សហរដ្ឋអាមេរិក​ បានធ្វើទំនើបកម្មដោយសម្ងាត់​នូវអាវុធនុយក្លេអ៊ែរ​ ​ដែលបានរក្សាទុក​ក្នុងមូលដ្ឋានជើងអាកាស Buchel ប្រទេសអាល្លឺម៉ង់ កាលពីឆ្នាំ​២០១៩ ​។ នេះបើយោងតាមប្រភព​ Spiegel ចេញផ្សាយ ហើយត្រូវបានប្រភព Sputnik ដកស្រង់យកមកចុះផ្សាយបន្ត នៅថ្ងៃទី១១ ខែមេសា ឆ្នាំ២០២០។ 

ប្រភពព័ត៌មានដដែល​ បានបន្តថា នៅចុងខែសីហា ឆ្នាំ២០១៩ កងកម្លាំងជើងអាកាស​អាមេរិក​បាន​ហោះ​ដឹក​អាវុធនុយក្លេអ៊ែរ​ B-61 ប្រហែល​២០​គ្រាប់ ​​តាមជើងហោះហើរ​ដឹកជញ្ជូនយោធា C-17 ‘Globemaster’​ពីបន្ទាយជើងអាកាស Buchel ស្ថិតក្នុងរដ្ឋ Rhineland-Palatinate ប្រទេសអាល្លឺម៉ង់ ​ទៅកាន់​សហរដ្ឋអាមេរិក ​​​រយៈពេល​ពីរថ្ងៃ ​ដើម្បី​ដំឡើង​​​ផ្នែកទន់ (software)។ 

យន្តហោះដែលដឹកអាវុធ​នុយក្លេអ៊ែរ​ នាពេលនោះ​ គឺជាយន្តហោះរបស់អង្គភាព​ Airlift Wing ទី​៦២ មូលដ្ឋាន​នៅទីក្រុង Tacoma រដ្ឋវ៉ាស៊ីនតោន ដែលជាកងវរសេនាតូច​អាមេរិកតែមួយគត់​ អនុញ្ញាតឲ្យដឹកជញ្ជូនអាវុធ​នុយក្លេអ៊ែរ​ ហើយនិងសារធាតុ​របស់វា។ ជាមួយគ្នានេះដែរ រដ្ឋាភិបាលអាមេរិក​ក៏បានជូនដំណឹង​ដល់អាល្លឺម៉ង់​ភ្លាមៗ មុនពេលការធ្វើទំនើប​កម្ម​អាវុធ​នុយក្លេអ៊ែរ​ ចាប់ផ្តើម​។ ​

អាវុធនុយក្លេអ៊ែរដែលរក្សាទុក​ នៅក្នុងបន្ទាយជើងអាកាស Buchel នោះ ​ត្រូវបានចាត់ទុកថា ជាផ្នែកមួយ​ ​នៃការរៀបចំ ដើម្បីចែករំលែក​នូវអាវុធ​នុយក្លេអ៊ែរ ។ ប៉ុន្តែ​ទោះជាយ៉ាងណាក៏ដោយ ការរក្សាទុក​អាវុធនុយក្លេអ៊ែរ​ទាំងនោះ ​មិន​មានការបញ្ជាក់ផ្លូវការ​​ពីភាគី​អាល្លឺម៉ង់ ឬសហរដ្ឋអាមេរិក​នោះឡើយ ហើយទីតាំង​រក្សាទុកនោះទៀតសោត ក៏ស្ថិតក្នុង​កិច្ចការសម្ងាត់​​រហូតដែរ។ 

បើយោងតាមទីភ្នាក់ងារព័ត៌មាន DW បានផ្សាយថា ការរៀបចំចែករំលែក​នុយក្លេអ៊ែរ​​ គឺអនុញ្ញាតឲ្យរដ្ឋសមាជិក​អង្គការណាតូ ដែលមិនមានអាវុធនុយក្លេអ៊ែរ​ អាចចូលរួម​ក្នុងផែនការ និងបណ្តុះបណ្តាល​ ដើម្បី​ប្រើប្រាស់អាវុធនុយក្លេអ៊ែរ​នោះបានដែរ ។ 

គួរបញ្ជាក់ថា បើតាមប្រភព Wikipedia បានផ្សាយថា សហរដ្ឋអាមេរិក​បាន​ផ្តល់អាវុធ​នុយក្លេអ៊ែរ B-61 យុទ្ធសាស្ត្រ​ ប្រហែល​៦០គ្រាប់​​ទៅឲ្យអាល្លឺម៉ង់​ប្រើប្រាស់ ស្ថិតក្រោម​កិច្ចព្រមព្រៀង​ចែករំលែក​អាវុធនុយក្លេអ៊ែរ​របស់អង្គការណាតូ ៕ ប្រែសម្រួលដោយ៖ thach yat

from： https://tnaot.com/km/m/detail/article/9123308