ម៉ាស​សរុប​ ១០ម៉ឺន​បន្ទះ រួម​ជាមួយ​ថវិកា​ជំនួយ​សរុប ២០ម៉ឺនដុល្លារ​អាមេរិក ត្រូវបាន​ក្រុមហ៊ុន ក្រុមហ៊ុន កាស៊ីណូ ហ្គោលឌិន ឡាយអិន អេនធើធេនម៉ិន (Golden Lion Entertainment) យក​ទៅ​ប្រគល់​ជូន​អគ្គ​ស្នង​ការ​នគរបាល​ជាតិ ដើម្បីចែក​ចាយ​បន្ត​ដល់​កង​កម្លាំង​នគរបាល​ទូទាំង​ប្រទេស ប្រើ​ប្រាស់​ការពារខ្លួ​ន ខណៈ​ថវិកា​ដើម្បី​ចូលរួមទប់​ស្កាត់​ការឆ្លង​រាល​ដាល​ជំងឺ​កូវីដ ១៩ ជាមួយរាជរដ្ឋាភិបាល។

ពិធី​ប្រគល់​ថវិកា និង​ម៉ាស់ ត្រូវគេ​ប្រារព្ធធ្វើឡើង​កាល​ពី​ថ្ងៃ​ច័ន្ទ ទី២០ មេសា នៅឯ​អគ្គ​ស្នង​ការដ្ឋាននគរបាល​ជាតិ ក្រោមអធិបតីភាពនាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ និងលោកស្រី Yeung Regina Pui Han, លោក Lau Yau Chuen តំណាងលោក Ng Man Sun អគ្គនាយកក្រុមហ៊ុន កាស៊ីណូ ហ្គោលឌិន ឡាយអិន អេនធើធេនម៉ិន (Golden Lion Entertainment) រួមនឹង​អ្នកពាក់ព័ន្ធជាច្រើនរូបទៀត។

ជា​ការ​ឆ្លើយ​តប នាយឧត្តមសេនីយ៍ សន្ដិបណ្ឌិត នេត សាវឿន បានចាត់ទុកថា ជំនួយនៅ​ពេល​នេះ ជាកាយវិការមួយដ៏ល្អ ហើយ​តំណាងឲ្យនគរបាលកម្ពុជាទាំងអស់ លោកសូមថ្លែងអំណរគុណ សូមឲ្យក្រុមហ៊ុនដំណើរអាជីវកម្មរបស់ខ្លួនទទួលបានជោគជ័យនៅក្នុងប្រទេសកម្ពុជា។

នាយឧត្តមសេនីយ៍ នេត សាវឿន បញ្ជាក់ទៀតថា មកទល់​ពេលនេះ នគរបាលជាតិកម្ពុជា មាន​ភារកិច្ច​ចម្បងការពារសន្ដិសុខ សណ្ដាប់ធ្នាប់សាធារណៈ និងរួមចំណែកជាមួយក្រសួងសុខាភិបាល ជាមួយសមត្ថកិច្ចពាក់ព័ន្ធការពារជំងឺរាតត្បាតកូវីដ ១៩ កុំឲ្យឆ្លងដល់ប្រជាពលរដ្ឋកម្ពុជា និងអ្នកប្រកបមុខរបរនៅកម្ពុជា។

លោកថា នេះជាការចូលរួមចំណែកធំ ព្រោះថាកងកម្លាំងនគរបាលជាតិកម្ពុជា មានឆន្ទៈ មានការប្រតិបត្តិតាមវិធានសុខាភិបាល ប៉ុន្ដែខ្វះលទ្ធភាព ខ្វះថវិកា សម្ភារ នាំ​ឲ្យ​ជំនួយ​នៅ​ពេល​នេះ​ ជាការបំពេញបន្ថែមមួយដ៏ល្អសម្រាប់កងកម្លាំងនគរបាល។

នាយឧត្តមសេនីយ៍ សន្ដិបណ្ឌិត នេត សាវឿន បានបន្ថែមទៀតថា អគ្គស្នងការដ្ឋាននគរបាលជាតិ នឹង​ជួយបង្កលក្ខណៈគ្រប់បែបយ៉ាងតាមផ្លូវច្បាប់ ដើម្បីក្រុមហ៊ុនដំណើរការអាជីវកម្មរបស់ខ្លួននៅ​កម្ពុជា​បាន​កាន់​តែ​រលូន៕ ដោយ៖ ត្នោត

from： https://tnaot.com/km/m/detail/article/9151812