រដ្ឋមន្ត្រីការបរទេសអាមេរិក លោក​ Mike Pompeo ​​បានបន្ទន់សម្ដីខុសប្លែកពីធម្មតា​ដោយ​អំពាវ​នាវ​ដល់ចិន រួមគ្នាប្រឆាំងនឹងកូវីដ​-១៩។

នៅក្នុងជំនួបពិភាក្សាតាមទូរស័ព្ទជាមួយប្រធានការិយាល័យកិច្ចការបរទេសរបស់ក្រសួងការបរទេសចិន លោក​Yang Jiechi នោះ រដ្ឋមន្ត្រីការបរទេស​អាមេរិក លោក  Mike Pompeo ​បានអំពាវនាវដល់ចិន​ ឲ្យរួមសហការគ្នា ដើម្បីប្រឆាំងនឹងកូវីដ-១៩។ នេះជាសកម្មភាព​ខុសប្លែកពីធម្មតា។

អ្នកនាំពាក្យ នៃក្រសួងការបរទេសអាមេរិក លោកស្រី Morgan Ortagus បានបញ្ជាក់ថា «រដ្ឋមន្ត្រី​ការ​បរទេសអាមេរិក ​បានបញ្ជាក់ឡើងវិញ ពីជំនួយទៅឲ្យចិន កាលពីខែមករា ហើយ​អាមេរិកនឹងបន្ត ក្នុងពេលខាងមុខ។ រដ្ឋមន្ត្រីការបរទេសអាមេរិក បានលើកឡើងទៀតថា អ្វីដែល​សំខាន់ នាពេលនេះ គឺផ្តល់លក្ខណៈងាយស្រួលឲ្យអាមេរិក ទទួលបានការផ្គត់​ផ្គង់​បរិក្ខារពេទ្យចាំបាច់ ក្នុងសង្គ្រាមប្រឆាំងនឹងកូវីដ-១៩។

សារព័ត៌មាន​ AFP ​នៅថ្ងៃទី​១៦ ខែមេសា បានផ្សាយថា ចិនគឺជាប្រភពផ្គត់ផ្គង់ បរិក្ខារ​ពេទ្យ​ចាំ​បាច់បំផុតដល់អាមេរិក ក្នុងសង្គ្រាមប្រឆាំងនឹងកូវីដ-១៩។ ជំនួបពិភាក្សា ខាងលើ​គឺជាចំណុច​ដ៏​សំខាន់​ជួយដល់ទំនាក់ទំនង រវាងអាមេរិក-ចិន ឲ្យកាន់តែប្រសើរឡើង ក្រោយ​ប្រឈម​មុខ​តាន​តឹងដាក់គ្នា ជាច្រើនសប្តាហ៍កន្លងមក ចាប់តាំងពីការផ្ទុះកូវីដ-១៩នោះមក៕ ប្រែ​សម្រួល​ដោយ៖ MEO

from： https://tnaot.com/km/m/detail/article/9139859