នៅថ្ងៃទី​២៧ ខែមេសា ឆ្នាំ២០២០ ប្រភពព័ត៌មានបាងកកប៉ុស្តិ៍បានផ្សាយថា មជ្ឈមណ្ឌល​​រដ្ឋបាលដោះស្រាយស្ថានភាព​កូវីដ១៩ (CCSA)របស់ប្រទេសថៃ បានសម្រេចប្រកាស​ពន្យារពេល​បន្ថែមទៀត ​ការអនុវត្តក្រឹត្យ​ដាក់ប្រទេសស្ថិតក្នុងគ្រាអាសន្ន​ ខណៈដែល​ក្រឹត្យនេះ ជិតអស់សុពលភាពនៅ​ថ្ងៃទី៣០ ខែមេសា ឆ្នាំ២០២០ ។  

រហូតមកដល់ថ្ងៃទី​២៧ ខែមេសា ឆ្នាំ២០២០ នៅប្រទេសថៃ មានអ្នកឆ្លងវីរុសកូវីដ ១៩ សរុប ចំនួន ២​ ៩៣១ នាក់ ក្នុងនោះបាត់បង់ជីវិត ៥២នាក់ និង ២ ៦០៩ នាក់បានជាសះស្បើយ ។ នេះបើតាមប្រភព wikipedia ។ 

លោក Taweesilp Visanuyothin អ្នកនាំពាក្យរបស់ CCSA បានថ្លែងកាលពីថ្ងៃទី​២៧ ខែមេសា ថា ក្រឹត្យ​គ្រាអាសន្ននេះ បន្តអនុវត្ត​រហូតដល់ដំណាច់ខែ​ឧសភា ឆ្នាំ២០២០ ។ 

ហេតុផល​​នៅក្នុងការពន្យារពេល​នេះ ដោយសារតែមានការពាក់ព័ន្ធ​ជាមួយការវិលត្រឡប់​របស់វីរុសកូវីដ១៩ ហើយមជ្ឈមណ្ឌល CCSA បាននិងកំពុង​ប្រយុទ្ធប្រឆាំង​ដើម្បីបញ្ឈប់​ការឆ្លងរាតត្បាត​កុំឲ្យធ្ងន់ធ្ងរបន្ថែមទៀត ។ 

គួរបញ្ជាក់ថា ក្រឹត្យគ្រាអាសន្ននេះ បានន័យថា គឺជាការដាក់បម្រាមគោចរ​ចាប់ពីម៉ោង​១០យប់ រហូតដល់ម៉ោង​៤ទៀបភ្លឺ គឺនៅតែបន្តអនុវត្តដដែល ។ គ្មានការប្រមូលផ្តុំសង្គម​ត្រូវបានអនុញ្ញាត ហើយនិងការ​កម្រិតទៅលើការធ្វើដំណើរ​ផ្សេងដទៃថែមទៀត ។  

អ្នកនាំពាក្យTaweesilpបានបញ្ជាក់ថា ក្រោយកិច្ចប្រជុំ​ដែល​លោកនាយករដ្ឋមន្ត្រី ប្រាយុទ្ធ ចាន់អូចា ធ្វើជាអធិបតីនោះ ភាគី​ទាំងអស់​ក៏បានពិភាក្សា​អំពីផលប៉ះពាល់​បណ្តាលមកពីការអនុវត្ត​ក្រឹត្យ​គ្រាអាសន្ននេះផងដែរ ។ 

ក្រុមប្រឹក្សាសន្តិសុខជាតិ​របស់ប្រទេសថៃ​ បានថ្លែងនៅក្នុងកិច្ចប្រជុំនោះថា តាមការស្ទង់មតិ​សាធារណៈ ការ​បន្ថែមអនុវត្ត​ក្រឹត្យគ្រាអាសន្ននេះ គឺនៅតែបន្តទៅមុខទៀត ៕ ប្រែសម្រួលដោយ៖ thachyat

from： https://tnaot.com/km/m/detail/article/9171083