នៅថ្ងៃព្រហស្បតិ៍នេះរដ្ឋាភិបាលថៃបានរាយការណ៍ថា មានករណីឆ្លងវីរុសកូរ៉ូណាចំនួន ៣ករណីថ្មី។ គិតមកដល់ថ្ងៃនេះចំនួនអ្នកឆ្លងសរុបនៅក្នុងប្រទេសថៃកើនឡើងដល់ ២៩៩២ នាក់ហើយ។ មិនមាន​ការរាយការណ៍ថ្មីអំពីករណីស្លាប់បន្ថែមទៀតនោះទេ ដូច្នេះចំនួនអ្នកស្លាប់សរុបក្នុងប្រទេស​មានចំនួន ៥៥នាក់ដដែល។

លោកវេជ្ជបណ្ឌិត Taweesilp Visanuyothin អ្នកនាំពាក្យមជ្ឈមណ្ឌលគ្រប់គ្រងស្ថានភាពវីរុសកូរ៉ូណាបាននិយាយថា ករណីថ្មីមួយគឺជាស្ត្រីមេផ្ទះជនជាតិថៃអាយុ ៥៩ឆ្នាំ រស់នៅខេត្ត Yala ​។ អ្នកជំងឺមានទំនាក់ទំនងជិតស្និទ្ធជាមួយអ្នកជំងឺមុនដែល​វិលត្រឡប់មកពីប្រទេសម៉ាឡេស៊ី។ តាមការធ្វើតេស្តបានឱ្យដឹងថា គាត់មិនមានរោគសញ្ញាអ្វីនោះទេ។ ករណីថ្មីពីរទៀតគឺបុរសជនជាតិថៃ​មានមុខរបរជាកម្មករអាយុ ៤៦ និង ៥១ ឆ្នាំដែលបានវិលត្រឡប់មកពីប្រទេស ​Kazakhstanកាលពីថ្ងៃសៅរ៍មុន ហើយត្រូវបានគេយកទៅកន្លែងដាក់ឱ្យនៅដាច់ដោយឡែករយៈពេល១៤ថ្ងៃភ្លាមៗ។ អ្នកជំងឺចំនួន ១១ នាក់បានជាសះស្បើយ និងត្រូវបានអនុញ្ញាតឱ្យចេញពីមន្ទីរពេទ្យ​ដែលធ្វើឱ្យចំនួនករណីនៃអ្នកជាសះស្បើយកើនឡើងដល់ ២៧៧២ នាក់។ លោកវេជ្ជបណ្ឌិត Taweesilp បានមានប្រសាសន៍ថាចំនួនខេត្តដែលមិនមានករណីឆ្លងវីរុសកូរ៉ូណាក្នុងរយៈពេល ២៨ ថ្ងៃកន្លងមកមានចំនួន ៣៩ខេត្ត។ ខេត្តទាំង៩ដែលមិនទាន់មានករណីកូរ៉ូណាចូលរាតត្បាតមានដូចជាខេត្ត​ Ang Thong, Bung Kan, Chai Nat, Kamphaeng Phet, Nan, Phichit, Ranong, Sing Buri និងខេត្ត Trat។

​អ្នកនាំពាក្យ​បានបន្ថែមថាករណីវីរុសកូរ៉ូណាទូទាំងពិភពលោកមានចំនួន ៣.៨២ លាននាក់ និងករណីស្លាប់សរុប​ចំនួន ២៦៥ ០៧៦ នាក់។ សហរដ្ឋអាមេរិកជាប្រទេសដែលមានករណីឆ្លង​និងស្លាប់ច្រើនបំផុត ដែលក្នុងនោះមានចំនួនអ្នកឆ្លងក្នុងប្រទេសសរុបចំនួន ១.២៦ លាននាក់ មានអ្នកស្លាប់ចំនួន​ ៧៤៧៩៩ នាក់និងមានអ្នកឆ្លងវីរុសកូរ៉ូណា​ចំនួន ២៥ ៤៥៩ នាក់ថ្មីទៀត។  

កែសម្រួលដោយ៖ ភារ៉ា

ប្រភព៖ Bangkok Post

from： https://tnaot.com/km/m/detail/article/9199032