យន្តហោះទម្លាក់គ្រាប់បែក  B-1B Lancer កាលពីថ្ងៃទី២២ ខែមេសា ឆ្នាំ២០២០ បានហោះហើរ​ពីទ្វីប​អាមេរិក​ ឆ្ពោះទៅកាន់​ជប៉ុន ហើយការហោះហើរ​សមយុទ្ធនោះ អមដំណើរ​ដោយ​យន្ត​ហោះ​​ចម្បាំងជប៉ុន ​ចំនួន​១៥​គ្រឿងថែមទៀត ដើម្បីបង្ហាញ​​ពីឥទ្ធិពល​របស់​កម្លាំងជើង​អាកាស។  

តាមការចេញផ្សាយ​របស់ប្រភពព័ត៌មាន stripes​ កាលពីថ្ងៃទី២២ ខែមេសា បានបញ្ជាក់ថា យន្តហោះទម្លាក់គ្រាប់បែក B-1B Lancer មួយគ្រឿង​របស់អាមេរិក បាន​ហោះហើរ ​រយៈពេល​៣០ម៉ោង ចេញពីមូលដ្ឋានទ័ពអាកាស Ellsworth Air Force ស្ថិតនៅក្នុងរដ្ឋ​ South Dakota សហរដ្ឋអាមេរិក ទៅកាន់​មូលដ្ឋានកងទ័ពជើងអាកាស Misawa នៅប្រទេសជប៉ុន ដោយជួប​ជាមួយយន្តហោះចម្បាំងកងកម្លាំងស្វ័យការពារជប៉ុន F-2s និង F-15 ចំនួន ៨ គ្រឿង ។

ក្រុមយន្តហោះចម្បាំងទាំងនោះ ក៏មានការចូលរួម​ពីយន្តហោះចម្បាំង F-16 Fighting Falcons នៅមូលដ្ឋាន​ជើងអាកាស Misawa ចំនួន​៦គ្រឿង​បន្ថែមទៀត ។ 

សេចក្តីថ្លែងការណ៍​បានបញ្ជាក់ទៀតថា អាកាស​យានិក​ទាំង​នោះ​ ទទួលការហ្វឹកហាត់​ហោះ​ហើរ​​នៅពីលើតំបន់ Draughon Range ជិតមូលដ្ឋានជើងអាកាសជប៉ុន Misawa ដែលជាផ្នែក​មួយ​របស់បញ្ជាការសហភាពឥណ្ឌូ – ប៉ាស៊ីហ្វិកអាមេរិក និងកងកម្លាំងយុទ្ធសាស្ត្រ​បំផ្ទុះគ្រាប់បែករួមគ្នាផងដែរ ។

កាលពីសប្តាហ៍មុន យន្តហោះទម្លាក់គ្រាប់បែក B-52H ចំនួន៥គ្រឿង បានហោះចេញពីកោះ ហ្គាំ (Guam) ទៅកាន់ មូលដ្ឋានរបស់ពួកគេ ស្ថិតនៅក្នុងបន្ទាយកងទ័ពជើងអាកាស Minot រដ្ឋ North Dakota សហរដ្ឋអាមេរិក ក្រោយបញ្ចប់ការបម្លាស់ទីយន្តហោះទម្លាក់គ្រាប់បែក របស់​កងទ័ពអាកាស ដែលបានកើតឡើងតាំងពីឆ្នាំ ២០០៤មកនោះ ។

សេចក្តីប្រកាសព័ត៌មានបានបន្តថា “ គំរូប្រកបដោយភាពស្វាហាប់” ថ្មីរបស់កងទ័ពជើងអាកាស គឺផ្តោតលើគោលដៅយុទ្ធសាស្ត្រការពារជាតិរបស់សហរដ្ឋអាមេរិក “ ការព្យាករណ៍ជា​យុទ្ធសាស្ត្រ និងប្រតិបត្តិការ ដែលមិនអាចប៉ាន់ស្មានបាន” ៕ ប្រែសម្រួលដោយ៖ thach yat

from： https://tnaot.com/km/m/detail/article/9157874