ថ្ងៃនេះ Anarchak សូមបង្វែរអារម្មណ៍ប្រិយមិត្តមកតាមដានទីក្រុងអ្នកមានដ៏ល្បីមួយរបស់ពិភពលោក។ នោះគឺទីក្រុង ឌុយបៃ (Dubai) ដ៏ល្បីល្បាញ។

នរណាក៏ដឹងដែរថា ឌុយបៃជាទីក្រុងអ្នកមាន តាមរយៈពត៌មាននិងរូបភាពជាច្រើនហូរហែកន្លងមក។ តែប្រិយមិត្តដឹងទេថា ហេតុអ្វីទីក្រុងមួយនេះសម្បូរទ្រព្យសម្បត្តិច្រើនម្ល៉េះ? 

ឌុយបៃជាទីក្រុងដ៏សំខាន់មួយនៅប្រទេស United Arab Emirates ដែលជាប្រទេសនាំចេញប្រេងឆៅដ៏ធំមួយក្នុងលោក ដោយក្នុងនោះប្រទេសនេះក្ដោបក្ដាប់ការផ្គត់ផ្គង់ប្រេងឆៅលើពិភពលោកដល់ទៅជិត 10 %។

ដោយសារតែហេតុនេះ មនុស្សជាច្រើនយល់ថាទីក្រុងឌុយបៃមានអគារខ្ពស់ស្កឹមស្កៃ មានការរស់នៅស៊ីវីល័យរហូតត្រូវបានគេប្រសិទ្ធិនាមថាជាទីក្រុងអ្នកមាន ដោយសារតែប្រាក់ចំណូលបានពីការនាំចេញប្រេងនេះឯង។

តែតាមពិតទៅវាមិនដូច្នោះទាំងស្រុងឡើយ។ ប្រាក់ចំណូលបានពីប្រេងរបស់ឌុយបៃសរុបស្មើតែប្រមាណ 7% ប៉ុណ្ណោះនៃប្រាក់ចំណូលសរុបរបស់ឌុយបៃ។ ប្រាក់ចំណូលប្រមាណ 90% ទៀតបានមកពីការវិនិយោគធំៗក្នុងឧស្សាហកម្ម និងអចលនទ្រព្យ ដូចជាអគារខ្ពស់ស្កឹមស្កៃ អាកាសចរណ៍ កំពង់ផែ និងទេសចរណ៍ ដោយជាសរុបអាចទាញយកចំណូលចូលទីក្រុងនេះដល់ទៅ 100 ពាន់លានដុល្លារអាមេរិក។

ចំណែកមូលហេតុដែលនាំឱ្យមានការងាកទៅវិស័យវិនិយោគដ៏ជោគជ័យនេះអាចជាឥទ្ធិពលពីលោកខាងលិចដែលត្រូវបានអ្នកដឹកនាំរបស់ឌុយបៃជឿជាក់និងអនុវត្តតាម។ កាលណោះនៅអំឡុងឆ្នាំ 1980 អ្នកដឹកនាំឌុយបៃប្រមើលឃើញរួចជាស្រេចថា ពួកគេមិនអាចរំពឹងលើតែប្រេងមួយមុខនោះទេ ដោយសារវាជាធនធានដែលអាចនឹងរលាយអស់នៅអនាគតខាងមុខ។

ហេតុនេះទើបពួកគេចាប់ផ្ដើមក្រាលមូលដ្ឋានសេដ្ឋកិច្ចដ៏រឹងមាំ និងយូរអង្វែងមួយគឺអចលនទ្រព្យដែលសព្វថ្ងៃជាឆ្អឹងខ្នងសំខាន់របស់ទីក្រុងនេះ។ មកទល់សព្វថ្ងៃនេះ ឌុយបៃបានក្លាយជាបណ្ដុំនៃសំណង់អគារខ្ពស់ៗ និងទំនើបៗលើលោកដោយក្នុងនោះ អគារខ្ពស់ជាងគេលើលោក Burj Khalifar ក៏ស្ថិតនៅទីនេះដែរ៕

from： https://tnaot.com/km/m/detail/article/9210578