ក្រោយរងផលប៉ះពាល់ខ្លាំងដល់ដំណើរការសេដ្ឋកិច្ច ដោយសារតែកូវីដ១៩នោះមក ក្រុមហ៊ុន​ផ្គត់ផ្គង់​អគ្គិសនីរដ្ឋរបស់ឥណ្ឌូនេស៊ី  (PLN) បានផ្គត់ផ្គង់អគ្គិសនី​ដល់បណ្ដាអាជីវកម្ម និង​អ្នក​ផលិតខ្នាតតូច រយ:ពេល៦ខែ ដោយឥតគិតលុយ។ 

លោក Zulkifli Zaini ប្រធាន និងជានាយកប្រតិបត្ដិក្រុមហ៊ុន PLN បានថ្លែង កាលពីថ្ងៃទី១ ខែ​ឧសភា ថា ក្រុមហ៊ុននឹងផ្គត់ផ្គង់អគ្គិសនីដល់​បណ្ដា​អាជីវកម្ម និងអ្នកផលិតខ្នាតតូច រយ:ពេល​៦ខែ ដោយឥតគិតលុយ។ ក្រុមហ៊ុនបានចាប់ប្រមូលទិន្នន័យ អំពីអតិថិជន ដែលទទួល បាន​សិទ្ធិ​ជួយទ្រទ្រង់នេះ ប្រហែល៥សែន។ 

រដ្ឋាភិបាលឥណ្ឌូនេស៊ី កាលពីខែមុន​ បានលើកលែងថ្លៃអគ្គិសនីដល់អ្នកប្រើប្រាស់ត្រឹម ៤៥០​VA ក្នុង១ខែ ចំនួន២៤លាននាក់ ហើយបញ្ចុះតម្លៃ៥០ភាគរយដល់ប្រើប្រាស់ ក្នុង១ខែ ៩០០VA ចំនួន៧លាននាក់។ 

នៅក្នុងកិច្ចប្រជុំរបស់រដ្ឋាភិបាល កាលពីចុងខែមេសា លោក Joko Widodo ប្រធានាធិបតី​ឥណ្ឌូនេស៊ី បានប្រកាសពីគម្រោងផ្សេងៗ ដើម្បីធ្វើឲ្យប្រាកដថា សហគ្រាសធុនតូច និង​ មធ្យម អាចនឹងរីករាយជាមួយនឹងកញ្ចប់សង្រ្គោះរបស់រដ្ឋាភិបាល រួមទាំង ការមិនគិតលុយថ្លៃ​ភ្លើងអគ្គិសនី …ជាដើម។ នៅដើមខែនេះ ឥណ្ឌូនេស៊ី ក៏បានប្រកាសបន្ថែមនូវថវិកា រហូត​ដល់​ទៅ ២៤,៨​ពាន់លាន សម្រាប់ដោះស្រាយផលប៉ះពាល់ពីកូវីដ១៩ ផងដែរ។ 

បើគិតត្រឹមរសៀល ថ្ងៃទី៤ ខែឧសភា ប្រទេសឥណ្ឌូនេស៊ី មានអ្នកឆ្លងកូវីដ១៩ ចំនួន១១ ១៩២​នាក់ ក្នុងនោះស្លាប់៨៤៥នាក់ និងជាសះ ស្បើយ ១៨៧៦នាក់។ ឥណ្ឌូនេស៊ី មានអ្នក​ស្លាប់​ដោយកូវីដ១៩ច្រើនជាងគេបំផុត នៅក្នុងតំបន់អាស៊ាន ៕ ប្រែសម្រួល ដោយ Nuon

from： https://tnaot.com/km/m/detail/article/9192856