Sign In 
ផលប៉ះពាល់មកលើវិស័យទេសចរណ៍មួយរយៈចុងក្រោយនេះ នាំឲ្យពលរដ្ឋជាច្រើន ដែលពឹងផ្អែកលើវិស័យសេដ្ឋកិច្ចក្រៅប្រព័ន្ធ ត្រូវប្រឈមមុខខ្លាំង ដោយមុខរបរមួយចំនួនក្នុងវិស័យនេះ កំពុងរងប៉ះពាល់ទាំងប្រយោល និងធ្ងន់ធ្ងរ ដោយសារចំណូលប្រចាំថ្ងៃរបស់ពួកគាត់ត្រូវធ្លាក់ចុះ ក៏ជាហានិភ័យនាំឲ្យកើតមានជាវិបត្តិសេដ្ឋកិច្ចក្នុងគ្រួសារផងដែរ។
ក្រឡេកទៅមើលអ៊ំៗចាស់ៗ ដែលពឹងផ្អែកលើប្រកបរបរធាក់ស៊ីក្លូ នៅរាជធានីភ្នំពេញ ភាពស្ងប់ស្ងាត់នៅក្នុងវិស័យទេសចរណ៍កម្ពុជា កំពុងបង្កើននូវបន្ទុកទ្វេដង ស្របពេលចំណូលធ្លាប់ទទួលបានភាគច្រើនពីភ្ញៀវបរទេសដែលមកកម្សាន្តនៅភ្នំពេញ លំហែកាយាដោយការជិះស៊ីក្លូនោះ ត្រូវបាត់បង់ទាំងស្រុងនៅពេលនេះ ខណៈចំណូលមួយផ្នែកទៀត ពីពលរដ្ឋខ្មែរ និយមជិះស៊ីក្លូជិតៗ ទៅណេះទៅណោះ ក៏បាត់បង់ដោយសារតែការភ័យខ្លាចពីវិរុសកូវីដ ១៩ ដូចគ្នា។
គិតមកដល់ពេលនេះ ស៊ីក្លូជាច្រើនគ្រឿង ត្រូវបញ្ឈរទុកចោលនៅខាងមុខទីស្នាក់ការ សមាគមអភិរក្សស៊ីក្លូ និងមុខរបរក្រៅប្រព័ន្ធ ដែលរូបភាពនេះអាចបញ្ជាក់បានថា ស៊ីក្លូត្រូវបានផ្អាកដំណើរការដឹកភ្ញៀវទេសចរណ៍ បណ្តោះអាសន្ន ក្នុងអំឡុងពេលមានការផ្ទុះឡើងនូវជំងឺកូវីដ១៩។
ជាមួយគ្នានេះ អ្នកប្រកបរបរធាក់ស៊ីក្លូស្ទើរតែ ៩០% ត្រូវគេអះអាងបានត្រឡប់ទៅស្រុកកំណើតវិញ ដោយបោះបង់ចោលមុខរបរធាក់ស៊ីក្លូនៅភ្នំពេញ ងាកមកចាប់យកអាជីពធ្វើស្រែចំការ នៅឯស្រុកកំណើត។ នេះបើតាមលោក អ៊ឹម សម្បត្តិ ប្រធានសមាគមអភិរក្សស៊ីក្លូ និងមុខរបរក្រៅប្រព័ន្ធ។
ប្រធានសមាគមរូបនេះ បានឱ្យដឹងថា ១០០% នៃអ្នកធាក់ស៊ីក្លូ គឺរំពឹងទៅលើមុខរបរដឹកភ្ញៀវទេសចរ ហើយសមាគម អាចដំណើរការទៅបាន ក៏រំពឹងទៅលើភាគរយពីភ្ញៀវទេសចរណ៍នេះដូចគ្នា។
លោកបន្តថា ស្ថានភាពរាលដាលជំងឺកូវីដ បានធ្វើអ្នកធាក់ស៊ីក្លូទទួលរងផលប៉ះពាល់មុនគេ ដោយគិតចាប់ពីខែមីនា រហូតមកដល់ពេលនេះ ដែលមានន័យថា គឺពួកគេត្រូវបាត់ភ្ញៀវទេសចរណ៍ និងចំណូលទាំងស្រុង។
ដោយសារស្ថានភាពនេះ មិនទាន់មានដំណោះស្រាយនៅឡើយ ប្រធានសមាគមរូបនេះ បានបញ្ជាក់ថា កំពុងត្រៀមផ្លាស់ប្តូរទីស្នាក់ការរបស់ខ្លួន ទៅកាន់ទីកន្លែងថ្មី ដែលមានតម្លៃជួលផ្ទះថោកជាងនេះ ដោយសារចំណូលសម្រាប់ផ្គត់ផ្គង់ដំណើរការសមាគមត្រូវបាត់បង់មួយផ្នែកធំដូចគ្នា។
ទន្ទឹមនឹងនេះ លោកអ៊ឹម សម្បត្តិ បើទោះជាសមាគមជួបផលវិបាកក៏ពិតមែន ប៉ុន្តែលោកអះអាងមិនបោះបង់ចោលសមាជិកអ្នកធាក់ស៊ីក្លូចាស់ៗ ទាំងអំឡុងពេលពួកគាត់ត្រូវការជំនួយបំផុតនោះឡើយ ដោយលោកបានស្វះស្វែងរកជំនួយពីក្រុមសប្បុរសជន ដើម្បីជួយឧបត្ថម្ភដល់ក្រុមអ្នកធាក់ស៊ីក្លូចាស់អាចផ្គត់ផ្គង់ជីវិតជាបណ្តោះអាសន្នបាន។
អ៊ំប្រុស លឹម ហេង បើទោះជាវ័យ ៦៣ឆ្នាំទៅហើយនោះ ក៏អ៊ំនៅតែប្រកបមុខរបរធាក់ស៊ីក្លូ និងជាសមាជិក សមាគមអភិរក្សស៊ីក្លូ បានថ្លែងប្រាប់ TNAOT APP ថា អ៊ំបានទទួលអំណោយឧបត្ថម្ភមានជា ថវិកា អង្ករ មី ទឹកត្រី ត្រីខកំប៉ុង គឺបានជាហូរហែរ ពីសមាគម ឬសប្បុរសជន។ យ៉ាងណាស់ អ៊ំប្រុសបញ្ជាក់ទាំងអារម្មណ៍ក្តុកក្តួលថា អំណោយទាំងនេះ អ៊ំមិនហ៊ានប្រើប្រាស់ទេ ទុកផ្ញើទៅឱ្យក្រុមគ្រួសារកំពុងរស់នៅឯស្រុកកំណើត ព្រោះបារម្ភខ្លាចពួកគេមិនមានអីញ៉ាំ។
អ៊ំប្រុសបង្ហើបទៀតថា មុនពេលកូវីដឆ្លងចូលស្រុកខ្មែរ មួយថ្ងៃអ៊ំ រកចំណូលពីការធាក់ស៊ីក្លូ បានពី ៤-៥ ម៉ឺនរៀល ព្រមទាំងមានបន្ថែមលុយក្រៅពីភ្ញៀវទៀត ទើបគាត់អាចរួចថ្លៃអាហារប្រចាំថ្ងៃ នឹងសល់ខ្វះផ្ញើទៅប្រពន្ធកូននៅឯស្រុក។ ប៉ុន្តែសម្រាប់ពេលនេះ រកតែលុយ ១រៀល ក៏គ្មានផង ដោយសារតែរកលុយមិនបានយ៉ាងដូច្នេះ ទើបលោកសម្រេចចិត្តកាត់បន្ថយការចំណាយលើថ្លៃអាហារខ្លះ ថ្លៃផឹកកាហ្វេ និងថ្លៃនំចំណីជាដើម។
យ៉ាងណាមិញ អ៊ំប្រុស លឹម ហេង បានសម្រេចចិត្ត មិនទៅស្រុកកំណើតទេ ព្រោះអ៊ំគ្មានដីស្រែធ្វើដូចគេ ដូច្នេះទ្រាំនៅធាក់ស៊ីក្លូនៅក្រុងភ្នំពេញតទៅទៀត ដើម្បីបានចំណូលបន្តិចបន្តួចគ្រាន់ញ៉ាំបាយ។
សូមបញ្ជាក់ថា ស៊ីក្លូនៅភ្នំពេញមានប្រមាណជាង ២០០ស៊ីក្លូ ក្នុងនោះស៊ីក្លូ ជាសមាជិករបស់សមាគមអភិរក្សស៊ីក្លូ និងមុខរបរក្រៅប្រព័ន្ធ មានចំនួន១០០នាក់។
ក្រឡេកទៅមើលស្ថានភាពភ្ញៀវទេសចរមកលេងកម្ពុជា មុនពេលផ្ទុះជំងឺកូវីដ ១៩ ឯណេញវិញ ក្នុងមួយឆ្នាំ គឺមាន ៦ ខែទៅហើយ ដែលសម្បូរភ្ញៀវទេសចរ ពោលសម្បូរបំផុត គឺនៅចុងឆ្នាំ និងដើមឆ្នាំ ជារដូវកាលលំហែកាយ។ ជាក់ស្តែង ៩៩% នៃភ្ញៀវជនជាតិអឺរ៉ុប ចូលចិត្តធ្វើដំណើរកម្សាន្តតាមរយៈការជិះស៊ីក្លូច្រើនជាងគេ ដូចជាជនជាតិ អ៊ីតាលី អាឡឺម៉ង់ បារាំង អាមេរិក អូស្រ្តាលី អង់គ្លេស ទួកគី។ល។ ដោយឡែកសម្រាប់ជនជាតិអាស៊ីដែលនិយមមកជិះស៊ីក្លូរំហែកាយច្រើនជាង មានជនជាតិចិន រៀតណាម និងថៃ។ នេះបើតាមលោកអ៊ឹម សម្បត្តិ ប្រធានសមាគមអភិរក្សស៊ីក្លូ និងមុខរបរក្រៅប្រព័ន្ធ៕ ដោយ៖ ឃួន លក្ខិណា
