Sign In 
នៅអាគារមន្ទីរវប្បធម៌ និងវិចិត្រសិល្បៈខេត្តកោះកុង មានរៀបចំវត្ថុបុរាណជាកុលាលភាជន៍ជាច្រើនប្រភេទដែលស្រង់បានពីក្រោមបាតសមុទ្រនៅកោះស្ដេចក្នុងទឹកដីខេត្តកោះកុង។ តាមអ្នកជំនាញបានឲ្យដឹងថា វត្ថុបុរាណនេះ បានមកពីសំពៅលិចក្នុងទឹកកាលពីសតវត្សទី១៥ ហើយគេបានស្រង់យកមកនៅឆ្នាំ២០០៦។
អ្នកជំនាញសន្និដ្ឋានថាសំពៅលិចមានចំនួន១៥ ធ្វើដំណើរដឹកកុលាលភាជន៍លក់នៅក្នុងតំបន់អាស៊ីអាគ្នេយ៍ ហើយគេស្រង់បានតែសំពៅមួយប៉ុណ្ណោះ។ អ្នកជំនាញឲ្យឈ្មោះសំពៅលិចនោះថា “សំពៅកោះស្ដេច” ហើយវាបានលិចចម្ងាយប្រមាណ២០គីឡូម៉ែត្រចេញពីឈូងសមុទ្រកោះស្ដេច។
ការមុជទឹក២លើករបស់ក្រុមការងារស្រង់យកភាជន៍បានជាង១០០០ ភាគច្រើនជាងពាង និងក្រឡមេណាំណយ មានទំហំខុសៗគ្នា ព្រមទាំងប្រភេទចានស្រីសជនាល័យ ចានសុខោទ័យ និងចានចិនក្នុងរាជវង្សម៉េង។
ដោយសារកង្វះអ្នកជំនាញបុរាណវិទ្យាក្រោមទឹក និងធនធាន គេពុំទាន់មានលទ្ធភាពគ្រប់គ្រាន់ក្នុងការស្រង់យកវត្ថុបុរាណក្រោមទឹកសមុទ្របានទៀតនោះទេ ពោលរង់ចាំពេលវេលាមួយសមស្របទាំងធនធានមនុស្ស និងធនធានសម្ភារៈ៕
