Sign In 
អរម៉ូនជាច្រើនត្រូវបានផលិតក្នុងខ្លួនមនុស្សទៅតាមប្រព័ន្ធរបស់ក្រពេញនីមួយៗ។ ក្រពេញមានតួនាទី បញ្ចេញអរម៉ូនផ្ទាល់ទៅតាមចរន្តឈាម ដោយចរន្តឈាមនឹងបញ្ជូនទៅពាសពេញខ្លួនរបស់មនុស្ស។ ប្រភេទអរម៉ូនម្យ៉ាងដែលត្រូវបានគេស្គាល់ថា អរម៉ូនភេទដែលបែងចែកជា ២ គឺ អរម៉ូនមនុស្សប្រុស មានឈ្មោះថា តេស្តូស្តេរ៉ូន (Testosterone) ដែលបង្កើតដោយពងស្វាស និងអរម៉ូនស្រី មានឈ្មោះថា អឺត្រូស្សែន (Oestrogen) ដែលបង្កើតដោយអូវែ។
ក្នុងខ្លួនរបស់មនុស្សប្រុស ក៏មានអរម៉ូនស្រីតិចតួចដែរ ដោយសារអរម៉ូនមនុស្សប្រុស តេស្តូស្តេរ៉ូនមួយចំនួនបានបម្លែងខ្លួនទៅជាអរម៉ូនស្រី អឺត្រូស្សែន។ មួយវិញទៀត ទាំងមនុស្សប្រុស និងមនុស្សស្រី មានក្រពេញម្យ៉ាង ដែលស្ថិតលើតម្រងនោម ដោយផលិតអរម៉ូនតេស្តូស្តេរ៉ូនក្នុងបរិមាណមួយ។ ករណីនេះ ទាំងមនុស្សមា្នក់ៗ សុទ្ធតែមានអរម៉ូនស្រី និងអរម៉ូនមនុស្សប្រុស (តេស្តូស្តេរ៉ូន និងអឺត្រូស្សែន) ដូចគ្នា តែក្នុងបរិមាណមិនដូចគ្នា។
ជាទូទៅ តេស្តូស្តេរ៉ូន (Testosterone) ធ្វើឱ្យមានភាពជាមនុស្សប្រុស ហើយអរម៉ូនអឺត្រូស្សែន (Oestrogen) បង្កើតឱ្យមានភាពជានារី។ ដោយសារកត្តាហ្សែនផងដែរនោះ អរម៉ូនភេទមានឥទ្ធិពលលើការលូតលាស់ នៃប្រដាប់បន្តពូជ ខួរក្បាល និងរូបរាងរបស់មនុស្សម្នាក់ ដូចជាកម្ពស់ ក៏ដូចជាសារធាតុខ្លាញ់ ត្រូវបានចែកចាយក្នុងខ្លួន និងសាច់ដុំរបស់មនុស្ស។
មុនកំណើត៖ ក្នុងខ្លួនរបស់ក្មេងប្រុស មានតេស្តូស្តេរ៉ូន (Testosterone)ដែលជួយក្នុងការបង្កើត លឹង្គ និងពងស្វាស។ ដោយគ្មានការចូលរួមរបស់ តេស្តូស្តេរ៉ូន (Testosterone) ក្មេងស្រីបង្កើតឆ្តេញ (សិរ) បបូរទ្វាមាស ស្បួន និងទ្វារមាស។
ពេលធំពេញវ័យ៖ អរម៉ូនភេទ នឹងជួយក្នុងការបង្កើតការលូតលាស់ផ្លូវភេទបន្តបន្ទាប់ ដូចជាក្មេងស្រី សុដន់របស់ពួកគេ ចាប់ផ្តើមរីកលូតលាស់ធំ ហើយមានរដូវ និងដុះរោមក្លៀក រួមទាំងនៅជុំវិញប្រដាប់បន្តពូជ។ ចំណែកក្មេងប្រុសវិញ អរម៉ូនភេទ ធ្វើឱ្យពួកគេមានរោមក្លៀក និងនៅជុំវិញប្រដាប់បន្តពូជ ដូចជាក្មេងប្រុសដែរ ប៉ុន្តែក៏ចាប់ផ្តើមមានរោមុខ និងដងខ្លួន ហើយក៏មានការកកើតជាគ្រាប់ពោន និងមានសំឡេងគ្រលខ្លាំង។ លឹង្គរបស់ពួកគេ ក៏ចាប់ផ្តើមរីកធំដែរ រួមទាំងពងស្វាស លិង្គឡើងរឹងនិងចាប់ផ្តើមផលិតទឹកកាម ចំណែកសាច់ដុំរបស់គាត់ក៏ចាប់ផ្តើមរីកធំខ្លាំងដែរ។
ពេញមួយជីវីត៖ អរម៉ូនភេទជួយដល់ប្រព័ន្ធបន្តពូជ និងសុខភាពទូទៅ ព្រមទាំងសុខមាលភាពផងដែរ។
វ័យចំណាស់៖ អរម៉ូនទាំងអស់នឹងចាប់ផ្តើមកាត់បន្ថយដោយខ្លួនឯង៕
