ភ្នំពេញ៖ ទោះពិភពលោកកំពុងរងការរាតត្បាតវីរុសកូវីដ១៩ យ៉ាងណាក្ដី ក៏កម្ពុជាអាចនាំចេញម្រេចបាន ២.២៥២តោនដែរ នៅក្នុងរយៈពេល៤ខែដើមឆ្នាំ២០២០នេះ។ នេះបើយោតាមក្រសួងកសិកម្ម រុក្ខាប្រមាញ់ និងនេសាទ ដែលដកស្រង់ចេញពី AKP។

ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ផលិតផលម្រេចកម្ពុជាបាននាំចេញទៅកាន់ទីផ្សារ ១៣ ប្រទេស ។ ដោយគិតចាប់ពីខែមករា ដល់ខែមេសា ឆ្នាំ២០២០នេះ កម្ពុជាបាននាំចេញផលិតផលម្រេចចំនួន ២.២៥២ តោន ទៅកាន់ទីផ្សារនៅប្រទេសជប៉ុន ប៊ែលហ្សិក ហូឡង់ បារាំង អាល្លឺម៉ង់ ស្វីស វៀតណាម អាមេរិក រុស៊្សី អង់គ្លេស ឥណ្ឌា បេឡារុស និងកូរ៉េ។

គួរឱ្យដឹងថា បច្ចុប្បន្ននេះ ម្រេចកំពតត្រូវបានគេទទួលស្គាល់ទាំងតម្លៃ និងគុណភាព ប៉ុន្តែក្រៅពីខេត្តកំពត ក៏មានតំបន់ជាច្រើនទៀតកំពុងដាំម្រេច ហើយក៏មានជនជាតិជប៉ុនមកវិនិយោគដាំម្រេចនៅខេត្តកោះកុង ដើម្បីនាំចេញទៅកាន់ទីផ្សារជប៉ុនផងដែរ៕ ដោយ៖ តារា

from： https://tnaot.com/km/m/detail/article/9194253