Sign In 
ភ្នំពេញ៖ នាយកឧត្ដមសេនីយ៍ ហ៊ឹម យ៉ាន អគ្គស្នងការរងនគរបាលជាតិ បានអះអាងថា មុននឹងសមត្ថកិច្ចរឹតបន្ដឹងការអនុវត្ដច្បាប់ចរាចរណ៍ថ្មីនេះ គឺយើងបានទុកពេលវេលារយៈពេល៤ខែ ដើម្បីឱ្យប្រជាពលរដ្ឋ រៀបចំខ្លួន និងត្រៀមលក្ខណៈសម្បត្ដិឱ្យបានរួចរាល់។
ក្នុងសន្និសីទសារព័ត៌មានស្ដីពី ការរឹតបន្ដឹងច្បាប់ចរាចរណ៍ផ្លូវគោកទូទាំងប្រទេស នៅទីស្ដីការក្រសួងសាធារណការ និងដឹកជញ្ជូន កាលពីម្សិលមិញ លោកអគ្គស្នងការរងនគរបាលជាតិ បានសម្ដែងនូវការសោកស្ដាយចំពោះប្រជាពលរដ្ឋមួយចំនួន ដែលមានការធ្វេសប្រហែសខណៈពេល ដែលសមត្ថកិច្ចចាប់ផ្ដើមរឹតបន្ដឹងច្បាប់ចរាចរណ៍ ទើបទៅធ្វើប័ណ្ណបើកបរ ការធ្វើឆៀក ឬត្រួតពិនិត្យលក្ខណៈបច្ចេកទេស ឬធ្វើឯកសារផ្សេងៗ ដោយទុករង់ចាំដល់ហួសពេល និងផុតសុពលភាព។
នាយកឧត្ដមសេនីយ៍ ហ៊ឹម យ៉ាន អះអាងថា ការរឹតបន្ដឹងច្បាប់ចរាចរណ៍នេះ គឺនៅតែបន្ដធ្វើជារៀងរហូត ដែល រាជរដ្ឋាភិបាលក៏ដូចជាគណៈកម្មាធិការជាតិសុវត្ថិភាពចរាចរណ៍ផ្លូវគោក បានកំណត់ថា ក្នុងឆ្នាំ២០២០នេះ គឺជាឆ្នាំដែលត្រូវរឹតបន្ដច្បាប់ចរាចរណ៍ផ្លូវគោក និងបានប្រកាសផ្សព្វផ្សាយចាប់តាំង ពីដើមឆ្នាំ២០២០មក ដើម្បីឱ្យប្រជាពលរដ្ឋបានជ្រាប និងត្រៀមខ្លួនជាមុន ដើម្បីបំពេញកាតព្វកិច្ចតាមច្បាប់កំណត់។
លោកនាយឧត្ដមសេនីយ៍ បានកត់សម្គាល់ឃើញថា ក្នុងរយៈពេល នៃការរឹតបន្ដឹងរបស់សមត្ថកិច្ចនេះ គ្រោះថ្នាក់ចរាចរណ៍ មានការថយចុះ បើប្រៀបធៀបតែ ក្នុង១សប្ដាហ៍ក្នុងខែឧសភា ឆ្នាំ២០២០ និង១សប្ដាហ៍ដូចគ្នាក្នុងខែឧសភា ឆ្នាំ២០១៩ ឃើញថា បានកាត់បន្ថយគ្រោះថ្នាក់បានចំនួន៥៤ភាគរយ គឺស្មើនឹង៥២លើក អ្នកស្លាប់ ថយដល់១៦នាក់ ស្មើនឹង៤០ភាគរយ និងអ្នករងរបួសថយដល់៥៩នាក់ ស្មើនឹង៥១ ភាគរយ៕ ដោយ៖ ប៊ុនធឿន
