ស្ថានឯកអគ្គរាជទូតកម្ពុជា ប្រចាំសាធារណរដ្ឋសង្គមនិយមវៀតណាម បានប្រកាសឱ្យសិស្ស និស្សិត និងសិក្ខាកាម មានបំណងត្រឡប់ទៅបន្តការសិក្សា នៅប្រទេសវៀតណាម ត្រូវបន្តអនុវត្តវិធានការការពារខ្លួនពីជំងឺកូវីដ ១៩ នៅទីកន្លែងដែលមានសុវត្ថិភាពមួយរយៈ និងធ្វើការទាក់ទងជាមួយសាកលវិទ្យាល័យ ឬគ្រឹះស្ថានសិក្សា ឱ្យបានជាប់ជាប្រចាំ ដើម្បីទទួលបានព័ត៌មាន ពីនីតិវិធីនៃការបើកដំណើរការចូលសិក្សារៀនឡើងវិញ។

នៅក្នុងសេចក្តីប្រកាសព័ត៌មានរបស់ស្ថានទូតវៀតណាម ក៏​បានបញ្ជាក់ពីភាពល្អប្រសើរទាក់ទងនិងស្ថានភាពកូវីដ ១៩ នៅប្រទេសខ្លួន​ផង​ដែរ។

យោងតាមសេចក្តីប្រកាសព័ត៌មានដដែលនេះ បច្ចុប្បន្នស្ថានភាពជំងឺកូវីដ ១៩ នៅក្នុងប្រទេសវៀតណាម កំពុងស្ថិតក្រោមការគ្រប់គ្រងយ៉ាងល្អ និងមានប្រសិទ្ធភាព ដោយគិតត្រឹមល្ងាចថ្ងៃទី ២៤ ខែមេសា ឆ្នាំ២០២០ អ្នកឆ្លងជំងឺកូវីដ១៩ នៅវៀតណាម មានចំនួន ២៦៨ករណី និង​ពុំរកឃើញមានករណីឆ្លងថ្មី ៨ ថ្ងៃជាប់ៗគ្នា ហើយក្នុងចំណោម​អ្នក​ឆ្លង​ មាន ២២៤នាក់ បានព្យាបាលជាសះស្បើយ និងនៅសល់អ្នកជំងឺ ៤៤នាក់ទៀត កំពុងសម្រាកព្យាបាលនៅក្នុងមន្ទីរពេទ្យ។

ជាមួយគ្នានេះ រដ្ឋាភិបាលរៀតណាម បានសម្រេចបញ្ចប់វិធានការគម្លាតពីសង្គម (social-distancing) នៅថ្ងៃទី ២២ ខែមេសា ដែលធ្វើឱ្យស្ថានភាពសេដ្ឋកិច្ច-សង្គម ចាប់ផ្តើមដំណើរការឡើងវិញបណ្តើរៗ។ ទោះបីជាយ៉ាងនេះក្តី សាលារៀនគ្រប់កម្រិតសិក្សា រួមទាំងសាកលវិទ្យាល័យនានា នឹងអាចចាប់បើកដំណើរការឡើងវិញ នាពេលខាងមុខនេះ៕ ដោយ៖ ឃួន​ លក្ខិណា

from： https://tnaot.com/km/m/detail/article/9171252