Sign In 
នាយករដ្ឋមន្រ្ដីវៀតណាម កាលពីថ្ងៃទី១៣ ខែមេសា បានជួបតាមទូរស័ព្ទ ជាមួយនឹងសមភាគីឥណ្ឌា ពិភាក្សាគ្នាស្ដីអំពីសង្រ្គាមប្រយុទ្ធប្រឆាំងនឹងវីរុសកូវីដ១៩។
យោងតាមសារព័ត៌មានវៀតណាម បានឲ្យដឹងថា លោក Nguyen Xuan Phuc នាយករដ្ឋមន្រ្ដីវៀតណាម និងសមភាគីឥណ្ឌា លោក Narendra Modi បានធ្វើទំនាក់ទំនងគ្នាតាមទូរស័ព្ទ។ ភាគីទាំង២បានពិភាក្សាគ្នា ស្ដីអំពីយុទ្ធសាស្រ្ដ ធ្វើសង្រ្គាមប្រយុទ្ធប្រឆាំងនឹងកូវីដ១៩ និងការរឹតចំណងមិត្តភាពទ្វេភាគី ឲ្យកាន់តែប្រសើរឡើងថែមទៀត។
នៅក្នុងជំនួបតាមទូរស័ព្ទនោះ នាយករដ្ឋមន្រ្ដីវៀតណាម ក៏បានបង្ហាញអំពីបទពិសោធន៍របស់ខ្លួន ក្នុងការទប់ស្កាត់កូវីដ១៩ដល់សមភាគី ឥណ្ឌាផងដែរ។ លោកនាយករដ្ឋមន្រ្ដីបានសង្កត់ធ្ងន់លើសកម្មភាពយ៉ាងម៉ឺងម៉ាត់ ដែលបានអនុវត្តដោយរដ្ឋាភិបាល ដើម្បីអនុវត្តការងារចំនួន២ រួមមាន ការប្រយុទ្ធប្រឆាំងនឹងការរីករាលដាល នៃវីរុសកូវីដ១៩ និងការអភិវឌ្ឍសេដ្ឋកិច្ចសង្គម ដើម្បីធានាបាននូវសុខុមាលភាពសង្គមដែលត្រូវបានស្វាគមន៍ដោយសាធារណជន។
ជាមួយគ្នានេះដែរ លោកនាយករដ្ឋមន្រ្ដីវៀតណាម ក៏បានកោតសរសើរដល់នាយករដ្ឋមន្រ្តីឥណ្ឌា និងរដ្ឋាភិបាលដែលបានចាត់វិធានការទាន់ពេលវេលា ដើម្បីប្រយុទ្ធប្រឆាំងនឹងវីរុសដ៏កាចសាហាវនេះ។
រដ្ឋាភិបាលឥណ្ឌា បានប្រើប្រាស់វិធានការនានា សម្រាប់ការទប់ស្កាត់វីរុសកូវីដ១៩ នៅក្នុងប្រទេសដែលប្រជាពលរដ្ឋដ៏ច្រើនលើសលុបលំដាប់លេខ២ បន្ទាប់ពីចិន។ ក្រៅពីវិធានការដ៏តឹងរឹងនោះ ឥណ្ឌាក៏បានប្រើប្រាស់ថវិកា រហូតដល់២២ពាន់លានដុល្លារសម្រាប់ជាកញ្ចប់ថវិកាជួយទ្រទ្រង់ដល់សុខុមាលភាពរបស់ប្រជាពលរដ្ឋក្រីក្រផងដែរ។
ជាមួយគ្នានេះដែរ វៀតណាមបានត្រៀមខ្លួនរួចជាស្រេច សម្រាប់ធ្វើកិច្ចសហប្រតិបត្ដិការ និងជួយដល់ប្រទេសឥណ្ឌាតាមតែអាចធ្វើទៅបាន។
នាយករដ្ឋមន្រ្ដីទាំង២បានគូសបញ្ជាក់អំពីសារសំខាន់ នៃការធ្វើការរួមគ្នា និងការចែករំលែកព័ត៌មាន ហើយបទពិសោធឲ្យគ្នាទៅវិញទៅមក ក្នុងការប្រយុទ្ធប្រឆាំងនឹងការឆ្លងរីករាលដាល នៃកូវីដ១៩។ ក្រៅពីនេះ ភាគីទាំង២បានជំរុញឲ្យមានកិច្ចសហប្រតិបត្ដិការលើវិស័យជាមមានច្រើន រួមមាន ការពារជាតិ ពាណិជ្ជកម្ម ពាណិជ្ជកម្ម វិនិយោគ ថាមពល និងវប្បធម៌ផងដែរ។
ដើម្បីសម្រេចបាននូវពាណិជ្ជកម្មទ្វេភាគី មានទឹកប្រាក់ រហូតដល់១៥ ពាន់លានដុល្លារនៅឆ្នាំនេះ នាយករដ្ឋមន្រ្ដីទាំង២ បានប្តេជ្ញាថា នឹងធ្វើឱ្យមានភាពងាយស្រួល សម្រាប់អាជីវកម្មក្នុងការបង្កើនពាណិជ្ជកម្ម និងបើកទីផ្សារសម្រាប់ផលិតផលកសិកម្ម ទៅវិញទៅមក។
បើគិតត្រឹមថ្ងៃទី១៤ ខែមេសា ឆ្នាំ២០២០ ប្រទេសវៀតណាម មាននអ្នកឆ្លងវីរុសកូវីដ១៩ ចំនួន២៦៥ ក្នុងនោះជាសះស្បើយ ១៦៦នាក់។ រីប្រទេសឥណ្ឌា មានអ្នកឆ្លងវីរុស កើនឡើង១០៥៤១នាក់ ក្នុងស្លាប់៣៥៨នាក់ និងជាសះស្បយ១២០៥នាក់៕ ប្រែសម្រួលដោយ Nuon
