Sign In 
ភ្នំពេញ៖ ខណ្ឌមានជ័យបានសម្រេចរៀបចំសាលាបឋមសិក្សា ភូមិឬស្សី ចំនួន២៤បន្ទប់
ត្រៀមទុកដាក់កម្មករ កម្មការិនី ធ្វើចត្តាឡីស័ករយៈពេល ១៤ថ្ងៃ នៅពេលពួកគេត្រឡប់មកពីស្រុកកំណើតវិញ។ នេះបើតាមការឲ្យដឹងពី លោក ឌី រ័ត្នខេមរុណ អភិបាលរងខណ្ឌមានជ័យ នៅថ្ងៃទី១៨ ខែមេសា ឆ្នាំ២០២០នេះ។
នៅវេលាម៉ោង២ និង៣០នាទី ថ្ងៃទី១៨ ខែមេសា ឆ្នាំ២០២០នេះ អភិបាលរងខណ្ឌមានជ័យ បានដឹកនាំមន្រ្តីខណ្ឌ និង សង្កាត់ រួមទាំង លោកនាយកសាលាភូមិឬស្សី ចុះពិនិត្យទីតាំង សាលាបឋមសិក្សា ភូមិឬស្សី ដែលមានទីតាំង ក្នុងភូមិឬស្សី សង្កាត់ស្ទឹងមានជ័យទី២ ខណ្ឌមានជ័យ ដែលជាគោលដៅសម្រាប់ធ្វើចត្តាឡីស័ក រយៈពេល ១៤ថ្ងៃ លើកម្មករ កម្មការិនី រោងចក្រ ដែលទើបវិលត្រឡប់ចូលមូលដ្ឋានខណ្ឌមានជ័យ ។
ក្រោយពីចុះត្រួតពិនិត្យលើទីតាំងសាលាបឋមសិក្សា ភូមិឬស្សី ទាំង ២៤បន្ទប់រួចមក លោក ឌី រ័ត្នខេមរុណ អភិបាលរងខណ្ឌមានជ័យបាននាំយកថវិកា លោក ពេជ្រ កែវមុនី អភិបាលខណ្ឌមានជ័យ ឧបត្ថម្ភដល់នាយកសាលាក្នុងការរៀបចំបណ្តាញ ប្រព័ន្ធភ្លើង
និងទឹក សំរាប់កម្មករ កម្មការនី ស្នាក់នៅផងដែរ៕ ដោយ៖ សួង សាម
