ប្រភពព័ត៌មាន Sputnik កាលពីថ្ងៃទី​៥ ខែឧសភា ឆ្នាំ២០២០ បានផ្សាយ​ថា រដ្ឋមន្ត្រីក្រសួង​ការពារជាតិសហរដ្ឋអាមេរិក​ លោក Mark Esper បានថ្លែងប្រាប់ក្រុមអ្នកយកព័ត៌មាន​ នៅមន្ទីរបញ្ចកោណ​ថា «រដ្ឋាភិបាលអាមេរិក​មិនបានធ្វើអ្វី​ដូចដែលបានកើតឡើង ​នៅក្នុង​ប្រទេសវេណេហ្ស៊ុយអេឡា កាលពី​ប៉ុន្មានថ្ងៃកន្លង​ទៅនេះទេ»។ 

គួរបញ្ជាក់ថា កាលពីថ្ងៃទី៣ ខែឧសភា រដ្ឋមន្ត្រី​មហាផ្ទៃ​វេណេហ្ស៊ុយអេឡា លោក Nestor Reverol បានប្រកាសថា «ក្រុមទាហានស៊ីឈ្នួល​ភេរវករ មកពីកូឡុំប៊ី​ បានប៉ុនប៉ង​ចូលលុកលុយតាមច្រកសមុទ្រ ដោយមានគោលបំណងវាយប្រហារភេរវកម្ម​​ នៅលើទឹកដីរបស់យើង, ធ្វើឃាត​មេដឹកនាំរដ្ឋាភិបាលបដិវត្តន៍ បង្កើន​នូវស្មារតីហិង្សា បង្កើតភាពវឹកវរ និងការភាន់ច្រឡំ​ នៅក្នុងចំណោមមហាជន​ ហើយបីប៉ុនប៉ង​ធ្វើរដ្ឋប្រហារថ្មី»។

ក្រុមមន្ត្រីវេណេហ្ស៊ុយអេឡា បាននិយាយថា ពួកគេបានសម្លាប់ពួកទាហានស៊ីឈ្នួលភេរវករ​ទាំងនោះ​៨នាក់ ហើយចាប់ខ្លួន​២នាក់​នាំទៅ​ឃុំឃាំង។ ករណីនេះបង្ហាញឲ្យឃើញច្បាស់ថា ពួកគេជាជនជាតិអាមេរិក ឈ្មោះ Luke Denman និងឈ្មោះ Airan Berry ។ ទាំងពីរនាក់នេះ ​ជាអតីត​កងកម្លាំងប្រតិបត្តិការពិសេស​សហរដ្ឋអាមេរិក ។ 

បុរសទាំងពីរនាក់នេះ​ប្រតិបត្តិការ​ជាមួយជនទី៣ម្នាក់ ឈ្មោះ Jordan Goudreau អតីត​ស្ថាបនិក​ក្រុមហ៊ុន​កិច្ចសន្យាឯកជន Silvercorp នៅសហរដ្ឋអាមេរិក ហើយដែលបានប្រកាស​ទទួលខុសត្រូវ​ការវាយប្រហារនេះ​ ដោយដាក់ឈ្មោះថា «ប្រតិបត្តិការ Gideon» នៅក្នុងវីដេអូ​ផ្សាយនៅលើបណ្តាញ YouTube កាលពីថ្ងៃទី​៣ ខែឧសភា ។ លោក Goudreau បាននិយាយ​ព្រម​មួយអន្លើ​លោក Javier Nieto មេបញ្ជាការ​យោធា​វេណេហ្ស៊ុយអេឡា ​ចូលនិវត្តន៍​មួយរូប ដែលបច្ចុប្បន្ន​បានប្រឆាំងនឹង​រដ្ឋាភិបាល​វេណេហ្ស៊ុយអេឡា ដឹកនាំដោយ​លោកប្រធានាធិបតី Nicolas Maduro ។

លោក Juan Guaido អតីត​ប្រធានារដ្ឋសភាជាតិ ​ក្រោមខ្សែញាក់​ពីទីក្រុង​វ៉ាស៊ីនតោន​ ថាជាមេដឹកនាំ​ពេញសិទ្ធិ​ នៃវេណេហ្ស៊ុយអេឡា នោះ បានប្រកាស​ច្រានចោល​រាល់ការពាក់ព័ន្ធ​ណាមួយ​ទៅនឹងប្រតិបត្តិការ ដែលហៅថា ប្រតិបត្តិការ Gideon ដូចគ្នា​ទៅនឹង​ការថ្លែង​ការណ៍​របស់​ប្រធានាធិបតី ដូណាល់ ត្រាំ​​ កាលពីថ្ងៃទី៤ ខែឧសភា ដែលថា «រឿងរ៉ាវមួយនេះ​មិនបានពាក់ព័ន្ធអ្វីជាមួយ​រដ្ឋាភិបាល​របស់យើង​ឡើយ» ៕ ប្រែសម្រួលដោយ៖ thach yat 

from： https://tnaot.com/km/m/detail/article/9195841