Sign In 
បណ្ដាប្រទេសជាច្រើន នៅក្នុងតំបន់អាស៊ីអាគ្នេយ៍ បានលុបចោលនូវសង្រ្កាន្ដចូលឆ្នាំថ្មីប្រពៃណីជាតិរបស់ខ្លួន រួមមានកម្ពុជា ថៃ និងមីយ៉ាន់ម៉ា…ជាដើម ដើម្បីជាវិធានការទប់ស្កាត់នូវការឆ្លងរីករាលដាល នៃវីរុសកូវីដ១៩ ហើយមកដល់ពេលនេះដែរ បូលិសទីក្រុងប៉ាទីយ៉ា បានចេញល្បាត ដើម្បីអនុវត្ដច្បាប់នេះឲ្យមានប្រសិទ្ធភាព។
បើតាមប្រតិទិន នៃបណ្ដាប្រទេសកាន់ព្រះពុទ្ធសាសនា នៅតំបន់អាស៊ាន រួមមាន កម្ពុជា ថៃ មីយ៉ាន់ម៉ា និងឡាវជាដើម បានកំណត់យកពិធីសង្រ្កាន្ដចូលឆ្នាំថ្មី នៅចន្លោះពីថ្ងៃទី១៣ដល់ទី១៦ ខែមេសា ជារៀងរាល់ឆ្នាំ។ ប៉ុន្ដែដោយសារនៅឆ្នាំនេះ វីរុសកូវីដ១៩កំពុងរាតត្បាតខ្លាំងពេក ទើបបណ្ដាប្រទេសទាំងនោះ បានលុបចោលនូវសង្រ្កាន្ដចូលឆ្នាំថ្មី។
ដើម្បីជាវិធានការដ៏ម៉ឺងម៉ាត់នោះ ប៉ូលិសថៃបានចេញល្បាត និងអំពាវនាដល់អ្នកស្រុកកុំឲ្យចេញក្រៅផ្ទះ ប្រមូលផ្ដុំគ្នាធ្វើសង្រ្កាន្ដ។ ប៉ូលិសថៃបានចេញល្បាតទប់ស្កាត់ កុំឲ្យពលរដ្ឋលេងជះទឹកនេះ ចាប់ពីថ្ងៃទី១០-១៩ ខែមេសា ព្រោះនេះជាវិធានការល្អ សម្រាប់ទប់ទល់នឹងការឆ្លងវីរុសកូវីដ១៩។
រដ្ឋាភិបាលថៃបានលុបចោលសង្រ្កាន្ដឆ្នាំថ្មី ហើយចេញបទបញ្ជាថា ឆ្នាំថ្មីនេះ នឹងមិនត្រូវបានរៀបចំ នាពេលនេះឡើយ។ ប៉ុន្ដែរដ្ឋាភិបាល អាចនឹងលើកពេល រហូតដល់ខែកក្កដា នៅពេលវីរុសនេះរលាយបាត់អស់។
មន្រ្ដីជំនាញ បានបញ្ជាក់ថា ការប្រារព្ធពិធីសង្រ្កាន្ដនេះ គឺជាឱកាស នៃការនាំឲ្យមានការចម្លងវីរុសដ៏កាចសាហាវនេះ ព្រោះនៅក្នុងពិធីនោះមានមនុស្សចូលរួមច្រើន។ ដូច្នេះវានឹងនាំឲ្យមានការចម្លងកាន់តែខ្លាំងឡើង ពីមនុស្សម្នាក់ទៅកាន់មនុស្សច្រើនគ្នា។
ក្រៅពីនេះ អាជ្ញាធរថៃ ក៏បានហាមប្រាមដល់ការលក់ស្រា ហើយដាក់ទោសទណ្ឌដល់អ្នកផឹកថែមទៀតផង។ អ្នកប្រមូលផ្ដុំគ្នាផឹកស៊ី ទោះជាទោះជាមានគ្នាច្រើន ឬតិចក៏អាចប្រឈមនឹងការពិន័យជាប្រាក់ជាង៣ពាន់ដុល្លារ ឬជាប់គុក រយៈពេល១ឆ្នាំថែមទៀតផង។ ដោយឡែកពិធីសាសនា ឬព្រឹត្ដិការណ៍ផ្សេងៗក៏ត្រូវបានហាមឃាត់ផងដែរ៕ ប្រែសម្រួលដោយ Nuon
