ភ្នំពេញ៖ សូមបងប្អូនប្រជាពលរដ្ឋបន្តយកចិត្តទុកដាក់ខ្ពស់ជានិច្ច ចំពោះអនាម័យសុខភាព​ជាប្រចាំដូចជា ត្រូវឧស្សាហ៍ដុសលាងសម្អាតដៃ និងសាប៊ូ​ ឬទឹកអាល់កុល​ ឬជេលសម្លាប់មេរោគ​ នឹងត្រូវពាក់ម៉ាស ឬក្រមាកុំអោយឆ្លងរោគពីយើងទៅគេ​ និងពីគេមកយើង​ ព្រោះជំងឺដ៏កាចសាហាវនេះ ងាយឆ្លងលឿនណាស់។ នេះបើតាមហ្វេសប៊ុកសម្តេច ហ៊ុន សែន នៅព្រឹកថ្ងៃទី១២ ខែឧសភា ឆ្នាំ២០២០នេះ។ 

សម្តេចនាយករដ្ឋមន្ត្រីថា ក្នុងមួយប៉ព្រេចភ្នែកសោះចំនួនអ្នកឆ្លងជំងឺកូវីដ19 នៅក្នុងពិភពលោកគឺបានកើនជាង៤លាននាក់។ នេះគឺក្តីបារម្ភខ្លាំងបំផុតរបស់ពិភពលោកទាំងមូល។ ចំពោះនៅប្រទេសយើងវិញ​ ទោះបីចំនួនអ្នកដែលបានព្យាបាលជាសះស្បើយបានច្រើន​ ហើយពុំមានអ្នកឆ្លងថ្មីក៏ដោយគឺ ត្រូវបន្តយកចិត្តទុកដាក់ ស្តាប់តាមការណែនាំរបស់ក្រសួងសុខាភិបាល។

សូមជម្រាបថា មកដល់ព្រឹកថ្ងៃទី១២ ខែឧសភា ឆ្នាំ២០២០នេះ អ្នកជំងឺកូវីដ១៩ នៅកម្ពុជាសល់តែម្នាក់ទៀតប៉ុណ្នោះ ដែលមិនទាន់ជាសះស្បើយ។ ពោលគឺក្នុងចំណោមអ្នកជំងឺកូវីដ១៩ទាំងអស់សរុប១២២នាក់ កម្ពុជាព្យាបាលឲ្យជាសះស្បើយ ១២១នាក់ហើយ។ រដ្ឋមន្ត្រីក្រសួងសុខាភិបាល បញ្ញាក់ក្នុងសន្និសីទសារព័ត៌មានកាលពីថ្ងៃចន្ទថា អ្នកដែលនៅសេសសល់នោះ នឹងអាចជាសះស្បើយក្នុងពេលឆាប់នេះផងដែរ ៕ ដោយ៖ ប៊ុនធឿន 

from： https://tnaot.com/km/m/detail/article/9209592