ក្លិបមេឃខៀវ Manchester City ត្រូវបានរាយការណ៍មកថា កំពុងចង់បានខ្សែការពារជួរមុខរបស់ក្លិបសេះបង្កង់ Juventus គឺកីឡាករ Leonardo Bonucci នៅពេលទីផ្សារដោះដូរកីឡាករបើកទ្វាខាងមុខ ។

ក្រុមម្ចាស់ជើងឯកក្របខ័ណ្ឌ Premier League ឆ្នាំមុន កំពុងតែត្រូវការខ្សែការពារបន្ថែម ក្រោមការដឹកនាំរបស់ លោក Pep Guardiola ដោយលោកបានដាក់គោលដៅនាំយកខ្សែការពារដូចជា កីឡាករ Dayot Upamecano ពីក្លិប RB Leipzig, Milan Skriniar ពីក្លិប Inter និង Kalidou Koulibaly ពីក្លិប Napoli ខណៈពេលដែល Bonucci ជាបេក្ខភាពនាំមុខគេ ក្នុងការនាំចូលនៅរដូវក្តៅនេះ។

លោក Guardiola កំពុងត្រៀមពង្រឹងនៅផ្នែកតំបន់ការពារបន្ថែម នៅខណៈពេលដែលខ្សែការពាររបស់ពួកគេចំនួនពីររូបគឺ កីឡាករ Aymeric Laporte និង Nicolas Otamendi អាចនឹងចាកចេញនៅពេលខាងមុខ ស្របពេលដែលមានក្លិបធំៗនៅអឺរ៉ុបចង់បាន។

យ៉ាងណាមិញបើតាមគេហទំព័រ Goal បានចុះផ្សាយឱ្យដឹងថា លោក Pep គ្រូបង្វឹករបស់ក្រុម Man City មានបំណងចង់លួងលោមខ្សែការពារ Bonucci ឱ្យផ្លាស់ទៅលេងនៅកីឡដ្ឋាន Etihad នារដូវក្តៅនេះ ប៉ុន្តែ Juventus មិនមានបំណងលក់កីឡាករណាមួយរបស់ពួកគេចេញនោះទេនៅពេលខាងមុខ។

គួរឱ្យដឹងដែរថា Bonucci គឺជាកីឡាករចាស់វស្សាម្នាក់របស់ Juventus ដោយរូបគេបានលេងនៅទឹកដី Turin អស់រយៈពេល ជាង ១០ឆ្នាំ បន្ទាប់មកបានផ្លាស់ទៅចូលរួមជាមួយ AC Milan មួយរដូវកាល នៅឆ្នាំ២០១៧ ហើយក្រោយមករូបគេបានវិលត្រឡប់មកកាន់ក្លិបចាស់វិញ ដោយបានចុះកុងត្រារយៈពេល ៥ឆ្នាំ បន្ថែមទៀត៕

កែសម្រួលដោយ៖ ភារ៉ា

ប្រភព៖ Goal

from： https://tnaot.com/km/m/detail/article/9169135