នៅមុននេះបន្តិច រដ្ឋមន្ត្រីក្រសួងមហាផ្ទៃតួកគី លោក Suleyman Soylu បានថ្លែងថា លោក​កំពុងលាលែងពីតំណែង បន្ទាប់ពីការបរាជ័យអនុវត្តបម្រាមគោចរ រយៈពេល៤៨ម៉ោង នៅក្នុងខេត្ត ចំនួន៣១របស់តួកគី ហើយដែលនាំឱ្យមានប្រតិកម្មប្រឆាំងយ៉ាង​​រហ័សទៅ​លើរដ្ឋាភិបាលទី​ក្រុងអង់ការ៉ា ។

មន្ត្រីផ្នែកទំនាក់ទំនងរបស់ប្រធានាធិបតីតួកគី​ បានអះអាងថា “ការលាលែងពីតំណែង​របស់រដ្ឋមន្ត្រី​ក្រសួងមហាផ្ទៃ មិនត្រូវបានទទួលយកឡើយ ហើយថាគាត់នឹងនៅតែបន្ត​បម្រើការងារដដែល​” ។

សេចក្តីថ្លែងការណ៍របស់ប្រធានាធិបតី Erdogan បានគូសបញ្ជាក់​អំពីគុណសម្បត្តិរបស់រដ្ឋមន្រ្តីក្រសួងមហាផ្ទៃតួកគីរូបនេះជាខ្លាំង ដោយសង្កត់ធ្ងន់ថា គាត់ (Suleyman Soylu)​ បានសាងគុណសម្បត្តិ និងទទួលបានការកោតសរសើរ​ជាខ្លាំងពីប្រទេសជាតិរបស់យើង ចំពោះការងារដែលទទួលបានជោគជ័យ នាពេលកន្លងមក” ។

លោក Erdogan បានថ្លែងថា “ការតស៊ូបានជោគជ័យ​បន្តបន្ទាប់មករបស់រដ្ឋមន្រ្តីរបស់យើង ដូចជា កាត់បន្ថយបានសមត្ថភាពរបស់អង្គការភេរវករ នៅក្នុងប្រទេស គឺមានចំណែក​នៃគុណសម្បត្តិយ៉ាងធំធេង ដូចគ្នាទៅនឹងការងារអនុវត្តបន្តបន្ទាប់​ផ្សេងទៀត ដោះស្រាយគ្រោះមហន្តរាយធម្មជាតិ, ការរញ្ជួយដី​ជាដើម រដ្ឋមន្ត្រីក្រសួងកិច្ចការ​ផ្ទៃក្នុងរបស់យើង បានអនុវត្តការសម្របសម្រួលក្នុងវិស័យទាំងនេះ​បានយ៉ាងរឹងមាំ” ។

លោក Soylu បានដាក់លិខិតលាឈប់ពីតំណែង បន្ទាប់ពីទទួលបានការរិះគន់យ៉ាងខ្លាំង​ចំពោះការអនុវត្តបម្រាមគោចររយៈពេល ៤៨ ម៉ោងនៅក្នុងប្រទេស ដើម្បីទប់ស្កាត់ការរីករាល​ដាលនៃ COVID-១៩ គឺក្រោយការប្រកាសអនុវត្តត្រឹមតែ ៣ ម៉ោងប៉ុណ្ណោះ ។ លោករដ្ឋមន្ត្រីមហាផ្ទៃ បានទទួលយកការទទួលខុសត្រូវទាំងស្រុង ចំពោះភាពវឹកវរ ដែលបណ្តាលមកពីក្រឹត្យភ្លាមៗមួយនេះ។

ក្រសួងមហាផ្ទៃតួកគីបានប្រកាសកាលពីល្ងាចថ្ងៃទី១០ ខែមេសា ឆ្នាំ២០២០ថា ដោយសារ​តែ​ការឆ្លងរាលដាលវីរុស COVID-19 តួកគីត្រូវហាមឃាត់ពលរដ្ឋរស់នៅក្នុងខេត្ត​​​​​ចំនួន ៣១ មិនឲ្យមានការចេញទៅក្រៅនៅអំឡុងពេលចុងសប្តាហ៍នោះឡើយ ។ 

ការប្រកាសនេះបណ្តាលឱ្យមានការរិះគន់យ៉ាងឆាប់រហ័ស ចំពោះរដ្ឋបាលរបស់លោក Erdogan នៅពេលដែលមនុស្សជាច្រើនបានប្រញាប់ប្រញាល់ទៅហាងលក់ទំនិញ​ដើម្បីទិញ​ទំនិញ​មកស្តុកទុក ដោយរំលោភលើគោលការណ៍ណែនាំ​របស់អង្គការសុខភាពពិភពលោក (WHO) ដែលស្នើឲ្យប្រជាជនរស់នៅឯកោ ឃ្លាតឆ្ងាយពីសង្គម ។ ការអនុវត្តបម្រាមគោចរនោះ មានសេចក្តីរាយការណ៍ថា បង្កឱ្យមានអំពើហិង្សានៅក្នុងតំបន់មួយចំនួនកើតឡើងផងដែរ ។

បច្ចុប្បន្ននេះ ករណីឆ្លងវីរុស COVID-19 នៅក្នុងប្រទេសតួកគី បានកើនឡើងដល់ ៥៦.០០០ នាក់ ក្នុងនោះបាត់បង់ជីវិតជាង ១.១០០ នាក់ ។ នេះបើយោងតាមទិន្នន័យរបស់​សាកល​វិទ្យាល័យ Johns Hopkins ៕ ប្រែសម្រួលដោយ៖ thach yat 

from： https://tnaot.com/km/m/detail/article/9130492