Sign In 
ហ្វីលីពីនបានប្រកាសកាលពីថ្ងៃទី១២ ខែឧសភា ឆ្នាំ២០២០ថា ប្រទេសនេះ បន្តបិទ ឬចាក់សោប្រទេសលើសពី៩សប្តាហ៍ នៅក្នុងតំបន់មួយចំនួន ។ 
លោក Rodrigo Duterte ប្រធានាធិបតីហ្វីលីពីនបានថ្លែងបន្ថែមការចាក់សោប្រទេសនេះ អំឡុងពេលប្រជុំជាមួយកងកម្លាំងទទួលភារកិច្ចប្រយុទ្ធប្រឆាំងកូវីដ-១៩ ផ្សព្វផ្សាយតាមកញ្ចក់ទូរទស្សន៍ កាលពីព្រឹកថ្ងៃទី១២ ខែឧសភា ឆ្នាំ២០២០ ។
តំបន់មួយចំនួន ប្រហែលជាមិនស្ថិតនៅក្នុងគោលដៅបន្ថែមការចាក់សោនោះទេ ។
នៅទីក្រុងម៉ានីល ការចាក់សោ នឹងបន្ថែម២សប្តាហ៍ទៀតសរុប១១សប្តាហ៍ ដើម្បីទប់ស្កាត់ការឆ្លងរាតត្បាតពីវីរុស ។ 
ក្រសួងសុខាភិបាលហ្វីលីពីនបានប្រកាសថា មកត្រឹមថ្ងៃទី១២ ខែឧសភា ប្រទេសនេះមានអ្នកឆ្លងកូវីដ១៩ សរុបជាង ១១ ០០០ ករណី ក្នុងនោះបាត់បង់ជីវិត ៧២៦នាក់ ។ ការឆ្លងថ្មីស្ថិតនៅកម្រិតថេរ ពី១៥០នាក់ទៅ៣០០នាក់ក្នុងមួយថ្ងៃ ។
លោក Duterte បានថ្លែងថា វិធានការណ៍នានានឹងត្រូវបានបន្ធូរបន្ថយនៅតាមកន្លែងខ្លះ ប៉ុន្តែសូមជំរុញឱ្យមានការប្រុងប្រយ័ត្ន និងឮពាក់ម៉ាស់ការពារគឺជារឿងដាច់ខាត “ត្រូវតែគោរព” ។
លោកថ្លែងថា “សម្រាប់អ្នកដែលនឹងត្រូវបានអនុញ្ញាតឱ្យចេញទៅធ្វើការ និងអ្នកដែលមិនបានការអនុញ្ញាតទាំងនោះ សូមចងចាំថា ការបន្ធូរបន្ថយការរឹតបន្តឹងនេះ មិនមែនមានន័យថា ក្របខ័ណ្ឌកូវីដ១៩ លែងមានទៀតនោះទេ ។ យើងមិនអាចមានលទ្ធភាពទប់ស្កាត់រលកទីពីរ ឬទីបីបាននោះទេ»។
ទីក្រុងម៉ានីល ជាទីក្រុងមួយរបស់ហ្វីលីពីនដែលមានមនុស្សរស់នៅយ៉ាងតិច ១៣ លាននាក់ និងប្រជាជនក្រៅផ្លូវការរាប់លាននាក់ទៀតក៏បានរស់នៅទីនោះផងដែរ ។ ទីក្រុងនេះ នៅតែជាចំណុចកណ្តាលការឆ្លងរាតត្បាតពីវីរុសកូវីដ១៩ ដែលក្នុងនោះការឆ្លងសរុបនៅក្នុងប្រទេសហ្វីលីពីន មាន៦៤ភាគរយ គឺជាករណីកើតឡើងនៅក្នុងទីក្រុងម៉ានីល ។ ចំណែកជនរងគ្រោះបាត់បង់ជីវិត នៅទីក្រុងមួយនេះឈរនៅចំណុចខ្ពស់៧២ភាគរយនៃការស្លាប់សរុបទូទាំងប្រទេស ។ 
ការបិទទ្វារនៅទីក្រុងម៉ានីល និងទីក្រុងធំៗ ដទៃទៀត តម្រូវឱ្យមានការរស់នៅតែក្នុងផ្ទះ ឃ្លាតឆ្ងាយពីសង្គម, ទប់ស្កាត់ការដឹកជញ្ជូន ការធ្វើអន្តោប្រវេសន៍ និងការធ្វើលំហាត់ប្រាណខាងក្រៅ និងកំណត់ការធ្វើចលនាដល់កម្មករនៅក្នុងវិស័យសំខាន់ៗ និងមនុស្សម្នាក់ សម្រាប់មួយគ្រួសារដែលអាចទៅផ្សារទំនើប, ទៅកាន់ឱសថស្ថាន ឬគ្លីនិកបាន។
ហ្វីលីពីនគឺជាប្រទេសមួយក្នុងចំណោមប្រទេសដំបូងគេ ដែលហាមឃាត់ការហោះហើរទៅ និងមក ពីប្រទេសចិន បន្ទាប់ពីភ្ញៀវទេសចរចិន ៣ នាក់បានធ្វើតេស្ត៍វិជ្ជមានកូវីដ១៩ ។ ហ្វីលីពីនក៏ជាប្រទេសទីបី បន្ទាប់ពីប្រទេសចិន និងអ៊ីតាលី ដែលបានបញ្ជាឲ្យប្រជាជនស្ថិតនៅតែក្នុងផ្ទះ បើទោះបីមានករណីតិចតួចឆ្លងរាតត្បាតនៅកន្លែងផ្សេងទៀតក៏ដោយ ៕ ប្រែសម្រួលដោយ៖ thach yat
