Sign In 
ភ្នំពេញ៖ គណៈកម្មការគ្រប់គ្រងពហុកីឡដ្ឋានជាតិអូរឡាំពិក បានប្រកាសបិទការចូលស្តាតអូរឡាំពិក ជាបណ្តោះអាសន្នសិន ដើម្បីចូលរួមទប់ស្កាត់ និងប្រយុទ្ធប្រឆាំង ការរីករាលដាលជំងឺកូវីដ១៩។ នេះបើតាមសេចក្តីជូនដំណឹង របស់គណៈកម្មការគ្រប់គ្រងពហុកីឡដ្ឋានជាតិអូរឡាំពិក ដែល Tnaot App បានឃើញនៅថ្ងៃនេះ។
ការសម្រេចចេញសេចក្តីជូនដំណឹងនេះ ធ្វើឡើងក្រោយទទួល ដំណឹងរបស់ក្រសួងអប់រំ យុវជន និងកីឡា កាលពីថ្ងៃទី៧ ខែមេសា ឆ្នាំ២០២០ ក្នុងកម្មវត្ថុសំណើរសុំផ្អាកការលេងកីឡា ឬការហាត់ប្រាណគ្រប់ប្រភេទ ដែលមានលក្ខណៈប្រមូលផ្តុំនៅតាមទីតាំងកីឡដ្ឋានសាធារណៈ និងឯកជន ផ្សេងៗជាបណ្តោះអាសន្ន។
បន្ទាប់ពីមានករណីផ្ទុះមេរោគវីរុសកូវីដ១៩ ល្បីពាសពេញសកលលោក និងមានការរីករាលដាលដល់ប្រទេសកម្ពុជាយើង គេសង្កេតឃើញថា នៅពហុកីឡដ្ឋានជាតិអូរឡាំពិក មានអ្នកហាត់ប្រាណ និងអ្នកទៅលេងកីឡា ហាក់ដូចជាមានការថយចុះច្រើន និងស្ទើរតែគ្មានអ្នកហាត់ប្រាណទៀតផង។
ការបាត់មុខអ្នកទៅហាត់ប្រាណ និងលេងកីឡាមួយរយៈនេះ អាចបណ្តាលមកពីអ្នកហាត់ប្រាណ និងអ្នកលេងកីឡាទាំងអស់នោះ គេស្តាប់តាមការណែនាំរបស់ក្រសួងសុខាភិបាល ដើម្បីចូលរួមការការពារ និងប្រយុទ្ធប្រឆាំងជំងឺរាតត្បាតកូវីដ១៩៕ ដោយ៖ ប៊ុនធឿន
