Sign In 
អ៊ីរ៉ង់ គឺជាប្រទេសដែលរងផលប៉ះពាល់ខ្លាំងជាងគេបំផុត ដោយសារតែកូវីដ-១៩ នៅតំបន់មជ្ឈិមបូព៌ា តែមកដល់ពេលនេះ អ៊ីរ៉ង់មានអ្នកឆ្លងសរុបដល់ទៅជាង៨ម៉ឺននាក់ និងស្លាប់ជាង៥ពាន់នាក់។
នៅពេលនេះ រដ្ឋាភិបាលអ៊ីរ៉ង់ បានសម្រេចអនុញ្ញាតឲ្យក្រុមហ៊ុនធុនតូច និងមធ្យម បើកដំណើរការឡើងវិញ ក្រោយពេលចំនួនអ្នកឆ្លងកូវីដ-១៩ ក្នុងប្រទេសនេះ ធ្លាក់ចុះខ្លាំង។ នេះជារឿងដ៏ប្រសើរបំផុត សម្រាប់អ៊ីរ៉ង់ ដើម្បីកាត់បន្ថយផលប៉ះពាល់ដល់សេដ្ឋកិច្ច។
ក្រសួងសុខាភិបាលអ៊ីរ៉ង់ បានបញ្ជាក់ថា មានអ្នកឆ្លងថ្មីធ្លាក់ចុះ រហូតដល់ទៅ៥០ភាគរយ ហើយនេះជារឿងល្អបំផុត សម្រាប់ដំណើរការសេដ្ឋកិច្ច។ ក្រោយការប្រកាសបើកទ្វារ តាំងពីព្រឹក ថ្ងៃទី១៩ ខែមេសា រដ្ឋធានីតេអ៊ីរ៉ង់ ចាប់ផ្តើមមានមនុស្សកុះករឡើងវិញ បន្ទាប់ពី ហាង លក់ទំនិញផ្សេងៗ ចាប់ផ្តើមបើកទ្វារ ។
តាមការប្រកាសរបស់រដ្ឋាភិបាល បណ្តាហាងលក់ទំនិញ ក្រុមហ៊ុនតូច និងមធ្យម ចាប់ផ្តើមបើកទ្វារដំណើរការឡើងវិញ លើកលែងតែមជ្ឈមណ្ឌលផ្សារទំនើប រោងភាពយន្ត កន្លែងហាត់ប្រាណ…នៅបន្តបិទទ្វារដដែល។ រដ្ឋាភិបាលអ៊ីរ៉ង់ បានបញ្ជាក់ថា ប្រសិនបើ អូសបន្លាយពេលវេលាថែមទៀត នឹងមានពលរដ្ឋយ៉ាងតិច៤លាននាក់ អត់ការងារធ្វើ ហើយវានាំឲ្យប៉ះពាល់ដល់សេដ្ឋកិច្ចជាតិយ៉ាងខ្លាំងថែមទៀតផង៕ប្រែសម្រួលដោយ៖ MEO
