ជាលើកដំបូង​ក្នុងប្រវត្តិសាស្ត្រអាមេរិក ដែលគ្រោះមហន្តរាយធំមួយ ត្រូវបានប្រកាស​ព្រមគ្នានៅរដ្ឋ​ចំនួន​៥០ ទូទាំងប្រទេសអាមេរិក ។ វីរុស COVID-19 ចេះតែបន្ត​ឆក់យកជីវិត​ និងឆ្លងរាតត្បាត​លើពលរដ្ឋអាមេរិក ។ 

វីរុស COVID-19 នៅក្នុងទឹកដីអាមេរិក ឆ្លងលើមនុស្សសរុប ៥៣៣ ២៥៩ នាក់ ក្នុងនោះ បាត់បង់ជីវិត ២០ ៥៩៧នាក់ និង ៣១ ៩១៧នាក់​ជាសះស្បើយ ។ 

តាមការចេញផ្សាយ​របស់ប្រភព sputnik នៅថ្ងៃទី១២ ខែមេសា ឆ្នាំ២០២០ បញ្ជាក់ថា លោកប្រធានាធិបតីអាមេរិក ដូណាល់ ត្រាំ បានប្រកាស​អំពីគ្រោះមហន្តរាយដ៏ធំ​មួយ ​​នៅក្នុងរដ្ឋ Wyoming កាលពីថ្ងៃសៅរ៍ ។ មានន័យថា នៅពេលនេះ ការប្រកាស​នៅរដ្ឋទាំង​ឡាយ​ទូទាំងប្រទេស គឺប្រកាស​អំពីគ្រោះមហន្តរាយដ៏ធំនេះ​ដូចគ្នា​ ដោយសារតែវីរុស​រាតត្បាត COVID-19។​ លេខាធិការរងផ្នែកសារព័ត៌មានសេតវិមាន លោក Judd Deere បានថ្លែងថា នេះគឺជាលើកទីមួយ​នៅក្នុងប្រវត្តិសាស្ត្រ ។ 

បើតាមសេតវិមាន​បញ្ជាក់ថា ការប្រកាស​របស់រដ្ឋ Wyoming គឺស្រដៀងគ្នា​នឹងការប្រកាសនៅរដ្ឋអាមេរិកដទៃផ្សេងទៀត​ដែរ រដ្ឋាភិបាលសហព័ន្ធ​នឹងផ្តល់ថវិកា និងសេវាកម្ម​ ជំនួយសំខាន់ៗ​ដល់រដ្ឋាភិបាល​ក្នុង​តំបន់​ និងអង្គការមិនប្រាថ្នា​ស្វែងរកប្រយោជន៍​។ 

ការប្រកាសនេះ​បានធ្វើឡើង​បន្ទាប់ពីអភិបាលរដ្ឋ Wyoming បានស្នើជាផ្លូវការ​ ការប្រកាសអំពីគ្រោះមហន្តរាយនេះនៅរដ្ឋ Wyoming តាមលិខិតផ្លូវការផ្ញើជូន​ទៅលោកប្រធានាធិបតី ដូណាល់ ត្រាំ កាលពីថ្ងៃទី១០ ខែមេសា ។ 

លិខិតរបស់អភិបាលរដ្ឋ Wyoming បានសរសេរថា បើទោះបីនៅរដ្ឋមួយនេះ ស្ថានការ​មិនទាន់ធ្ងន់ធ្ងរក៏ពិតមែន ប៉ុន្តែ​ការប្រកាសនេះនឹងជួយយើង​ត្រៀមចល័ត​ធនធានទាំងអស់ ពេលដែលមានតម្រូវការ ។ ខ្ញុំកំពុងទន្ទឹងរង់ចាំការឆ្លើយតប​ពីរដ្ឋាភិបាល​សហព័ន្ធ ៕ ប្រែសម្រួលដោយ៖ thach yat 

from： https://tnaot.com/km/m/detail/article/9126331