Sign In 
នាយករដ្ឋមន្រ្ដីវៀតណាម បានយល់ព្រមលើកញ្ចប់ថវិកា ចំនួន២,៦ពាន់លានដុល្លារអាមេរិក សម្រាប់ជួយដល់អ្នកអត់ការងារធ្វើ និងក្រុមហ៊ុនសហគ្រាសនានា រងផលប៉ះពាល់ អំពីការឆ្លងរាលដាល នៃឆ្លងកូវីដ១៩ នៅទូទាំងប្រទេស។
បើយោងតាមសារព័ត៌មានវៀតណាម Vietnamplus បានផ្សាយថា លោក Nguyen Xuan Phuc នាយករដ្ឋមន្ត្រីវៀតណាម បានយល់ព្រមលើការអនុម័តកញ្ជាប់ថវិកា មានទឹកប្រាក់ ចំនួន៦២លានលានដុង (លុយវៀតណាម) ឬស្មើនឹង ២,៦៦ពាន់លានដុល្លារអាមេរិក សម្រាប់ជួយដល់អ្នករងផលប៉ះពាល់ពីការរាតត្បាត នៃវីរុសកូវីដ១៩ នៅទូទាំងប្រទេស។
ប្រភពព័ត៌មានដដែល បានបន្ដថា កញ្ចប់ថវិកាសន្ដិសុខសង្គមនេះ ក៏ជាផ្នែកមួយ នៃដំណោះស្រាយ សម្រាប់ជួយដល់ប្រជាជនវៀតណាម រងផលប៉ះពាល់ ពីការរីករាលដាល នៃវីរុសកូវីដ១៩។ កញ្ចប់ថវិកាសន្ដិសុខសង្គមនេះ ត្រូវបានចុះហត្ថលេខា ដោយលោកនាយករដ្ឋមន្រ្ដី។
ប្រភពព័ត៌មានដដែល បានបន្ដថា ស្ថិតក្រោមដំណោះស្រាយនេះ និយោជិតដែលឈប់ដោយឥតមានប្រាក់ឈ្នួល និងអ្នកដែលមានកិច្ចសន្យាការងារ ហើយត្រូវព្យួរការងារ យ៉ាងហោចណាស់ ក៏ទទួលបានប្រាក់ខែ៧៧ដុល្លារអាមេរិក ក្នុងមួយខែ។ រីឯបុគ្គលិកកម្មករក្រៅម៉ោង ដែលអត់ការងារធ្វើ ហើយមិនទទួលបានអត្ថប្រយោជន៍ពីការអត់ការងារធ្វើ នឹងទទួលប្រាក់ឧបត្ថម្ភពីរដ្ឋ ក្នុងមួយខែ១លានដុង ឬស្មើនឹង៤៣ដុល្លារ។
ក្រសួងផែនការ និងវិនិយោគវៀតណាម បានប្រមណថា មានកម្មករ២៥០.០០០នាក់ បាត់បង់ការងារ នៅត្រីមាសនេះ។ ប៉ុន្ដែក្នុងរយៈពេលប៉ុន្មានខែខាងមុខ អាចនឹងមានកម្មករ ប្រហែល១,៥លានទៅ២លាននាក់ ប្រឈមនឹងការអត់ការងារធ្វើ។
ជាមួយគ្នានេះដែរ ក្រសួងការងារវៀតណាម បានព្រមានថា ប្រសិនបើស្ថានភាពរាតត្បាត នៃវីរុសដ៏កាចសាហាវនេះ នៅតែបន្ដទៅមុខនេះ បុគ្គលិក និងកម្មករយ៉ាងហោចណាស់ ក៏៤០០ពាន់នាក់ អត់ការងារធ្វើ។ ស្ថិតក្នុងស្ថានភាពបែបនេះ អាចនឹងមានពលរដ្ឋប្រហែល៣លាន នឹងត្រូវបញ្ឈប់ ឬផ្អាកការងារ។
បើគិតត្រឹមថ្ងៃទី១១ ខែមេសា នៅក្នុងប្រទេសវៀតណាម មានអ្នកឆ្លងកូវីដ១៩ កើនឡើងដល់២៥៧នាក់ ក្នុងនោះជាសះស្បើយ១៤៤នាក់៕ ប្រែសម្រួលដោយ Nuon
