រដ្ឋមន្ត្រីក្រសួងការបរទេសអាមេរិក លោក ​Mike Pompeo ​បានប្រកាសថា​​ កូវីដ​១៩លេចចេញពីមន្ទីរពិសោធន៍ នៅវូហាន។ លោកបន្ត​ទៀត​ថា ​អាមេរិកមានភស្តុតាងបញ្ជាក់ ថា កូវីដ១៩ ពិតជាចេញពីវូហានពិតមែន។

បណ្តាញព័ត៌មាន​ ABC​ នៅថ្ងៃទី​៣ ខែឧសភា  បានដកស្រង់សម្តីលោក​ Mike Pompeo ​​បានបញ្ជាក់ថា ចិនមានប្រវត្តិ ឆ្លងវីរុស​ចេញពី​បន្ទប់ពិសោធន៍ដែលខ្វះគុណភាព ។ លោកបន្តទៀតថា នេះមិនមែនជាលើកទីមួយឡើយ ដែលពិភពលោកប្រឈមនឹងការឆ្លងវីរុស ពីការបែកធ្លាយ នៅមន្ទីរពិសោធន៍របស់ចិន។

លោក​ Pompeo ​បញ្ជាក់ថា អាមេរិក មានភស្តុតាងគ្រប់គ្រាន់ថា វីរុសកូវីដ​១៩ ចាប់ផ្តើមចេញពី មន្ទីរពិសោធន៍វូហានរបស់ចិន។ ប៉ុន្តែ​លោកមិនបានផ្តល់ព័ត៌មានលម្អិតពីបញ្ហាខាងលើនេះឡើយ។ រដ្ឋមន្ត្រីការបរទេសអាមេរិក បានចោទប្រកាន់​ចិន ថាបានបិទបាំង​ព័ត៌មាន ហើយប្រើប្រាស់អង្គការសុខភាពពិភពលោក​ WHO ​ធ្វើជាឧបករណ៍សម្រាប់សម្រេចគោលដៅរបស់ខ្លួន។

ប៉ុន្តែកន្លងមក អង្គការសុខភាពពិភពលោក បានបញ្ជាក់ថា វីរុសកូវីដ​១៩​មិនមែនបែកធ្លាយចេញពី​មន្ទីរពិសោធន៍របស់ចិននោះឡើយ គឺជា​ការកើតចេញពិធម្មជាតិរបស់វា​។ ចំណែកភាគីចិនវិញ បានចោទប្រកាន់អាមេរិក ថា ប៉ុនប៉ងទម្លាក់កំហុស​មកឲ្យចិន។ រដ្ឋាភិបាល​ទីក្រុង​ប៉េកាំង​ បានអំពាវនាវដល់អាមេរិក ឲ្យបញ្ឈប់សកម្មភាពយកបញ្ហាកូវីដ១៩​ មកជារឿងនយោបាយទម្លាក់កំហុសដាក់គ្នាទៅវិញទៅមក។ ចិនក៏ជាជនរងគ្រោះ ក្នុងករណីខាងលើនេះដែរ៕ ប្រែសម្រួលដោយ៖MEO

from： https://tnaot.com/km/m/detail/article/9192578