Sign In 
នាយករដ្ឋមន្រ្ដីជប៉ុន លោក ស៊ីនហ្ស៊ូ អាបេ និងសមភាគីវៀតណាម លោក Nguyen Xuan Phuc នៅដើមសប្ដាហ៍នេះ បានពិភាក្សាគ្នា តាមទូរស័ព្ទស្ដីអំពីយុទ្ធសាស្រ្ដ ធ្វើសង្គ្រាមប្រឆាំងនឹងកូវីដ១៩។
នៅក្នុងកិច្ចពិភាក្សាទ្វេភាគីនោះ លោកនាយករដ្ឋមន្រ្ដី នៃប្រទេសទាំង២ បានព្រមព្រៀងគ្នា ដើម្បីធ្វើកិច្ចសហប្រតិបត្ដិការយ៉ាងជិតស្និទ្ធ ដើម្បីយកជ័យជម្នះទៅលើវីរុសឆ្លងរាតត្បាត។ មេរោគនេះកំពុងបង្កឲ្យកើតមានវិបត្ដិសកល ដោយប៉ះពាល់ដល់ដល់សេដ្ឋកិច្ច នៃបណ្ដាប្រទេសជាច្រើន នៅលើសកលលោក។
លោកនាយករដ្ឋមន្រ្ដីវៀតណាម បានថ្លែងថា ដោយផ្អែកលើគោលការណ៍សំខាន់ៗជាច្រើនទើបវៀតណាមអាចគ្រប់គ្រងវីរុសកូវីដ១៩បានយ៉ាងល្អប្រសើរ។ ប៉ុន្ដែក្រោយមិនមានករណីឆ្លងថ្មីនៃកូវីដ១៩នេះ វៀតណាមកំពុងត្រួសត្រាយផ្លូវ សម្រាប់ប្រជាជាតិខ្លួនអាចបន្ដសកម្មភាពសេដ្ឋកិច្ចសង្គម ឲ្យដំណើរការជាធម្មតាឡើងវិញ។
ជាមួយគ្នានេះដែរ លោកនាយករដ្ឋមន្រ្ដីវៀតណាម ក៏បានថ្លែងអំណរគុណដល់រដ្ឋាភិបាលជប៉ុន ក្នុងការផ្ដល់ថវិកា ១,៨លានដុល្លារ ដល់ប្រទេសអាស៊ាន ដើម្បីប្រយុទ្ធប្រឆាំងនឹងកូវីដ១៩។ រីឯវៀតណាមក៏សម្រេចផ្ដល់ម៉ាស់មុខចំនួន១៤០០០០ដល់ជប៉ុនផងដែរ។
លោកនាយករដ្ឋមន្រ្ដីជប៉ុនបានថ្លែងទៅកាន់សមភាគីថារដ្ឋាភិបាលជប៉ុនបានសម្រេចបញ្ចេញកញ្ចប់ថវិកាសង្រ្គោះបន្ទាន់ជួយដល់ប្រជាពលរដ្ឋ ក្នុងម្នាក់១០០០០០យ៉េន (លុយជប៉ុន) ឬស្មើនឹង១ពាន់ដុល្លារអាមេរិក ដោយរួមទាំងពលរដ្ឋវៀតណាមកំពុងរស់នៅ និងធ្វើការងារ នៅក្នុងប្រទេសជប៉ុនផងដែរ។
បើគិតចាប់តាំងពីការផ្ទុះឡើង នៃកូវីដ១៩ នាអំឡុងខែធ្នូ ឆ្នាំ២០១៩ រហូតមកដល់ថ្ងៃទី៦ ខែឧសភា ឆ្នា២០២០ នៅលើពិភពលោក មានអ្នកឆ្លងកើនឡើង ៣ ៧២៧ ៨០២នាក់ ក្នុងនោះស្លាប់ ២៥៨ ៣៣៨នាក់ និងជាសះស្បើយ ១ ២៤២ ៣៤៧នាក់។ រីឯប្រទេសវៀតណាម មានអ្នកឆ្លង ចំនួន២៧១នាក់ ក្នុងនោះជាសះស្បើយ២៣២នាក់។ ចំណែកប្រទេសជប៉ុនវិញ មានអ្នកឆ្លង ១៥ ២៥៣នាក់ ស្លាប់៥៥៦នាក់ និងជាសះស្បើយ៤៤៩៦នាក់។
ក្រៅពីសម្លាប់មនុស្សនៅលើពិភពលោកអស់ជិត២៦ម៉ឹននាក់នោះ មេរោគដ៏កាចសាហាវនេះ បានធ្វើឲ្យមនុស្សរាប់លាននាក់ ត្រូវនៅដាច់ដោយឡែក ហើយបាត់បង់ការងារប្រហែលជាង១០០លាន។ ប៉ុន្ដែទោះជាយ៉ាងណា គេនៅមិនទាន់មានរបាយការណ៍ច្បាស់លាស់អំពីទំហំខាតបង់ នៃសេដ្ឋកិច្ច នៅលើពិភពលោកទាំងមូល នៅឡើយ៕ ប្រែសម្រួលដោយ Nuon
