ក្លិបបាល់ទាត់សេះបង្កង់ Juventus កំពុងតែត្រៀមរៀបចំក្រុមឡើងវិញឱ្យបានមុនលីគចាប់ផ្តើមសារជាថ្មី បន្ទាប់ពីការប្រកួតទាំងអស់ត្រូវបានពន្យារពេល ដោយសារវីរ៉ុសកូរ៉ូណាអស់រយៈពេលជាងមួយខែកន្លងទៅ។

យោងតាមកាសែតអេស្ប៉ាញ Mundo Deportivo បានឱ្យដឹងថា ក្លិបម្ចាស់ជើងឯកសេះបង្កង់ខាងលើកំពុងតែចង់បានខ្សែបម្រើ Dani Ceballos ពី Real Madrid មកចូលរួមក្រុមនារដូវក្តៅខាងមុខ។

Ceballos ត្រូវបានក្លិបកាំភ្លើងធំ Arsenal ខ្ចីជើងមួយរដូវកាល ពី Madrid កាលពីទីផ្សារដោះដូរកីឡាកររដូវក្តៅមុន ហើយកុងត្រារបស់គេនឹងត្រូវអស់សុពលភាពក្រោយចប់រដូកាលនេះផងដែរ។

អ្នកចាត់ការទូទៅក្លិបកាំភ្លើងធំ លោក Mikel Arteta ហាក់មានបំណងចង់ទិញខ្សែបម្រើ Ceballos ផ្តាច់កុងត្រា ពី Madrid តែម្តងនៅរដូវក្តៅ បន្ទាប់ពីទម្រង់លេងរបស់ខ្សែបម្រើរូបនេះ មានការវិវដ្តល្អប្រសើរ ហើយថែមទាំងអាចជួយក្រុមបានច្រើនផងដែរ នៅតំបន់បម្រើ។

យ៉ាងណាមិញ លោក Sarri អ្នកចាត់ការទូទៅក្លិប Juventus កំពុងតែសម្លឹងឃើញពីទម្រង់លេងដ៏ល្អរបស់ខ្សែបម្រើម្នាក់នេះ ហើយលោកចង់ចុះហត្ថលេខាយកមកដើម្បីជួយពង្រឹងក្រុមបន្ថែមនៅរដូវក្តៅនេះ។

បើតាមប្រភពព័ត៌មានខាងលើបានឱ្យដឹងទៀតថា Juventus មានបំណងចង់ឱ្យថ្លៃនឿយហត់ដល់ Ceballos ចន្លោះពី ៥ទៅ៦លានអឺរ៉ូ ក្នុងមួយឆ្នាំ ខណៈពេលដែល Madrid បានដាក់តម្លៃខ្លួនផ្ទេរចំនួន ៤០លានអឺរ៉ូ នៅទីផ្សាររដូវក្តៅនេះផងដែរ ប្រសិនបើក្លិបណាចង់បានរូបគេ។

គួរឱ្យដឹងដែរថា ចាប់តាំងពីផ្ទេរទៅលេងឱ្យ Arsenal ក្នុងលក្ខខណ្ឌខ្ចីជើងជាងមួយរដូវកាលមកនេះ Ceballos បានប៉ះបាល់ឱ្យមិត្តរួមក្រុមបញ្ជប់ទីចំនួន ២លើក ក្រោយបង្ហាញខ្លួន ១៤ប្រកួត កន្លងទៅ៕

កែសម្រួលដោយ៖ ភារ៉ា

ប្រភព៖ Calciomercato

from： https://tnaot.com/km/m/detail/article/9127420