ប្រភព Sputnik ផ្សាយនៅថ្ងៃទី១១ ខែឧសភាថា ភ្លាមៗបន្ទាប់ពី​សារព័ត៌មាន Bloomberg ផ្សាយថា លោកអនុប្រធានាធិបតីអាមេរិក Mike Pence ចាប់ផ្តើម​នៅឆ្ងាយដាច់ដោយឡែក​ពីគេឯងនោះ លេខាធិការព័ត៌មាន​របស់គាត់បានប្រកាស​ច្រានចោល​​ព័ត៌មាន​នេះភ្លាម ហើយ បានថ្លែងថា លោកអនុប្រធានាធិបតី នឹងមានវត្តមាន​ នៅ​សេតវិមាន​តាមការគ្រងទុក​នៅថ្ងៃស្អែក ។ 

កាលពីចុងសប្តាហ៍មុន ប្រធានាធិបតីអាមេរិក លោកដូណាល់ ត្រាំ បានថ្លែងថា លេខាធិការសារព័ត៌មានរបស់អនុប្រធានាធិបតី Mike Pence គឺលោកស្រី Katie Miller បានធ្វើតេស្តវិជ្ជមានវីរុស COVID-19 ។

អ្នកនាំពាក្យអនុប្រធានាធិបតី Pence លោក Devin O’Malley បានថ្លែង កាលពីថ្ងៃទី១០ ខែឧសភាថា លោកអនុប្រធានាធិបតី Pence នឹង បន្តអនុវត្តតាមការណែនាំរបស់អង្គភាពវេជ្ជសាស្ត្រ នៃសេតវិមាន និងមិនស្ថិតនៅដាច់ពីគេឯងនោះទេ ។ លើសពីនេះទៀត លោកអនុប្រធានាធិបតីបានធ្វើតេស្តអវិជ្ជមានរាល់ថ្ងៃ ហើយគ្រោងនឹងធ្វើនៅឯសេតវិមាន នៅថ្ងៃស្អែកនេះ” ។ 

មុននេះ សារព័ត៌មាន Bloomberg បានដកស្រង់សម្ដីប្រភពនានា ដែលបានលើកឡើងថា លោក Pence បានចាប់ផ្តើម នៅដាច់ដោយឡែក​តែខ្លួនឯង គឺនៅឆ្ងាយពីសេតវិមាន។ ការសម្រេចចិត្តនេះ បន្ទាប់ពីការភ្ជាប់ទៅនឹងព័ត៌មានកាលពីថ្ងៃទី៨ ខែឧសភា ដែលថា លេខាធិការ​ព័ត៌មាន​របស់លោក គឺលោកស្រី Katie Miller បានធ្វើតេស្តវិជ្ជមានវីរុស​កូវីដ ១៩​។

យោងតាមប្រព័ន្ធផ្សព្វផ្សាយបានឲ្យដឹងថា លោកអនុប្រធានាធិបតី Pence មិនបានចូលរួមក្នុងកិច្ចប្រជុំជាមួយលោក Trump និង​មន្រ្តី​យោធា​ជាន់ខ្ពស់ដែលបានធ្វើឡើង នៅថ្ងៃទី​៩ ខែឧសភានោះទេ បើទោះជាគាត់ត្រូវបានគេរាយការណ៍ថា បានធ្វើតេស្តអវិជ្ជមាន កូវីដ​១៩ នៅថ្ងៃដដែលនោះយ៉ាងណាក៏ដោយ។

ការផ្សព្វផ្សាយព័ត៌មាននេះបានអះអាងទៀតថា ការសម្រេចចិត្តនៅដាច់ដោយឡែករបស់លោកអនុប្រធានាធិបតីអាមេរិករូបនេះ មិនត្រូវបានប្រកាសជាសាធារណៈនោះឡើយ ។

ទិន្នន័យចុងក្រោយបង្អស់ដែលប្រមូលដោយសាកលវិទ្យាល័យ Johns Hopkins បានបញ្ជាក់ថា សហរដ្ឋអាមេរិក​បច្ចុប្បន្នមានករណីឆ្លង​កូវីដ១៩ ចំនួន ១ ៣២៨ ២០១ នាក់ ក្នុងនោះបានស្លាប់ ៧៩ ៥០៨ នាក់ ៕ ប្រែសម្រួលដោយ៖ thach yat 

from： https://tnaot.com/km/m/detail/article/9204914