Sign In 
ភ្នំពេញ៖ ក្រុមអ្នកញៀនល្បែងជល់មាន់ អាប៉ោងជាច្រើននាក់បានរត់ប្រសេចប្រសាច ខណៈកម្លាំងអន្តរាគមន៍ នៃអធិការដ្ឋាននគរបាលខណ្ឌច្បារអំពៅឆ្មក់បង្ក្រាប កាលពីវេលាម៉ោង១១ និង៣០នាទីព្រឹក ថ្ងៃទី១០ ខែឧសភា ឆ្នាំ២០២០ ស្ថិតក្នុងភូមិចំពុះក្អែក សង្កាត់ព្រែកថ្មី ខណ្ឌច្បារអំពៅ ។
សមត្ថកិច្ចបានប្រាប់ឲ្យដឹងថា ដោយមានប្រជាពលរដ្ឋ បានរាយការណ៍ប្រាប់ថា ទីតាំងខាងលើកំពុងបើកល្បែងជល់មាន់ បាញ់អាប៉ោង និងមានមនុស្សទៅលែងយ៉ាងច្រើន ទើបលោកវរសេនីយ៍ឯក ម៉ៅ សឿត ដែលជាអធិការនគរបាលខណ្ឌច្បារអំពៅ បានបញ្ចាផ្ទាល់ឲ្យកម្លាំងនគរបាលព្រហ្មទណ្ឌ ចុះបង្ក្រាបភ្លាមៗតែម្ដង ។ ខណៈចុះប្រតិបត្តិការបង្ក្រាប ក្រុមអ្នកញៀនល្បែងជាច្រើនបានរត់ប្រសេចប្រសាចទៅបាត់អស់ ដោយបន្សល់ទុកសម្ភារ មាន់គក និងម៉ូតូ ចោលត្រង់ទីតាំងខាងលើ ។
ក្នុងប្រតិបត្តិការណ៍ចុះបង្ក្រាបនេះ សមត្ថកិច្ចបានដកហូតវត្ថុតាងរួមមាន៖ មាន់ជល់៦ក្បាល ,ម៉ូតូ២គ្រឿង , ឧបករណ៍បាញ់អាប៉ោង និងសម្ភារមួយចំនួន ហើយត្រូវបានបញ្ចូនទៅរក្សាទុកនៅអធិការដ្ឋាននគរបាលខណ្ឌច្បារអំពៅ រង់ចាំចាត់ចែងតាមនីតិវិធីបន្ត ៕ ដោយ៖ ផេង ភាព 
