ​ណ៍ តាមសមុទ្រមេឌីទែរ៉ាណេ ឆ្ពោះទៅកាន់​សមុទ្រអាត្លង់ទិក ហើយដែលគេជឿជាក់ថា ឆ្ពោះទៅកាន់​ប្រទេសវេណេហ្ស៊ុយអេឡា។ ប្រព័ន្ធផ្សព្វផ្សាយ​បានបញ្ជាក់ថា រដ្ឋាភិបាលទីក្រុងតេអ៊ីរ៉ង់​ អាច​នឹងជួយរដ្ឋាភិបាលទីក្រុងការ៉ាកាស ទទួលបានអត្ថប្រយោជន៍​​ច្រើន​ នៅអំឡុងពេលមាន​វិបត្តិប្រេង​ នៅក្នុងស្រុក ដោយសារផ្នែកណាមួយរងការដាក់ទណ្ឌកម្មពីអាមេរិក។​

រដ្ឋាភិបាលអ៊ីរ៉ង់​ បាន​កោះហៅ​ឯកអគ្គរដ្ឋទូតស៊ី្វស ​ប្រចាំនៅប្រទេសនេះ ដែលជាអ្នកតំណាង​ឲ្យអត្ថប្រយោជន៍ នៃទីក្រុងវ៉ាស៊ីនតោន ទៅប្រឆាំងតវ៉ា​ចំពោះ​គម្រោងការដែលថា កម្លាំងជើងទឹក​អាមេរិក​មាន​ផែនការស្ទាក់ចាប់​នាវាដឹកប្រេងរបស់ខ្លួន​ ខណៈកំពុងនៅលើផ្លូវឆ្ពោះទៅកាន់​ប្រទេស​វេណេហ្ស៊ុយអេឡា ។ ស្ថានភាពស្រដៀងគ្នានេះដែរ ត្រូវបានផ្សព្វផ្សាយ ​ដោយប្រភពព័ត៌មាន​រ៉យទ័រ ប៉ុន្តែគេមិនបាន​ទទួលការបញ្ជាក់ផ្លូវការណាមួយទាំងពី​សេតវិមាន និង​មន្ទីរបញ្ចកោណនោះឡើយ។

លោក ​Seyed Abbas Araghchi អនុរដ្ឋមន្ត្រីក្រសួង​ការបរទេស​ នៅក្នុងអំឡុងកោះហៅ​ឯកអគ្គរដ្ឋទូត​ស៊ី្វស​នោះ បានបញ្ជាក់ថា ទំនាក់ទំនងពាណិជ្ជកម្ មរវាងវេណេហ្ស៊ុយអេឡា និងអ៊ីរ៉ង់​គឺស្របទៅតាមច្បាប់​ទម្លាប់សុទ្ធសាធ។ លោកបញ្ជាក់ថា ការប៉ុនប៉ុន​របស់អាមេរិក ​ដើម្បីសម្លុតគំរាមកំហែង​​លើការធ្វើពាណិជ្ជកម្មអន្តរជាតិ។ នេះ​ គឺ​ជា​ការរំលោភបំពាន​ដល់​សិទ្ធិមនុស្សជាមូលដ្ឋាន និងជាទង្វើ​ នៃចោរសមុទ្រ​។

លោក Javad Zarif រដ្ឋមន្ត្រីការបរទេស​អ៊ីរ៉ង់ ​បានព្រមាន​ប្រឆាំងអាមេរិក​ ក្នុងករណីដែល​ស្ទាក់ចាប់នាវាអ៊ីរ៉ង់ នៅក្នុងលិខិតមួយ​ផ្ញើទៅកាន់អគ្គលេខាធិការអង្គការសហប្រជាជាតិ Antonio Guterres ។ លោក បានហៅផែនការ​ស្ទាក់ចាប់​នាវាអ៊ីរ៉ង់​នោះ ជាទង្វើខុសច្បាប់, ការបង្កគ្រោះថ្នាក់ និងជាទង្វើ​បង្ករឿងហេតុ ដូចទៅនឹងសកម្ម​ភាព​របស់ចោរសមុទ្រ ។ 

សេចក្តីថ្លែងការ​របស់​ក្រសួងការបរទេស​អ៊ីរ៉ង់បញ្ជាក់ថា «Zarif បានរំលឹកថា រដ្ឋាភិបាលអាមេរិក​នឹងទទួលខុសត្រូវ​ ចំពោះ​សកម្មភាពខុសច្បាប់ណាមួយ, អ៊ីរ៉ង់​បានបញ្ជាក់អំពីសិទ្ធិចាំបាច់របស់ខ្លួន ​នៅក្នុងការការពារ​ប្រឆាំងចំពោះ​ការគំរាមកំហែង​របស់អាមេរិក» ។

នាវាដឹកប្រេងអ៊ីរ៉ង់​ទៅកាន់វេណេហ្ស៊ុយអេឡា​ ដែលតាមប្រភពព័ត៌មានថា មាន​ចំនួន​៥គ្រឿង គឺនាវា Fortune, Petunia, Forest, Faxon និងនាវា Clavel ឆ្លងកាត់​សមុទ្រមេឌីទែរ៉ាណេ​ចូលទៅកាន់ផ្ទៃសមុទ្រ​អាត្លង់ទិក​ ​កាលពីថ្ងៃទី១៥ ខែឧសភា ឆ្នាំ២០២០ ។ ប្រភពព័ត៌មាន Al-Masdar News ផ្សាយថា នាវាទាំងនោះ​ធ្វើនាវាចរណ៍ទៅកាន់​វេណេហ្ស៊ុយអេឡា ហើយមិនបានលម្អិតព័ត៌មានជាងនេះទៀតនោះឡើយ ។ ក្រុមតាមដាន​ការធ្វើនាវាចរ​ណ៍នៅលើដែនសមុទ្រ​បញ្ជាក់ថា ឃើញនាវា​ទាំងនោះឆ្ពោះទៅកាន់​ដែនទឹក​ប្រទេស​អាមេរិក-ឡាទីន ៕ ប្រែសម្រួលដោយ៖ thach yat

from： https://tnaot.com/km/m/detail/article/9225420