Sign In 
– ស្ថានការណ៍នាំឲ្យចិន ស្គាល់កាន់តែច្បាស់ នរណាជាមិត្តល្អបំផុតរបស់ខ្លួន?
យើងសង្កេតឃើញថា ចំណងមិត្តភាពរវាងប្រទេសកម្ពុជា និងចិន ហាក់កំពុងមានការរីកចម្រើនខ្លាំងគួរឲ្យកត់សម្គាល់ ពិសេសអំឡុងពេលស្ថានភាពការរាតត្បាតវីរុសកូវីដ ១៩ នៅជុំវិញពិភពលោកកំពុងតែធ្ងន់ធ្ងរពីមួយថ្ងៃទៅមួយថ្ងៃ ហើយនៅក្នុងចំណងមិត្តភាព ដែលយើងនិយមហៅថា ចំណងមិត្តភាពដែកថែប កម្ពុជា-ចិន បែរជាកំពុងតែរឹងមាំខ្លាំង ដោយសារកម្ពុជា បានធ្វើរឿងដ៏អស្ចារ្យជាច្រើនទាំងសម្រាប់ប្រទេសជាមិត្តរបស់ខ្លួន ក៏ដូចជាសម្រាប់ពលរដ្ឋនៃបណ្តាប្រទេសផ្សេងទៀត ធ្វើឲ្យពិភពលោក ពិសេសមិត្តចិន របស់កម្ពុជា មើលឃើញកាន់តែច្បាស់ថា កម្ពុជា ជាប្រទេសតូចក៏ពិតមែន ប៉ុន្តែកម្ពុជាមានចំណុចល្អបំផុត គឺក្លាហាន រឹងមាំ និងមានគុណធម៌។
និយាយឲ្យចំទៅចុះ ក្នុងកាលៈទេសៈក៏ពិបាកនេះ កម្ពុជាដែលជាប្រទេសតូចមួយ អាចនិយាយថា ប្រទេសកំពុងអភិវឌ្ឍន៍ ជាប្រទេសក្រក្រី ពិតជាត្រូវការពឹងផ្អែកលើជំនួយពីប្រទេសជាមិត្តរបស់ខ្លួន ដើម្បីទប់ស្កាត់ស្ថានការណ៍រាតត្បាតនៃជំងឺប្រល័យលោកមួយនេះ ព្រោះថា អំឡុងពេលនេះ យើងសុទ្ធតែឃើញស្រាប់ សូម្បីតែមហាអំណាច ដូចជា សហរដ្ឋអាមេរិក បារាំង អ៊ីតាលី អាល្លឺម៉ង់ និងចក្រភពអង់គ្លេស មិនអាចសូម្បីតែការពារខ្លួនពីជំងឺនេះ យ៉ាងណា យ៉ាងណា កម្ពុជាពេលនេះ ក៏បានត្រៀមខ្លួនយ៉ាងល្អ ដើម្បីទប់ស្កាត់ការរាតត្បាតវីរុសកូវីដ ១៩ ក្នុងប្រទេសខ្លួនរួចរាល់ហើយដែរ។
និយាយបកក្រោយបន្តិច ចាប់តាំងពីមានការផ្ទុះឡើងនូវជំងឺកូវីដ ១៩ អំឡុងខែធ្នូ ឆ្នាំ២០១៩ មក ប្រទេសចិន ដែលជាមហាមិត្តរបស់កម្ពុជា ត្រូវគេមើលឃើញយ៉ាងច្បាស់ថា ជាប្រទេសរងគ្រោះដំបូងគេបង្អស់ និងធ្ងន់ធ្ងរបំផុតអំឡុងពេលនោះ ដោយត្រឹមរយៈពេលជាងមួយខែប៉ុណ្ណោះ ពលរដ្ឋចិន រាប់ម៉ឺននាក់ ធ្លាក់ខ្លួនឈឺជំងឺកូវីដ ១៩ ដែលកាលនោះយើងហៅថាជំងឺផ្លួវដង្ហើមថ្មី ឬកូរ៉ូណាថ្មី ខណៈពលរដ្ឋរាប់ពាន់នាក់បានស្លាប់ជាបន្តបន្ទាប់ នាំឲ្យរដ្ឋាភិបាលចិន បង្ខំចិត្តបិទក្រុងអ៊ូហាន ដែលមានពលរដ្ឋសរុបជាង ១១លាន ដាក់ឲ្យនៅឯកោរយៈពេលជាង ២ខែ។ ទីក្រុងធ្លាប់តែមមាញឹក អ៊ូអរ ទាំងថ្ងៃទាំងយប់ បែរជាស្ងប់ស្ងាត់ដូចជាទីក្រុងខ្មោច ខណៈពលរដ្ឋត្រូវសម្ងំនៅផ្ទះ មិនអនុញ្ញាតឲ្យធ្វើចរាចរ ដើរហើរ ឬជួបជុំនោះឡើយ ស្របពលរដ្ឋនៃបណ្តាប្រទេសជាច្រើនទៀតលើពិភពលោក កំពុងតែសប្បាយក្អាកក្អាយនឹងជីវិតបែបស៊ីវីល័យរបស់ខ្លួន ភ្លេចការពារ មើលងាយស្ថានការណ៍ នាំឲ្យកើតមានមហន្តរាយឆ្លងរាតត្បាតដល់ថ្ងៃនេះ។
ក្នុងកាលៈទេសៈដែលប្រទេសចិន ត្រូវគេមើលឃើញថា លែងមានសុវត្ថិភាពនោះ បណ្តាប្រទេសជាច្រើន បានចាប់ផ្តើមផ្តាច់ខ្លួនចេញពីប្រទេសចិន ព្យាយាមផ្តាច់ខ្លួនចេញពីប្រទេសចិន ដូចជាការបិទព្រំដែន ជម្លៀសពលរដ្ឋខ្លួន និងបិទជើងហោះហើរពីចិនទាំងអស់ សំដៅធ្វើយ៉ាងណា កុំឲ្យជំងឺនេះ ឆ្លងរាលដាលចូលក្នុងប្រទេសខ្លួន ប៉ុន្តែអំឡុងពេលនោះដូចគ្នា មានតែកម្ពុជាតែមួយគត់ ដែលបានធ្វើរឿងដ៏អស្ចារ្យឲ្យពលរដ្ឋចិន ជាង ១៤០០លាននាក់បានឃើញ។
– ការសម្រេចចិត្តដ៏ឈ្លាសវៃនៃមេដឹកនាំកម្ពុជា
ប៉ុន្តែស្របពេលដែលពិភពលោក ចាត់ទុកប្រទេសចិន ជាកន្លែងគ្រោះថ្នាក់ ស្រាប់តែមេដឹកនាំនៃប្រទេសកំពុងអភិវឌ្ឍ និងក្រីក្រ គឺកម្ពុជា យើងនេះឯង ដែលមានសម្តេចតេជោ ហ៊ុន សែន ជានាយករដ្ឋមន្ត្រី បានសម្រេចធ្វើទស្សនកិច្ចផ្លូវរដ្ឋ ទៅកាន់រដ្ឋធានីប៉េកាំង ប្រទេសចិន ដើម្បីលើកទឹកចិត្តដល់ពលរដ្ឋចិន និងសិស្សនិសិត្យកម្ពុជា ដែលកំពុងបំពេញការសិក្សានៅទីនោះ ដោយសកម្មភាពនេះ បានធ្វើឲ្យពិភពលោកមានការភ្ញាក់ផ្អើលជាខ្លាំង នូវការសម្រេចចិត្តរបស់មេដឹកនាំកម្ពុជា អំឡុងពេលចិន ស្ថិតក្នុងកាលៈទេសៈពិបាកបំផុត ក៏អាចបង្ហាញពលរដ្ឋចិនជាង ១៤០០នាក់ ពីមិត្តភាពពិតប្រាកដរបស់កម្ពុជាទៅលើប្រទេសចិន ជាមហាមិត្តរបស់ខ្លួន មិនបោះបង់ចិន ក្នុងគ្រាលំបាកនោះឡើយ។
– ប្រទេសតូច តែមានគុណធម៌ និងមនុស្សធម៌
និយាយដល់ចំណុចនេះ គួរតែលើកឡើងនៅចំណុចស៊ីគ្នាមួយទៀត ពាក់ព័ន្ធការសម្រេចចិត្តរបស់សម្តេចតេជោ ហ៊ុន សែន ដោយយើងទាំងអស់គ្នាសុទ្ធតែចាំបាន រឿងនាវាទេសចរយក្ស Westerndam ក្រោយចាកចេញពីកំពង់ផែក្រុងហុងកុង បានជាប់គាំងលើផ្ទៃសមុទ្រជាច្រើនថ្ងៃ ដោយសារបណ្តាប្រទសជាច្រើន បដិសេធមិនព្រមឲ្យចូលចតនោះ ស្ទើរតែនាំឲ្យអ្នកដំណើរ និងនាវិកសរុបជាង ២០០០នាក់ ស្លាប់ដោយសារដាច់ពោះលើផ្ទៃសមុទ្រទៅហើយ។
ប៉ុន្តែដូចទៅនឹងអ្វីសម្តេចនាយករដ្ឋមន្ត្រី ហ៊ុន សែន បានលើកឡើង កម្ពុជាជាប្រទេសតូច ក្រីក្រ តែចិត្តធំ និងមានមនុស្សធម៌ នាំឲ្យសម្តេចសម្រេចអនុញ្ញាតឲ្យនាវា Westerndam ចូលចតនៅឯកំពុងផែខេត្តព្រះសីហនុ របស់កម្ពុជា នៅថ្ងៃព្រហស្បត្តិ៍ ទី ១៣ កុម្ភៈ ដោយសកម្មភាពមនុស្សធម៌នេះ បានជួយជីវិតអ្នកទេសចរណ៍ចម្រុះជាតិសាសន៍ជាង ១ពាន់នាក់ អាចមានឱកាសត្រឡប់ទៅប្រទេសកំណើតជួបជុំសាច់ញាតិវិញ ខណៈសកម្មភាពមនុស្សធម៌នេះដែរ បានធ្វើឲ្យពិភពលោក ស្ងើចសរសើរកម្ពុជា ជាប្រទេសមានគុណធម៌ និងមនុស្សធម៌ ដូចអ្វីដែលសម្តេចតេជោ ហ៊ុន សែន ចម្រេចចិត្តធ្វើដំណើរទៅកាន់រដ្ឋធានីប៉េកាំង កាលពីថ្ងៃ ៥ កុម្ភៈ ដូច្នោះដែរ។
– លទ្ធផលវិជ្ជមានកម្ពុជាមិនធ្លាប់រំពឹងទុក
ក្រឡេកទៅមើលដំណើរទស្សនកិច្ចរបស់សម្តេចនាយករដ្ឋមន្ត្រី ហ៊ុន សែន ទៅកាន់ប្រទេសចិន ឯណោះវិញ ជាលទ្ធផលមិនត្រឹមតែអាចពង្រឹងមិត្តភាព សាមគ្គីភាព និងស្មារតីនៃរដ្ឋាភិបាលប្រទេសទាំងពីរប៉ុណ្ណោះទេ វាក៏សបញ្ជាក់ច្បាស់ ពីការបង្រួបបង្រួមមិត្តភាព សាមគ្គីភាព ដ៏អស្ចារ្យក្នុងប្រវត្តិសាស្ត្រនៃប្រជាជនប្រទេសទាំងពីរ ហើយជាការឆ្លើយតបនូវទឹកចិត្តស្មោះត្រង់ក្នុងនាមជាមិត្តរបស់កម្ពុជា រដ្ឋាភិបាល ក៏ដូចជាពលរដ្ឋចិន ក៏បានសន្យាជួយកម្ពុជា ឆ្លងកាត់កាលៈទេសៈដ៏លំបាកនៃការរាតត្បាតវីរុសកូវីដ ១៩ ដូចគ្នា ដោយពលរដ្ឋចិន បានប្រកាសចាត់ទុក សម្តេចតេជោ ហ៊ុន សែន គឺជាវិរបុរសថែមទៀតផង។
ជាក់ស្តែង ក្រោយប្រទេសចិន អាចគ្រប់គ្រងស្ថានការណ៍ពីការរាតត្បារតវីរុសកូវីស ១៩ ជោគជ័យស្ទើរទាំងស្រុងហើយនោះ ចិន ក៏មិនបានភ្លេចការសន្យារបស់ខ្លួនសម្រាប់ទឹកចិត្តកម្ពុជានោះដែរ ដោយជំនួយបរិក្ខាវេជ្ជសាស្ដ្រជាបន្តបន្ទាប់ត្រូវគេបញ្ជូនមកកម្ពុជា ដើម្បីជួយកម្ពុជាទប់ស្តាត់វីរុសកូវីដ ១៩ ប្រកបដោយប្រសិទ្ធភាពខ្ពស់។
– ការឆ្លើយតបរបស់រដ្ឋាភិបាល និងពលរដ្ឋចិន
យើងកត់សម្គាល់ឃើញទៀតថា អំឡុងពេលប្រទេសចិន ហាក់ធូរស្រាលបន្តិចពីការរាតត្បាតក្នុងប្រទេស ការផ្ទុះរាតត្បាតជុំវិញពិភពលោក ក៏លេចរួបរាង គួរឲ្យតក់ស្លុត ហើយខណៈពេលនោះដែរ កម្ពុជា គឺជាប្រទេសដំបូងគេបង្អស់លើពិភពលោក ដែលរដ្ឋាភិបាលចិន បញ្ជូនក្រុមគ្រូពេទ្យជំនាញ មកជួយប្រឹក្សា និងផ្តល់យុទ្ធសាស្ត្រដើម្បីទប់ស្កាត់វីរុសកូវីដ ១៩ ដោយថែមទាំងពាំនាំនូវពាក្យស្លោក “ស្រលាញ់គ្នាក្នុងគ្រាក្រ ស្គាល់មិត្តល្អក្នុងគ្រាលំបាក” ដោយពាក្យស្លោកនេះ គឺបង្ហាញច្បាស់ពីឆន្ទៈរបស់ចិន ជួយកម្ពុជាប្រយុទ្ធប្រឆាំងជំងឺកូវីដ ១៩ ប្រកបដោយជោគជ័យ។ ជាមួយគ្នានេះ រដ្ឋាភិបាលចិន ប្រកាសម្តងហើយម្តងទៀត នឹងបន្តផ្តល់ជំនួយមកកម្ពុជា ដើម្បីធានាថា កម្ពុជា នឹងជោគជ័យទាំងស្រុងដើម្បីប្រយុទ្ធប្រឆាំងជំងឺកូវីដ ១៩។
ក្រៅពីការការជួយជ្រោមជ្រែងពីរដ្ឋាភិបាលចិន ពលរដ្ឋចិនជាច្រើនរយលាននាក់ ក៏បានសន្យាជួយកម្ពុជាដូចគ្នា ក្នុងនោះជំនួយពីពលរដ្ឋ ក៏បានមកដល់កម្ពុជាជាបន្តបន្ទាប់ ហើយពួកគេថែមទាំងសន្យា នៅពេលស្ថានការណ៍រាតត្បាតវីរុសកូវីដ ១៩ បញ្ចប់ទៅ ពលរដ្ឋចិន នឹងជួយស្តារសេដ្ឋកិច្ចកម្ពុជាឡើងវិញ តាមរយៈសម្តីដែលថា ពលរដ្ឋចិនទូទាំងប្រទេស បានជំពាក់សំបុត្រចូលទស្សនាប្រាសាទអង្គរវត្ត របស់កម្ពុជាម្នាក់មួយសន្លឹក។
ការលើកឡើងរបស់ពលរដ្ឋចិន មានន័យថា ក្រោយស្ថានភាពជំងឺកូវីដ ១៩ បញ្ចប់ជាស្ថាពរ ពលរដ្ឋចិនច្រើនលាននាក់ នឹងធ្វើដំណើរទេសចរមកកម្ពុជា ដែលវានឹងជួយឲ្យវិស័យទេសចរកម្ពុជា ទទួលបានប្រយោជន៍យ៉ាងច្រើនមហាសាលពីភ្ញៀវទេសចរជនជាតិចិន ជួយពង្រឹងដល់គ្រប់វិស័យសេដ្ឋកិច្ចសំខាន់ៗ ទាំងម៉ាក្រូ និងមីក្រូសេដ្ឋកិច្ច ក៏ជាជំរុញអត្រាការងារសម្រាប់ពលរដ្ឋខ្មែររស់ឡើងវិញថែមទៀតផង៕ ដោយ៖ សន សុភា
