Sign In 
ភ្នំពេញ៖ មេដឹកនាំ នៃប្រទេសចិន ជប៉ុន កូរ៉េខាងត្បូង និង មេដឹកនាំប្រទេសអាស៊ានទាំង១០ បានប្តេជ្ញាកសាងសមត្ថភាពសម្រាប់ប្រព័ន្ធសុខាភិបាលជាតិ និងតំបន់ ដើម្បីប្រឆាំងកូវីដ១៩។ នេះបើតាមសេចក្ដីប្រកាសរួម នៃកិច្ចប្រជុំកំពូលអាស៊ានបូកបី ពិសេសស្ដីពីវីរុសកូវីដ១៩ កាលពីកាលពីរសៀលថ្ងៃទី១៤ ខែមេសា ឆ្នាំ២០២០នេះ។
ក្នុងសេចក្តីប្រកាសនោះបញ្ជាក់ថា ការប្តេជ្ញានេះធ្វើឡើងដើម្បីពង្រឹងការត្រៀមលក្ខណៈ និងការឆ្លើយតបទៅនឹងការរាតត្បាត ការការពារបុគ្គលិកសុខាភិបាលជួរមុខ និងធានាការចែកចាយ ផ្គត់ផ្គង់គ្រឿងវេជ្ជសាស្ត្រឲ្យបានគ្រប់គ្រាន់ ជាពិសេសឧបករណ៍ធ្វើរោគវិនិច្ឆ័យ ឧបករណ៍ការពារផ្ទាល់ខ្លួន និងឧបករណ៍វេជ្ជសាស្ត្រនានា ដោយប្រកាន់ខ្ជាប់នូវគោលបំណង នៃប្រសិទ្ធភាព សុវត្ថិភាព និងភាពងាយស្រួល។
ជាមួយគ្នានោះ មេដឹកនាំអាស៊ានបូកបី បានលើកទឹកចិត្តឲ្យមានការផ្លាស់ប្ដូរព័ត៌មានជាទៀងទាត់ដោយសេរី បើកចំហ និងមានតម្លាភាពស្ដីពីស្ថានភាពជាក់ស្ដែង និងវិធានការដែលបានអនុវត្តដោយប្រទេសនីមួយៗ ចែករំលែកបទពិសោធន៍ និងឧត្តម្មានុវត្តន៍ ពង្រីកការគាំទ្រផ្នែកបច្ចេកទេសទៅវិញទៅមកក្នុងការបង្ការ ទប់ស្កាត់ និងតាមដានការចម្លង ក៏ដូចជាការព្យាបាលផងដែរ។
មួយវិញទៀត អាស៊ានបូកបី ក៏បានប្ដេជ្ញាធ្វើការសហការយ៉ាងជិតស្និទ្ធជាមួយអង្គការសុខភាពពិភពលោក អង្គការអន្តរជាតិ និងសហគមន៍អន្តរជាតិដទៃទៀត ក្នុងការប្រយុទ្ធប្រឆាំងជាសកល ដើម្បីទប់ស្កាត់ការរីករាលដាល និងបញ្ឈប់ការរាតត្បាត ខណៈដែលកំពុងដោះស្រាយនូវផលវិបាកសង្គម និងវិបត្តិសេដ្ឋកិច្ចយ៉ាងធ្ងន់ធ្ងរដែលបណ្តាលមកពីជំងឺកូវីដ-១៩ ការពារសុខុមាលភាពរបស់ប្រជាជន និងរក្សាកំណើនប្រកបដោយចីរភាព។ រក្សាការរួបរួមគ្នាដោយមានការប្រុងប្រយ័ត្នខ្ពស់ និងត្រៀមលក្ខណៈដើម្បីចាត់វិធានការផ្សេងទៀតតាមតម្រូវការ។
ក្នុងនោះអាស៊ានបូកបី ក៏មានការពិចារណារៀបចំការបម្រុងទុក ការផ្គត់ផ្គង់វេជ្ជសាស្ត្រសំខាន់ៗរបស់អាស៊ានបូកបី ដែលអាចជួយឆ្លើយតបយ៉ាងរហ័សចំពោះតម្រូវការបន្ទាន់។ លើកទឹកចិត្ត ការប្រើប្រាស់កន្លែងបម្រុងបន្ទាន់ក្នុងតំបន់ ដែលមានស្រាប់ រួមមានឃ្លាំងដែលគ្រប់គ្រងដោយមជ្ឈមណ្ឌលសម្របសម្រួលអាស៊ានសម្រាប់ជំនួយមនុស្សធម៌ (AHA) និងអង្ករបម្រុងបន្ទាន់របស់អាស៊ានបូកបី (APTEFR) សម្រាប់តម្រូវការបន្ទាន់ផ្នែកសុខភាពសាធារណៈ៕ ដោយ៖ ប៊ុនធឿន
