ប្រភពព័ត៌មានរ៉យទ័រ បានផ្សាយ ​នៅថ្ងៃទី១២ ខែឧសភា ឆ្នាំ២០២០ថា ទីភ្នាក់ងារព័ត៌មានផ្លូវការ IRIB បានផ្សាយថា ព្រះវិហារ​អ៊ិស្លាម​ទាំងអស់ នៅក្នុងប្រទេសអ៊ីរ៉ង់ នឹងបើកជាបណ្តោះអាសន្ន នៅថ្ងៃអង្គារ ទី១២ ខែឧសភានេះ ដែលជាជំហានបន្ថែមទៀត ផែនការ​របស់រដ្ឋាភិបាល ដើម្បីបន្ធូរបន្ថយការរឹតបន្តឹង ដើម្បីទប់ស្កាត់ការរីករាលដាលវីរុសកូវីដ១៩ (COVID-19)​ ។

ប្រភព IRIB បានដកស្រង់សម្ដីរបស់លោក Mohammad Qomi ប្រធានអង្គការអភិវឌ្ឍន៍អ៊ិស្លាមថា ការសម្រេចចិត្តបើកទ្វារ​ព្រះវិហារអ៊ិស្លាម​ឡើងវិញ​នេះ ត្រូវបានធ្វើឡើង បន្ទាប់ពីមានការពិគ្រោះយោបល់ជាមួយក្រសួងសុខាភិបាលរួចហើយ។

ទីភ្នាក់ងារសារព័ត៌មាន Fars បានផ្សាយផងដែរថា លោក Qomi បានថ្លែង នៅថ្ងៃទី១១ ខែឧសភា ថា ព្រះវិហារអ៊ិស្លាម​ត្រូវបានបើក សម្រាប់តែ៣ថ្ងៃប៉ុណ្ណោះ ដើម្បីរំឭកដល់រាត្រីជាក់លាក់មួយ សម្រាប់ខែដ៏ពិសិដ្ឋ នៃពិធីបុណ្យរ៉ាម៉ាដាន ហើយគេនៅមិនទាន់ច្បាស់ថា តើព្រះវិហារអិស្លាមទាំងអស់ នឹងនៅបើកទ្វារចំហជារៀងរហូត ឬក៏យ៉ាងណានោះដែរ។

ការវិវឌ្ឍខាងលើនេះ បានកើតឡើង នៅក្នុងប្រទេសអ៊ីរ៉ង់ បើទោះជាផ្នែកខ្លះ នៅក្នុងប្រទេស បានឃើញការកើនឡើងករណីឆ្លងវីរុសកូវីដ​១៩​ក៏ដោយ ។ 

សារព័ត៌មាន Tasnim បានផ្សាយ កាលពីថ្ងៃទី១០ ខែឧសភាថា ស្រុកមួយនៅភាគនិរតីរបស់អ៊ីរ៉ង់ ត្រូវបានដាក់ឱ្យស្ថិត​នៅក្រោមការ​ឃុំឃាំង ដោយសារតែកំណើន នៃអ្នកឆ្លងកូវីដ​១៩ ។ 

អ្នកនាំពាក្យក្រសួងសុខាភិបាលអ៊ីរ៉ង់ លោក Kianush Jahanpur បានថ្លែងការណ៍នៅលើកញ្ចក់ទូរទស្សន៍ថា ការស្លាប់ដោយ​សារ​វីរុស​កូវីដ១៩ នៅអ៊ីរ៉ង់ បានកើនឡើងចំនួន ៤៥ នាក់ ក្នុងរយៈពេល ២៤ម៉ោង ធ្វើឲ្យជនរងគ្រោះបាត់បង់ជីវិតកើនដល់ ៦ ៦៨៥ នាក់។ ចំណែក​អ្នកឆ្លងសរុប មានចំនួន ១០៩ ២៨៦ ករណី ៕ ប្រែសម្រួលដោយ៖ thach yat

from： https://tnaot.com/km/m/detail/article/9208508