Sign In 
ដោយសារភ័យខ្លាចក្រុមជនអន្តោប្រវេសន៍ចូលទៅកាន់ទឹកដីអាមេរិក ហើយដណ្តើមការងារធ្វើអស់ គ្មានការងារសម្រាប់ពលរដ្ឋអាមេរិក ដែលជាម្ចាស់ស្រុកនោះ មេដឹកនាំរបស់ប្រទេសនេះបានគិតគូរដោះស្រាយ ដោយចេញបទបញ្ជាប្រតិបត្តិរារាំងជនអន្តោប្រវេសន៍ មិនឲ្យចូលទឹកដីអាមេរិក រយៈពេល៦០ថ្ងៃ ។ គេបានចាត់ទុកថា ជនអន្តោប្រវេសន៍ គឺជាហានិភ័យសម្រាប់ទីផ្សារការងារ នៅអាមេរិក ក្រោយវីរុសកូវីដ១៩ធូរស្រាល ហើយសេដ្ឋកិច្ចចាប់ផ្តើមដំណើរការឡើងវិញនោះ។
ប្រធានាធិបតីអាមេរិក លោក ដូណាល់ ត្រាំ បានថ្លែងប្រាប់អ្នកកាសែត កាលពីល្ងាច ថ្ងៃទី២២ ខែមេសា ឆ្នាំ២០២០ថា លោកបានចុះហត្ថលេខាលើបទបញ្ជាប្រតិបត្តិ ប្រកាសពីពេលមុននេះ ដែលថា នឹងផ្អាកជាបណ្តោះអាសន្ន រយ:ពេល៦០ថ្ងៃ មិនឲ្យជនអន្តោប្រវេសន៍ចូលមកលើទឹកដីអាមេរិក ។ 
«គោលបំណងគឺ ការពារពលករអាមេរិកដ៏អស្ចារ្យរបស់យើង ។ ធានាដល់ពលរដ្ឋអាមេរិក ដែលអត់ការងារធ្វើនោះ ឲ្យបានការងារធ្វើគ្រប់ទម្រង់ និងមុនគេទាំងអស់» ។ លោក ដូណាល់ ត្រាំ ត្រូវបានដកស្រង់ប្រសាសន៍ ចុះផ្សាយដូច្នេះ ក្រោយធ្វើសង្ខេបសន្និសីទព័ត៌មាននៅសេតវិមានជាមួយកងកម្លាំងប្រឆាំងកូវីដ១៩។ 
ការិយាល័យលេខាធិការព័ត៌មានសេតវិមាន កាលពីពេលថ្មីៗនេះ បានចេញប្រកាសមួយរបស់លោកប្រធានាធិបតីត្រាំ ស្តីពីការរារាំងជាបណ្តោះអាសន្នជនអន្តោប្រវេសន៍ចូលមកកាន់ទឹកដីអាមេរិក ។ លេខាធិការព័ត៌មាន បានអះអាងថា ជនភៀសខ្លួនទាំងឡាយនោះ «ជាហានិភ័យមួយដល់ទីផ្សារការងារសហរដ្ឋអាមេរិក នៅក្នុងអំឡុងពេលដែលសេដ្ឋកិច្ចមានការងើបឡើងវិញ ក្រោយការឆ្លងរាតត្បាតវីរុសកូវីដ១៩ ត្រូវបានធូរស្រាល» ៕ ប្រែសម្រួលដោយ៖ thach yat
