អង្គការសុខភាពពិភពលោក​ (WHO) ​បានព្រមានថា អាចនឹងមានអ្នកស្លាប់ដោយកូវីដ១៩ នៅទ្វីបអាហ្វ្រិក កើនឡើងដល់ទៅ ជិត​២សែននាក់ ប្រសិនបើវិធីសាស្ត្រទប់ស្កាត់កូវីដ១៩ មិនមានប្រសិទ្ធភាពទេនោះ​។

នៅទ្វីបអាហ្វ្រិក មាន៤៧ប្រទេស មានពលរដ្ឋប្រមាណ១ពាន់លាននាក់។ បើតាមលទ្ធផលស្រាវ​ជ្រាវ​ពីការិយាល័យរបស់​ WHO នៅ​សាធារណរដ្ឋកុងហ្គោ បានបង្ហាញឲ្យឃើញថា នឹងមានពលរដ្ឋ អាហ្វ្រិកយ៉ាងតិច ​ពី២ម៉ឺននាក់ដល់២សែននាក់ស្លាប់ និងឆ្លងរាលដាល ប្រមាណ​​២៩លាននាក់ ដល់ទៅ ៤៤លាននាក់។

បើទោះបី នៅទ្វីបអាហ្វ្រិកមានអ្នកឆ្លងកូវីដ១៩យឺតជាងតំបន់អាស៊ី និងអឺរ៉ុប ប៉ុន្តែក្រុមអ្នកឯកទេស​វិភាគ បានលើកឡើងថា​ នៅក្នុងទ្វីបនេះ​ងាយរងគ្រោះ ដោយសារតែប្រព័ន្ធសុខាភិបាលទន់ខ្យោយ ចំនួនពលរដ្ឋក្រីក្រច្រើន​។

ប្រធានសាខា​ WHO ​ប្រចាំនៅទ្វីបអាហ្វ្រិក លោក​ Matshidiso ​បានបញ្ជាក់ថា កូវីដ១៩ អាចនឹងរាលដាលខ្ពស់ នៅក្នុងទ្វីបនេះ។

សារព័ត៌មាន​ AFP ​បានផ្សាយថា គិតត្រឹមថ្ងៃទី​៧ ខែឧសភា នៅទូទាំងទ្វីបអាហ្វ្រិក មានអ្នកឆ្លងកើនឡើងដល់ ជាង​៥៣ពាន់នាក់ និងស្លាប់​ជាង​២ពាន់នាក់។

ជាមួយគ្នានេះដែរ ប្រទេសមួយចំនួន នៅទ្វីបអាហ្វ្រិកបានសម្រេចលុបច្បាប់បម្រាមគោចរ ដើម្បីដំណើរការសេដ្ឋកិច្ច ​ផ្តល់ការងារ​ធ្វើដល់​ពលរដ្ឋ​ បើទោះជាមានអ្នកឆ្លងកូវីដ១៩ច្រើនក្តី។ កត្ដាទាំងនោះហើយ បានបង្កក្តីបារម្ភយ៉ាងខ្លាំង​ពីការឆ្លងរាលដាលខ្លាំងឡើង៕ ប្រែ​សម្រួល​ដោយ៖ MEO

from： https://tnaot.com/km/m/detail/article/9201144