Sign In 
ប្រធានអង្គការសុខភាពពិភពលោក (WHO) បានប្រកាសថា អង្គការនេះមិនបានលាក់បាំងអ្វីនោះឡើយ ហើយរាល់សកម្មភាព គឺមានអ្នកឯកទេសអាមេរិក ធ្វើការជាមួយ WHO តាំងពីដើមមក។ ការលើកឡើងខាងលើរបស់ WHO ក្រោយពេលអាមេរិកចោទប្រកាន់អង្គការនេះម្តងហើយម្តងទៀតថា បានសមគំនិតជាមួយចិន លាក់បាំងព័ត៌មាន។
ក្រៅពីនេះ អាមេរិកក៏បានចោទប្រកាន់ថា វីរុសកូវីដ១៩បានលេចចេញពីមន្ទីរពិសោធន៍របស់ចិន។ ផ្ទុយពីការលើកឡើងខាងលើនេះ ចិន កាលពីថ្ងៃទី២០ ខែមេសាបានអំពាវនាវដល់អាមេរិក ឲ្យបញ្ឈប់ទម្លាក់កំហុស ពីការផ្ទុះឡើង នៃវីរុសកូវីដ១៩ នេះមកលើខ្លួន ហើយចិនក៏ជាជនរងគ្រោះផងដែរ។
ដោយឡែក ប្រធានវិទ្យាស្ថានស្រាវជ្រាវ P4 បានច្រានចោលការចោទប្រកាន់ថា វីរុស SARS-CoV-2 (កូវីដ១៩) មានប្រភពចេញពីវិទ្យាស្ថាននេះផងដែរ។
បណ្តាញទូរទស្សន៍ចិន CGTN កាលពីថ្ងៃទី២០ ខែមេសា បានដកស្រង់សម្តីប្រធានគ្រប់គ្រង វិទ្យាស្ថានស្រាវជ្រាវ P4 ដោយបានបញ្ជាក់ថា វីរុសកូវីដ១៩ មិនមែនមានប្រភពចេញពីទីនេះឡើយ។ ប្រធាន P4 បានបញ្ជាក់ទៀតថា វិទ្យាស្ថានស្រាវជ្រាវវីរុសវូហាន មានការគ្រប់គ្រងយ៉ាងតឹងតែងបំផុត។ ដូច្នេះការបែកធ្លាយលេចចេញវីរុសពីទីនេះ គឺជារឿងមិនអាចទៅរួចនោះឡើយ។
ទោះជាយ៉ាងណា រហូតមកទល់នឹងពេលនេះ អាមេរិកនៅតែមានការសង្ស័យថា វីរុសកូវីរដ១៩បានលេចចេញពីបន្ទប់ពិសោធន៍ នៅ P4 របស់ចិន។ ប៉ុន្តែមន្ត្រីចិនបានលើកឡើងថា អ្វីដែល គួរឲ្យព្រួយបារម្ភនោះ គឺមានមនុស្ស មានចេតនាមិនល្អ ទម្លាក់បញ្ហា និងបង្វែរការចាប់អារម្មណ៍អំពីរឿងនេះ មកលើប្រទេសចិន ទើបបង្កឲ្យមានបញ្ហានេះឡើង។
កន្លងមក សមាជិកព្រឹទ្ធសភាអាមេរិក លោក Tom Cotton បានលើកឡើងពីការសង្ស័យ តាំងពីពេលដំបូង ហើយត្រូវបានសារព័ត៌មានវ៉ាស៊ីនតោន យកមកចុះផ្សាយទៀតផង។
នៅក្នុងសន្និសីទកាសែត នាល្ងាចថ្ងៃទី២០ ខែមេសា អ្នកនាំពាក្យក្រសួងការបរទេសចិន បានច្រានចោលរាល់ការចោទប្រកាន់របស់អាមេរិក ថាវីរុសកូវីដ១៩បានលេចចេញពីប្រទេសចិន គឺជារឿងមិនត្រឹមត្រូវ មិនមានភស្តុតាងណាមួយបញ្ជាក់ការពិតនោះឡើយ។ រដ្ឋាភិបាលចិន ក៏ដូចជា បណ្តាអង្គការធំៗ ដូចជា WHO អង្គការសហប្រជាជាតិ បានអំពាវនាវកុំយកបញ្ហាកូវីដ១៩ ទៅជារឿងនយោបាយ ទម្លាក់កំហុសដាក់គ្នា។
ក្រុមអ្នកជំនាញបានលើកឡើងថា ការចោទប្រកាន់របស់អាមេរិក ក្នុងគោលដៅ បញ្ជូនមនុស្សទៅស្រាវជ្រាវ នៅមន្ទីរពិសោធរបស់ចិនតែប៉ុណ្ណោះ ដោយអាមេរិកចង់ដឹងថា នៅខាងក្នុងមានអ្វីខ្លះ។ ពេលថ្មីៗនេះ ប្រធានាធិបតីអាមេរិក លោក ដូណាល់ ត្រាំ បានស្នើដល់ចិន អនុញ្ញាតឲ្យក្រុមអ្នកជំនាញអាមេរិក ចូលទៅកាន់មន្ទីរពិសោធន៍របស់ចិន ដើម្បីស្រាវជ្រាវ៕ ប្រែសម្រួលដោយ៖ MEO
