នាយករដ្ឋមន្ត្រីអង់គ្លេស លោក Boris Johnson នឹងវិលត្រឡប់ទៅធ្វើការវិញ នៅថ្ងៃទី២៧ ខែមេសា ក្រោយសម្រាកព្យាបាលជំងឺកូវីដ១៩ រយៈពេលមួយខែ។

បើតាមសារព័ត៌មាន  The Telegraph របស់អង់គ្លេស​ បានផ្សាយ នៅថ្ងៃទី​២៤ ខែមេសា​ ថា នាយករដ្ឋមន្ត្រី​ Boris Johnson មានសុខភាពល្អប្រសើរឡើងវិញហើយ។  រហូតមកដល់​ពេលនេះ លោកបានបញ្ជាឲ្យជំនួយការរបស់លោក រៀបចំកិច្ចប្រជុំ ជាមួយបណ្តារដ្ឋមន្ត្រី នៅថ្ងៃទី២៧ ខែមេសា​។

លោក Boris Johnson បានផ្អាកពីការងារ នៅថ្ងៃទី​២៦ ខែមីនា ក្រោយពេលលោកត្រូវធ្វើតេស្ដ រកឃើញឆ្លងកូវីដ១៩ ហើយត្រូវកាត់ផ្តាច់នៅក្នុងផ្ទះ ធ្វើការពីចម្ងាយ។ ប៉ុន្ដែនៅដើមខែមេសា ដោយសារតែស្ថានភាពជំងឺរបស់លោក កាន់តែអាក្រក់ទៅ ទើបលោកត្រូវគេបញ្ជូន​ទៅកាន់​មន្ទីរពេទ្យ ដើម្បីព្យាបាល។ ក្រោយពេលព្យាបាល នៅក្នុងមន្ទីរពេទ្យ រយៈពេល​១សប្តាហ៍នោះ​មក ស្ថានភាពជំងឺរបស់លោក ក៏វិលមករកភាពល្អប្រសើរឡើង​វិញ ហើយបានចាកចេញ​ពីមន្ទីរពេទ្យ ដើម្បីបន្តថែទាំសុខភាព នៅក្នុងផ្ទះរបស់លោក។

លោក Boris Johnson វិលត្រឡប់ទៅធ្វើការវិញ គឺជារឿងសំខាន់បំផុត សម្រាប់សង្គ្រាម​ប្រឆាំង​នឹង​វីរុសកូវីដ១៩ ដោយបច្ចុប្បន្នអង់គ្លេស ជាប្រទេសដែលមានចំនួនអ្នកឆ្លង និងស្លាប់ច្រើន​ជាង​គេបំផុត ក្នុងមួយថ្ងៃៗ នៅតំបន់អឺរ៉ុប​។

តើនាយករដ្ឋមន្ត្រីអង់គ្លេសទទួលបានការព្យាបាល ពិសេសបែបណាទើបឆាប់ជាសះស្បើយពី​កូវីដ១៩? ពលរដ្ឋអង់គ្លេសជាច្រើន បានចោទសួរថា តើមានការព្យាបាលពិសេសអ្វី ទើបលោក Boris Johnson ឆាប់ជាសះស្បើយ? ចំណែកពលរដ្ឋ​ផ្សេងទៀត ម្តេចមិនទទួលបានការថែទាំង ពិសេសបែបនោះ?

ចំពោះ​បញ្ហាទាំងនោះ គិលានុបដ្ឋាយិកាអង់គ្លេសម្នាក់ បានលើកឡើងថា​ «យើងបានប្រឹងប្រែង​មើលថែទាំលោក បូរីស ចនសុន ដូចជា អ្នកជំងឺដទៃៗទៀត ដោយលោកមិនបាន​ទទួលការថែ​ទាំ​អ្វីពិសេសឡើយ»។

សារព័ត៌មាន BBC នៅល្ងាច ថ្ងៃព្រហស្បតិ៍ ទី២៣ ខែមេសា បានផ្សាយថា នាយករដ្ឋ​មន្ត្រី​អង់គ្លេស លោក Boris Johnson គ្រាន់តែជាអ្នកជំងឺម្នាក់ ដែល​យើងបានប្រឹងប្រែង​ព្យាបាល​ឱ្យជាសះស្បើយពី COVID-19 ឡើងវិញ ដូចអ្នកជំងឺធម្មតាដទៃ​តែប៉ុណ្ណោះ៕ ប្រែ​សម្រួល​ដោយ៖ ​MEO

from： https://tnaot.com/km/m/detail/article/9160412