ប្រភពព័ត៌មានជិតស្និទ្ធនឹងរាជវង្សានុវង្សអារ៉ាប៊ីសាអូ៊ឌីត​​ បានឲ្យដឹងថា​ មានសែរាជវង្ស​ ចំនួន១៥០អង្គ​ បានឆ្លងកូវីដ-១៩ ។ បើតាមសារព័ត៌មាន​ The Times ​បានផ្សាយ នៅថ្ងៃទី​១០ ខែមេសា ថា ​សមាជិក​រាជវង្សានុវង្សជាច្រើនអង្គ មានឆ្លងកូវីដ-១៩​ ហើយត្រូវនៅឲ្យឆ្ងាយពីព្រះរាជវាំង។

ស្របពេលកូវីដ-១៩​​ កំពុងវាយលុកទៅលើរាជវង្សានុវង្សផងនោះ  ព្រះមហាក្សត្រ Salman និងរាជទាយាទ​ Mohammed bin Salman ក៏ត្រូវបានកាត់ផ្តាច់ ​ដើម្បីព្យាបាលព្រះរោគ។ ប៉ុន្ដែរហូតមកដល់ពេលនេះ ព្រះមហាក្សត្រ  Salman ​កំពុងតែកាត់ផ្តាច់ពីរាជវង្សានុវង្ស ដោយគង់នៅក្បែរកោះមួយជិត​ Jeddah ​។ ចំណែក​រាជទាយាទ ក៏ត្រូវបានយាងទៅកាន់តំបន់ដាច់ស្រយាល នៅឆ្នេរសមុទ្រក្រហមផងដែរ​។

ជាមួយគ្នានេះ ក្រុមគ្រូពេទ្យនៅក្នុងមន្ទីរពេទ្យ​ King Faisal ​នៃទីក្រុងរីយ៉ាត ​កំពុងតែព្យាបាលឲ្យសមាជិករាជវង្សផ្សេងទៀត​ ហើយក៏បានត្រៀមគ្រែពេទ្យ ជាង​៥០០បន្ថែមទៀត ដើម្បីបង្ការខ្លាចមានអ្នកឆ្លងកើនឡើង​ផងដែរ។

រាជវង្សអារ៉ាប៊ី​សាអូ៊ឌីត មានរាជបុត្ររាប់ពាន់នាក់ ហើយ​ក្នុងចំណោមរាជបុត្រមួយចំនួន ក៏ធ្លាប់ចេញចូលទៅកាន់តំបន់អឺរ៉ុប ជាទីកន្លែងងាយឆ្លងកូវីដ-១៩បំផុត។

សារព័ត៌មាន​ New York Times  បានផ្សាយថា រាជបុត្រ Faisal bin Bandar bin Abdulaziz Al Saud​ អភិបាលរាជធានីរីយ៉ាត មានព្រះជន្ម​៧០វស្សា បានឆ្លងកូវីដ-១៩ កំពុងតែទទួលការព្យាបាលយ៉ាងពិសេស។ ​ទី​ក្រុង​ជាច្រើន ក្នុងនោះមានរាជធានីរីយ៉ាត ក៏បានដាក់ក្នុងគ្រាអាសន្ន​ រយៈពេល២៤លើ២៤ម៉ោង ។

នៅក្នុងរាជវង្សអារ៉ាប៊ីសាអូ៊ឌីត​ មានសមាជិកសរុបទាំងអស់ ប្រមាណ​១៥ពាន់អង្គ និងមានពលរដ្ឋ​ ៣៣លាននាក់។ នៅទូទាំងប្រទេស មានអ្នកឆ្លង សរុបកើនឡើងដល់ទៅ​ជាង ​៣២០០នាក់ និងស្លាប់​៤៤នាក់​៕ ប្រែ​សម្រួលដោយ៖ MEO

from： https://tnaot.com/km/m/detail/article/9119600