Sign In 
លោកនាយឧត្តមសេនីយហ៊ឹម យ៉ាន អគ្គស្នងការរងនគរបាលជាតិ បានចាត់ទុកថា ការវាយខ្នោះទៅលើជនល្មើសច្បាប់ ដែលបង្កអំពើហិង្សា ឬបង្កើតឧបសគ្គរាំងស្ទះ ដល់ប្រតិបត្តិការរឹតបណ្តឹងច្បាប់ចរាចរណ៍ផ្លូវគោក នៅតាមគោលដៅ គឺជារឿងត្រឹមត្រូវ។
ជុំវិញករណី ដើម្បីទប់ស្កាត់មិនឱ្យកើតមានភាពអសកម្ម ដែលបង្កឡើងដោយសមត្ថកិច្ច លោកនាយឧត្តមសេនីយ ក៏បានចាត់វិធានការយ៉ាងម៉ឺងម៉ាត់ ចំពោះមន្ត្រីរបស់ខ្លួន ដោយហាមមិនឱ្យអនុវត្ត លើសពីគោលការនៃបទបញ្ជា។
លោកនាយឧត្តមសេនីយបានឱ្យដឹងថា សមត្ថកិច្ចក៏មានសិទ្ធវាយខ្នោះ ទៅលើជនល្មើសណា ដែលមានការតបតនិងប្រើអំពើហិង្សា ឬក៏ប្រព្រឹត្តអំពើណាមួយដែលបង្កឧបសគ្គ ដល់កងកម្លាំងសមត្ថកិច្ចនៅក្នុងការធ្វើការបំពេញប្រតិបត្តិការណ៍។
លោកបញ្ជាក់ថា៖«បើសិនជាក្នុងការណីគ្រាន់តែជាការទាមទារសំណូមពររបស់ប្រជាពលរដ្ឋ យើង[សមត្ថកិច្ច]ក៏មិនអាចប្រើវិធីនេះបានទេ ហើយកន្លងទៅនេះយើងក៏បានដាក់ពិន័យចំពោះ មន្ត្រីរបស់យើងណាដែលប្រព្រឹត្តអំពើខុសឆ្គងនេះដែរ»។
យោងតាមលទ្ធផលនៃការរឹតបន្ដឹងច្បាប់ចរាចរណ៍ផ្លូវគោកនៅទូទាំងប្រទេស គិតត្រឹមរយៈពេល១១ថ្ងៃ ចាប់ពីថ្ងៃទី០១ ខែឧសភា គឺបានត្រួតពិនិត្យរកឃើញករណីល្មើសមានដល់ ១៩,០០៤ករណី ក្នុងនោះ ករណីល្មើសដោយម៉ូតូមានចំនួន ១៤,២៧១ករណី ចំពោះករណីល្មើស លើរថយន្ដ ឬយានយន្ដគ្រប់ប្រភេទមានចំនួន ៤,៧៣៣ករណី៕ ដោយ៖ ឃួន លក្ខិណា
