Sign In 
កន្លងមក ប្រធានាធិបតីអាមេរិក លោក ដូណាល់ ត្រាំ ធ្លាប់បានសរសើរដល់ចិន ពីវិធានការទប់ស្កាត់ការឆ្លងរាលដាលកូវីដ១៩បានយ៉ាងល្អបំផុត។ ការសរសើររបស់លោកត្រាំ មិនត្រឹម តែមួយលើក ឬពីរលើកនោះឡើយ គឺរហូតដល់ទៅ៣៧លើក។ ប៉ុន្តែនៅពេលនេះ អាមេរិក ទប់ស្កាត់មិនបានល្អ បែរជាចោទប្រកាន់ចិនថា មិនមានតម្លាភាពក្នុងការទប់ស្កាត់កូវីដ១៩។
នៅពេលនេះ ចំនួនអ្នកស្លាប់ នៅលើពិភពលោក បានកើនឡើងខ្ពស់ ជាពិសេស គឺអាមេរិក បានធ្វើឲ្យប្រធានាធិបតី ដូណាល់ ត្រាំ វាយប្រហារទៅលើអង្គការសុខភាពពិភពលោក ថា លំម្អៀងទៅរកប្រទេសចិន។ ទាំងនោះហើយបានជាលោកត្រាំ បញ្ឈប់ផ្ដល់ជំនួយដល់WHO។
សារព័ត៌មាន CNN បានផ្សាយថា ប្រធានាធិបតី ដូណាល់ ត្រាំ ធ្លាប់បានសរសើរដល់ចិន ដល់ទៅ៣៧លើក ពីវិធីសាស្ត្រទប់ស្កាត់បានយ៉ាងល្អបំផុត។ មិនតែប៉ុណ្ណោះ លោកត្រាំ បានសរសើរដល់ប្រធានាធិបតីចិន ស៊ី ជីនពីង ថាមានតម្លាភាពក្នុងការទប់ស្កាត់កូវីដ១៩។តាមសារព័ត៌មាន CNN ចាប់តាំងពីខែមករា ឆ្នាំ២០២០មក លោក ត្រាំ បានសរសើរ ចិនដល់ទៅ៣៧លើក ហើយការសរសើរចុងក្រោយបំផុត គឺនៅថ្ងៃទី១ ខែមេសា ។
បើតាមតួលេខរបស់ CNN នៅក្នុងខែមករា លោក ត្រាំ សរសើរចិន ចំនួន៩លើក ក្នុងខែកុម្ភៈ សរសេរចិន ចំនួន១៥លើក នៅក្នុងខែមីនា មាន១២លើក និង ខែមេសា មានតែ១លើកគត់ នៅដើមខែតែម្តង ពេលអាមេរិកមិនទាន់មានអ្នកស្លាប់ច្រើន។ ប៉ុន្តែនៅពេលនេះ អ្វីគ្រប់យ៉ាងបានប្រែប្រួលទាំងស្រុង ដោយលោក ត្រាំ ឈប់សរសើរ បែរជាចោទប្រកាន់ចិនទៅវិញ៕ប្រែសម្រួល ដោយ Nuon
