កម្មវិធីស្បៀងអាហារ​ពិភពលោក (WFP) បានព្រមានថា កូវីដ១៩ កំពុងតែធ្វើឲ្យ មនុស្ស​ត្រូវ​បាត់​​បង់ស្បៀងអាហារ កើនឡើងដល់ទៅទ្វេដង។ កាលពីឆ្នាំ​២០១៩ ពលរដ្ឋ​១៣៥លាននាក់ កង្វះខាតស្បៀងអាហារ ហើយនៅឆ្នំា​២០២០នេះ នឹងកើនឡើងដល់ទៅ​២៦៥លាននាក់។ កូវីដ១៩បានធ្វើឲ្យប៉ះពាល់ដល់ប្រភពផ្គត់ផ្គង់ស្បៀងអាហារ នៅលើពិភពលោក។

បើតាមការលើកឡើងរបស់​ WFP ​កង្វះស្បៀងអាហារ បានធ្វើឲ្យជីវភាពរស់នៅ និងសេដ្ឋកិច្ច របស់មនុស្សជួបគ្រោះថ្នាក់ភ្លាមៗ។ ​អ្នកជំនាញរបស់ ​WFP លោក​ Arif Husain ​បានបញ្ជាក់ថា កូវីដ១៩នឹងបង្កឲ្យពលរដ្ឋ​រាប់សិបលាននាក់ ប្រឈមនឹងកង្វះស្បៀងអាហារខ្លាំងបំផុត។​ លោកបញ្ជាក់ទៀតថា សហគមន៍អន្តរជាតិ ចាំបាច់ត្រូវតែ​ធ្វើសកម្មភាពជាបន្ទាន់ ទប់ស្កាត់​ផលប៉ះពាល់ខ្លាំងដល់សេដ្ឋកិច្ច បង្កឡើងដោយកូវីដ១៩។

នៅក្នុងរបាយការណ៍ស្តីពី វិបត្តិស្បៀងអាហារលើពិភពលោក របស់​WFP ​ នៅក្នុងឆ្នាំ​២០១៩ មានពលរដ្ឋ​៧៧លាននាក់​ ប្រឈមនឹងកង្វះស្បៀងអាហារ ក្នុងនោះមាន​៣៤លាននាក់​បង្ក​ឡើង​ដោយបម្រែបម្រួលអាកាសធាតុ ​និង​២៤លាននាក់ ពាក់ព័ន្ធនឹងការធ្លាក់ចុះសេដ្ឋកិច្ច។

បើតាមរបាយការណ៍ នៅក្នុងឆ្នាំ​២០១៩ មានពលរដ្ឋ​១៣៥លាននាក់ នៅ​៥៥ប្រទេស និងដែនដី​ប្រឈមនឹងបញ្ហាសន្តិសុខស្បៀងអាហារ ​ក្នុងនោះមាន​កុមារ៧៥លាននាក់ កង្វះអាហារូបត្ថម្ភ។ ក្នុងចំណោមនោះ មានពាក់កណ្តាល ស្ថិតនៅទ្វីបអាហ្រិក។

ជាមួយគ្នានេះដែរ អគ្គនាយកអង្គការស្បៀងអាហារ និងកាសិកម្មអន្តរជាតិ​ FAO លោក Dongyu​ បានបញ្ជាក់ថា​ សហគមន៍អន្តរជាតិ ចាំបាច់ត្រូវតែមានវិធានាការ​ដើម្បីជួយឲ្យ​មនុស្ស​រាប់សិបលាននាក់ រួចផុតពីបញ្ហាសន្តិសុខស្បៀងអាហារ​៕ ប្រែ​សម្រួល​ដោយ៖ MEO

from： https://tnaot.com/km/m/detail/article/9158276