លោក Mike Pompeo រដ្ឋមន្ត្រីក្រសួងការបរទេស​អាមេរិក​ ថ្ងៃទី១៣ ខែឧសភា ឆ្នាំ២០២០ បានទៅបំពេញទស្សនកិច្ច​ នៅអ៊ីស្រាអែល។ ដំណើរ​ទស្សនកិច្ចនេះ គឺដើម្បីពិគ្រោះយោបល់​សន្តិសុខ​ក្នុងតំបន់ ក៏ដូចជា គម្រោងការដាក់បញ្ចូល​តំបន់ជ្រោយ West Bank ឲ្យស្ថិតក្រោម​ការគ្រប់គ្រងរបស់អ៊ីស្រាអែល។

បណ្ដាញព័ត៌មានរបស់អ៊ីស្រាអែល​ បានផ្សាយថា រដ្ឋមន្ត្រីការបរទេស Pompeo បានជួបជាមួយនាយករដ្ឋមន្ត្រី បែនចាមីន ណេតាន់យ៉ាហ៊ូ និងអនាគតរដ្ឋមន្ត្រីការពារជាតិអ៊ីស្រាអែល Benny Gantz។ ដំណើរទស្សនកិច្ចនេះ គឺនៅមុនមួយថ្ងៃ នៃរដ្ឋាភិបាលចម្រុះមួយ​បានព្រមព្រៀង​​ ហើយនាយករដ្ឋមន្ត្រី​២រូប​ស្បថ ចូលកាន់តំណែង ។ 

ការពិភាក្សា​ ប្រហែល​មានរួមបញ្ចូល​ផងដែរ ចំពោះសត្រូវរបស់អ៊ីស្រាអែល គឺអ៊ីរ៉ង់​ដែលកំពុងឈរជើង​ នៅលើទឹកដីស៊ីរី ហើយករណីនេះ​នាំឲ្យអ៊ីស្រាអែល វាយប្រហារ​តាមអាកាស​ ប្រឆាំងទៅលើគោលដៅនានារបស់អ៊ីរ៉ង់​ កាលពី​អំឡុងសប្តាហ៍ថ្មីៗកន្លងមកនេះ។ ក្រៅពីនេះ កិច្ចពិភាក្សា​ស្តីអំពីទំនាក់ទំនងពាណិជ្ជកម្ម ​រវាងរដ្ឋ Jewish និងប្រទេសចិន ក៏ប្រហែល​ជាត្រូវលើកឡើងផងដែរ។ 

លោក Pompeo បានពាក់ម៉ាសពណ៌ក្រហម, ស និងខៀ ការពារវីរុស នៅពេលឈានជើង​ដល់អាកាសយានដ្ឋាន Ben-Gurion ជិត​ទីក្រុង Tel Aviv ។ នេះជាលើកដំបូង ក្នុងរយៈពេលជិត២ខែ​ ដែលលោក Pompeo ទៅបំពេញទស្សនកិច្ច​ក្រៅប្រទេស ក្រោយការឆ្លងរាតត្បាត​ពីវីរុសកូវីដ​១៩។ 

គួររំឭកថា​ កាលពីខែមករា ឆ្នាំ២០២០ គម្រោងការដ៏ចម្រូងចម្រាសរបស់ទីក្រុងវ៉ាស៊ីនតោន ​បានផ្តល់ភ្លើងខៀវ​ដល់អ៊ីស្រាអែល​ នៅក្នុង​ការដាក់បញ្ចូល​ក្រោមការគ្រប់គ្រង នៅមូលដ្ឋាន​របស់ជនជាតិ Jewish និង​ដែនដីយុទ្ធសាស្ត្រផ្សេងទៀត​ ដូចជា West Bank ផងដែរ។ ករណីនេះបង្កឲ្យមានការប្រឆាំងតវ៉ាយ៉ាង​ខ្លាំងពីភាគី​ប៉ាឡេស្ទីន ហើយប្រកាសកាត់ផ្ដាច់ទំនាក់ទំនងជាមួយរដ្ឋបាលអាមេរិក​។

អ៊ីស្រាអែល​ដណ្តើមគ្រប់គ្រង​តំបន់ជ្រោយ West Bank បាន ចាប់តាំងពី​ឆ្នាំ​១៩៦៧ គឺក្រោយសង្គ្រាម រយៈពេល​៦ថ្ងៃនោះមក៕ ប្រែ​សម្រួល​ដោយ៖ thach yat

from： https://tnaot.com/km/m/detail/article/9213160