Sign In 
កូរ៉ូណាវីរុសប្រភេទថ្មី ឬកូវីដ១៩ (COVID-19) មកទល់នឹងថ្ងៃទី២៧ ខែមេសា ឆ្នាំ២០២០ បានឆ្លងនៅពាសពេញពិភពលោកជិត៣លាននាក់ទៅហើយ ខណៈដែលក្នុងចំណោមនោះជិត៩សែននាក់ប៉ុណ្ណោះ បានជាសះស្បើយ ។ 
តាមការចេញផ្សាយរបស់ប្រភពព័ត៌មាន worldometers បញ្ជាក់ថា ករណីវីរុសនេះ ឆ្លងលើមនុស្សសរុប ២ ៩៩២ ១៥៧ នាក់ ហើយក្នុងចំណោមនោះ ៨៧៧ ១៣១ នាក់បានជាសះស្បើយ និង ២០៦ ៨៧៣ នាក់ បានបាត់បង់ជីវិត ។
ស្រដៀងគ្នានេះផងដែរ ប្រភព wikipedia បានផ្សាយថា វីរុសកូវីដ១៩ ឆ្លងរាលដាលទៅលើដែនដី និងប្រទេសសរុប២២៥ ជុំវិញពិភពលោក ។ ឆ្លងលើមនុស្សសរុប ២ ៩៦៥ ៣៦៣ នាក់ ក្នុងនោះ បាត់បង់ជីវិត ២០៦ ២៦៥ នាក់ និង ៨៦៣ ៤៦៤ នាក់ បានជាសះស្បើយ ។ 
ប្រទេសដែលរងគ្រោះខ្លាំងជាងគេក្នុងនោះ គឺសហរដ្ឋអាមេរិក, អេស្ប៉ាញ, អ៊ីតាលី, អាល្លឺម៉ង់, ចក្រភពអង់គ្លេស, បារាំង និងតួកគី…។
គួរជម្រាបជូនថា វីរុសកូវីដ១៩ ផ្ទុះឡើងដំបូងគេនៅក្នុងខែធ្នូ ឆ្នាំ២០១៩ ស្ថិតនៅក្នុងទីក្រុងវូហាន ខេត្តហ៊ូប៉ី ភាគកណ្តាលរបស់ប្រទេសចិន ។ 
នៅក្នុងទឹកដីចិន ទីដែលវីរុសបានកើតឡើងដំបូងគេ មានអ្នកឆ្លងសរុប ៨២ ៨២៧ នាក់ ក្នុងនោះបាត់បង់ជីវិត ៤ ៦៣២ នាក់ និង ៧៧ ៣៤៦ នាក់ បានជាសះស្បើយ ។
សូមបញ្ជាក់ថា អង្គការសុខភាពពិភពលោកបានប្រកាសថា វីរុសនេះនៅមិនទាន់រកឃើញថ្នាំព្យាបាល ឬវ៉ាក់សាំងបង្ការជាក់លាក់នៅឡើយទេ ៕ ប្រែសម្រួលដោយ៖ thach yat
