កាលពីមួយរយៈមុន កីឡាករបាល់ទាត់ Marcelo របស់ក្រុមស្តេចស Real Madrid ត្រូវបានសារព័ត៌មានធំៗជាច្រើនផ្សាភ្ជាប់នឹងការផ្លាស់ទៅលេងឱ្យក្រុមសេះបង្កង់ Juventus នៅរដូវកាលក្រោយ ខណៈពេលនេះសាមីខ្លួនបានចេញមកបញ្ជាក់ថា នឹងមិនចាកចេញពីក្លិបនោះទេនៅរដូវក្តៅនេះ។

ខ្សែការពារសញ្ជាតិប្រេស៊ីលខាងលើ ហាក់មិនសូវបានចូលលេងឱ្យក្រុម Madrid នៅក្នុងរដូវកាលនេះនោះទេក្រោមការដឹកនាំរបស់លោក Zidane ជាគ្រូបង្វឹក ហើយបានធ្វើឱ្យបណ្តាព័ត៌មានជាច្រើនចុះផ្សាយអំពីរូបគេពីការចាកចេញនៅរដូវក្តៅនេះ។

យ៉ាងណាមិញ Marcelo បាននិយាយក្នុងប្រព័ន្ធ Instagram ជាមួយអតីតមិត្តរួមក្រុមរបស់ខ្លួនម្នាក់ឈ្មោះថា Fabio Cannavaro ដែលបច្ចុប្បន្នជាគ្រូបង្វឹកមួយរូបរបស់ក្លិបចិន Guangzhou Evergrande ថា៖ “ខ្ញុំមិនចង់ចាកចេញទេ ហើយខ្ញុំក៏មិនគិតថា Madrid នឹងអនុញ្ញាតិឱ្យខ្ញុំចាកចេញដែរ។ ខ្ញុំពិតជាសប្បាយរីករាយណាស់នៅទីនេះ។

ចាប់តាំងពីខ្ញុំបានមកដល់ទីនេះជាមួយក្រុមគ្រួសាររបស់ខ្ញុំ”។

ខ្សែការពារសញ្ជាតិប្រេស៊ីលរូបនេះបានបន្តទៀតថា៖ “ខ្ញុំមិនដឹងថាតើវាជាការពិតឬទេដែលថា Juve ចង់ចុះហត្ថលេខាលើខ្ញុំនោះ”។

គួរឱ្យដឹងដែរថា​ Marcelo ធ្លាប់បង្ហាញខ្លួនឱ្យ Madrid សរុបចំនួន ៥០៥ ប្រកួត ហើយបានជួយឱ្យក្រុមឈ្នះពានរង្វាន់ La Liga ចំនួន ៤ ដង និងឈ្នះពានរង្វាន់ Champions League ចំនួន ៤ ដង លើសពីនេះទៀតនៅមានពានរង្វាន់ Copa del Rey, Spanish Super Cup, UEFA Super Cup ព្រមទាំងពានរង្វាន់ FIFA Club World Cup ផងដែរ។ នេះបើយោងតាមការចុះផ្សាយរបស់គេហទំព័រ Goal៕

កែសម្រួលដោយ៖ ភារ៉ា

ប្រភព៖ Goal

from： https://tnaot.com/km/m/detail/article/9188862