Sign In 
ភ្នំពេញ៖ រោងចក្រជាង ១៣០ បានស្នើសុំព្យួរការងារ ខណៈកម្មករនិយោជិតនៅកម្ពុជាជិត ១០ម៉ឺននាក់រងផលប៉ះពាល់ អំឡុងជំងឺកូវីដ១៩។ នេះបើយោងតាមលោក ហេង សួរ អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ។
ថ្លែងនៅក្នុងសន្និសីទកាសែត ស្តីពីបច្ចុប្បន្នភាពនៃការចត្តាឡីស័កកម្មករ នារសៀលថ្ងៃទី២៧ ខែមេសានេះ លោក ហេង សួរ បានឱ្យដឹងថា គិតមកត្រឹមត្រីមាសទី២នេះ មានរោងចក្រជាង ១៣០ហើយបានស្នើសុំព្យួរការងារ ដែលនាំឱ្យមានផលប៉ះពាល់កម្មករជិត ១០ម៉ឺននាក់។ លោកបន្តទៀតថា ខាងភាគីរោងចក្រចង់បិទទ្វាររោងចក្រតែម្ដង ប៉ុន្តែដោយសារមានការពិភាក្សារកដំណោះស្រាយជាមួយរដ្ឋាភិបាល ទើបថៅកែរោងចក្រសម្រេចចិត្ត ត្រឹមព្យួរការងារកម្មករសិន ដែលវាអាចផ្ដល់អត្ថប្រយោជន៍ខ្លះដល់ពួកគេ។
លោក ហេង សួរ ក៏លើកឡើងថា មិនមែនតែកម្ពុជាទេ ដែលរងផលប៉ះពាល់ដោយសារជំងឺកូវីដ១៩ ពោលគឺបណ្ដាប្រទេសលើពិភពលោកទាំងអស់។ ដូច្នេះប្រជាពលរដ្ឋ និងកម្មករ ត្រូវរក្សាការងារឱ្យបានល្អ ដើម្បីបញ្ចៀសការបាត់បង់ ក្នុងកាលៈទេសៈដ៏លំបាកនេះ។
សូមជម្រាបថា គិតមកត្រឹមពេលនេះ មានកម្មករ កម្មការិនី ប្រមាណជិត ៦ពាន់នាក់ បានទៅធ្វើពិនិត្យសុខភាព ក្រោយត្រឡប់ពីស្រុកកំណើត អំឡុងពិធីបុណ្យចូលឆ្នាំប្រណៃជាតិខ្មែរ ស្របពេលដែលរាជរដ្ឋាភិបាល បានចេញវិធានការផ្អាកពិធីចូលឆ្នាំ ដោយតម្រូវឱ្យធ្វើការងារជាធម្មតា ប៉ុន្តែនៅតែមានកម្មករប្រមាណជាង ១ម៉ឺននាក់ត្រឡប់ទៅស្រុកកំណើតវិញ។ លោក ហេង សួរ ក៏បានបញ្ជាក់ដែរថា កម្មករដែលមកពិនិត្យសុខភាពទាំងអស់ត្រូវធ្វើចត្តាឡីស័ករយៈពេល ១៤ថ្ងៃសិន ទើបអនុញ្ញាតឱ្យត្រឡប់ចូលធ្វើការជាធម្មតាវិញ៕ ដោយ៖ តារា
