Sign In 
ភ្នំពេញ៖ សេចក្ដីប្រកាសរួម នៃកិច្ចប្រជុំកំពូលអាស៊ានបូកបីពិសេស ស្ដីជំងឺកូវីដ១៩ មានទាំងអស់១៣ចំណុច។ នេះបើតាមសេចក្ដីប្រកាសរួម នៃកិច្ចប្រជុំកំពូលអាស៊ានបូកបីពិសេសស្ដី ពីវីរុសកូវីដ១៩ កាលពីកាលពីរសៀលថ្ងៃទី១៤ ខែមេសា ឆ្នាំ២០២០នេះ។
ចំណុចទាំង១៣នោះមានដូចខាងក្រោម
១ – លើកទឹកចិត្តឲ្យមានការផ្លាស់ប្ដូរព័ត៌មានជាទៀងទាត់ដោយសេរី បើកចំហ និងមានតម្លាភាពស្ដីពីស្ថានភាពជាក់ស្ដែង និងវិធានការដែលបានអនុវត្តដោយប្រទេសនីមួយៗ ចែករំលែកបទពិសោធន៍ និងឧត្តម្មានុវត្តន៍ ពង្រីកការគាំទ្រផ្នែកបច្ចេកទេសទៅវិញទៅមកក្នុងការបង្ការ ទប់ស្កាត់ និងតាមដានការចម្លង ក៏ដូចជាការព្យាបាលផងដែរ។
២- ប្ដេជ្ញាកសាងសមត្ថភាពសម្រាប់ប្រព័ន្ធសុខាភិបាលជាតិ និងតំបន់ ដើម្បីពង្រឹងការត្រៀមលក្ខណៈ និងការឆ្លើយតបទៅនឹងការរាតត្បាត ការការពារបុគ្គលិក សុខាភិបាលជួរមុខ និងធានាការចែកចាយ ផ្គត់ផ្គង់គ្រឿងវេជ្ជសាស្ត្រឲ្យបានគ្រប់គ្រាន់ ជាពិសេសឧបករណ៍ធ្វើរោគវិនិច្ឆ័យ ឧបករណ៍ការពារផ្ទាល់ខ្លួន និងឧបករណ៍វេជ្ជសាស្ត្រនានា ដោយប្រកាន់ខ្ជាប់នូវគោលបំណង នៃប្រសិទ្ធភាព សុវត្ថិភាព និងភាពងាយស្រួល។
៣- ពិចារណារៀបចំការបម្រុងទុកការផ្គត់ផ្គង់វេជ្ជសាស្ត្រសំខាន់ៗរបស់អាស៊ានបូកបីដែលអាចជួយឆ្លើយតបយ៉ាងរហ័សចំពោះតម្រូវការបន្ទាន់។ លើកទឹកចិត្ត ការប្រើប្រាស់កន្លែងបម្រុងបន្ទាន់ក្នុងតំបន់ ដែលមានស្រាប់ រួមមានឃ្លាំងដែលគ្រប់គ្រងដោយមជ្ឈមណ្ឌលសម្របសម្រួលអាស៊ានសម្រាប់ជំនួយមនុស្សធម៌ (AHA) និងអង្ករបម្រុងបន្ទាន់របស់អាស៊ានបូកបី (APTEFR) សម្រាប់តម្រូវការបន្ទាន់ផ្នែកសុខភាពសាធារណៈ។
៤- លើកទឹកចិត្តការគាំទ្រ និងជួយគ្នាទៅវិញទៅមករវាងប្រទេសអាស៊ានបូកបី ក្នុងការអភិវឌ្ឍធនធានមនុស្សសម្រាប់វិស័យសុខាភិបាលសាធារណៈ រួមមានការ បណ្ដុះបណ្ដាលបុគ្គលិកសុខាភិបាលសាធារណៈ ការផ្តល់អាហារូបករណ៍ និងកម្មសិក្សាសម្រាប់និស្សិតមកពីប្រទេសសមាជិកអាស៊ានដើម្បីសិក្សានៅសាលាពេទ្យ នៃប្រទេសបូកបី។
៥- ព្យាយាមធានាឲ្យបាននូវការផ្តល់ហិរញ្ញប្បទានគ្រប់គ្រាន់ក្នុងការទប់ទល់នឹងការរាតត្បាត និងការពារប្រជាជន រួមទាំងស្វែងរកលទ្ធភាព នៃការបង្កើតមូលនិធិពិសេសដែលអាចធ្វើទៅបានក្នុងការឆ្លើយតបទៅនឹងភាពបន្ទាន់ នៃសុខភាពសាធារណៈ តាមរយៈការស្នើសុំមូលនិធិ នៃកិច្ចសហប្រតិបត្តិការអាស៊ានបូកមួយ និងមូលនិធិ នៃកិច្ចសហប្រតិបត្តិការអាស៊ានបូកបី និងការគាំទ្របន្ថែមពីបណ្តាប្រទេសបូកបី។
៦-លើកកម្ពស់កិច្ចសហប្រតិបត្តិការ ដើម្បីផ្តល់ការគាំទ្រ និងជំនួយសមស្របដល់ប្រជាជន នៃបណ្តាប្រទេសអាស៊ានបូកបី ដែលកំពុងស្នាក់នៅបំពេញការងារ និងសិក្សានៅក្នុងបណ្តាប្រទេសអាស៊ានបូកបី ដោយធានាសុវត្ថិភាព និងសមភាពចំពោះអ្នកដែលរងផលប៉ះពាល់ដោយជំងឺកូវីដ-១៩។
៧-ជំរុញបន្ថែមការលើកកម្ពស់ទំនាក់ទំនងសាធារណៈប្រកបដោយប្រសិទ្ធភាព ធានាតម្លាភាព និងផ្តល់ព័ត៌មានជាក់លាក់ដល់សាធារណជន។
៨- បញ្ជាក់សាជាថ្មីនូវការប្ដេជ្ញាចិត្តរក្សាការបើកច្រកទីផ្សារ រក្សាលំហូរពាណិជ្ជកម្ម សេវាកម្ម និងការវិនិយោគពង្រឹងសេដ្ឋកិច្ចក្នុងតំបន់ឲ្យរឹងមាំធានាថា ការចាត់វិធានការបន្ទាន់សម្រាប់ការឆ្លើយតបចំពោះសុខភាពសាធារណៈនឹងចំគោលដៅសមាមាត្រ ប្រកបដោយតម្លាភាព និងមានលក្ខណៈជាបណ្ដោះអាសន្ន ព្រមទាំងមិនបង្កើតរបាំង មិនចាំបាច់ដល់ការធ្វើពាណិជ្ជកម្ម ឬបង្កើតការរំខានដល់ខ្សែសង្វាក់ផលិតកម្មពិភពលោក។
៩-បញ្ជាក់សាជាថ្មីការប្ដេជ្ញាចិត្តដើម្បីពង្រឹងកិច្ចខិតខំប្រឹងប្រែងរួមគ្នា ឆ្ពោះទៅរកផែនការស្តារឡើងវិញក្រោយការរាតត្បាតជំរុញការអភិវឌ្ឍសេដ្ឋកិច្ចស្តារកំណើនឡើងវិញ រក្សាស្ថិរភាពទីផ្សារ និងទប់ស្កាត់ហានិភ័យ នៃវិបត្តិសេដ្ឋកិច្ច។
១០-ពង្រឹងកិច្ចខិតខំប្រឹងប្រែងធ្វើឲ្យមានស្ថិរភាពផលិតកម្ម និងស្ថិរភាពផ្គត់ផ្គង់ទំនិញ និងសេវាកម្មសំខាន់ៗ រួមបញ្ចូលទាំងការផ្គត់ផ្គង់សម្ភារៈ បរិក្ខារពេទ្យសំខាន់ៗ ផលិតផលកសិកម្ម ការតភ្ជាប់ខ្សែសង្វាក់ផ្គត់ផ្គង់ទាំងក្នុង និងក្រៅតំបន់។
១១- ប្ដេជ្ញាធ្វើការសហការយ៉ាងជិតស្និទ្ធជាមួយអង្គការសុខភាពពិភពលោក អង្គការអន្តរជាតិ និងសហគមន៍អន្តរជាតិដទៃទៀតក្នុងការប្រយុទ្ធប្រឆាំងជាសកល ដើម្បីទប់ស្កាត់ការរីករាលដាល និងបញ្ឈប់ការរាតត្បាត ខណៈដែលកំពុងដោះស្រាយនូវផលវិបាកសង្គម និងវិបត្តិសេដ្ឋកិច្ចយ៉ាងធ្ងន់ធ្ងរដែលបណ្តាលមកពីជំងឺកូវីដ-១៩ ការពារសុខុមាលភាពរបស់ប្រជាជន និងរក្សាកំណើនប្រកបដោយចីរភាព។
១២- រក្សាការរួបរួមគ្នាដោយមានការប្រុងប្រយ័ត្នខ្ពស់ និងត្រៀមលក្ខណៈដើម្បីចាត់វិធានការផ្សេងទៀតតាមតម្រូវការ។
១៣-ណែនាំឲ្យកិច្ចប្រជុំរដ្ឋមន្ត្រីការបរទេសអាស៊ានបូកបីធ្វើជាអង្គភាពសម្របសម្រួលស្នូលដោយសហការយ៉ាងជិតស្និទ្ធជាមួយស្ថាប័នពាក់ព័ន្ធក្នុងក្របខ័ណ្ឌអាស៊ានបូកបី ដើម្បីតាមដានការអនុវត្ត ការប្ដេជ្ញាចិត្ត និងកិច្ចព្រមព្រៀងនានា ដែលបានគូសបញ្ជាក់នៅក្នុងសេចក្ដីប្រកាសនេះ៕ ដោយ៖ ប៊ុនធឿន
