Sign In 
ភ្នំពេញ៖ ជាមួយស្ថានភាពជំងឺកូវីដ ១៩ ជុំវិញពិភពលោក កាន់តែធ្ងន់ធ្ងរឡើង កម្ពុជាដែលជាប្រទេសតូច និងក្រក្រី ទោះមិនទាន់មានការរាតត្បាតខ្លាំងក្តី ប៉ុន្តែក៏បានត្រៀមខ្លួនជាស្រេចដើម្បីទប់ស្កាត់ ក្នុងនោះរដ្ឋាភិបាល បានចេញសេចក្តីណែនាំជាច្រើន ពាក់ព័ន្ធនឹងការធ្វើអនាម័យ សម្រាប់ពលរដ្ឋទូទៅ ពិសេសបងប្អូនប្រកបរបរប្រឈម និងការចម្លងជំងឺកាចសាហាវនេះតែម្តង។
ជាក់ស្តែង របររត់តាក់ស៊ី ឬឡានឈ្នួលនៅកម្ពុជា ត្រូវគេមើលឃើញថា ប្រឈមខ្ពស់ជាមួយការឆ្លង និងចម្លងជំងឺកូវិដ ១៩ ខណៈបើក្រឡេកទៅកាន់បងប្អូនកំពុងតែប្រកបរបរនេះវិញ មានខ្លះយល់ច្បាស់ពី របៀបរក្សាអនាម័យ ខណៈខ្លះទៀត នៅតែមិនយល់ គួរធ្វើយ៉ាងណាឲ្យបានល្អ ដូចទៅនឹងការណែនាំរបស់ក្រសួងនៅឡើយ។ 
លោក មាន បូរី អាយុប្រមាណ ២០ឆ្នាំ ដែលជាអ្នកបើកបរតាក់ស៊ី ចេញពីទៅមករវាងទីក្រុងភ្នំពេញ និងខេត្តកណ្តាល បានឱ្យដឹងថា គាត់មិនទាន់បានដឹងពីគោលការណ៍ណែនាំពីរបៀបធ្វើអនាម័យរបស់ក្រសួងសុខាភិបាល នៅឡើយទេ ទាំងគោលការណ៍សម្រាប់ម្ចាស់រថយន្តតាក់ស៊ី ទាំងសម្រាប់អ្នកដំណើរ។
មាន បូរី បានបញ្ជាក់ដែរថា យ៉ាងណា ខ្ញុំគាំទ្រឲ្យមានការចេញសេចក្តីប្រកាសព័ត៌មាន ដើម្បីឲ្យមានការទប់ស្កាត់ និងការពារជំងឺកូវីដនេះទាំងអស់គ្នា។ មួយវិញទៀត បុរសវ័យ ២០ឆ្នាំរូបនេះ ក៏មិនគិតថា អាចប៉ះពាល់ធ្ងន់ធ្ងរនោះទេ ព្រោះលោកអះអាងដឹងព័ត៌មានខ្លះៗ ពីការធ្វើអនាម័យការពារវីរុសកូវីដ ១៩ ខណៈអ្នកធ្វើដំណើរម្នាក់ៗ សុទ្ធភ័យខ្លាចពីរឿងកូវីដ១៩ ពួកគេចេះការពារខ្លួន និងធ្វើអនាម័យយ៉ាងខ្ជាប់ខ្ជួន និងល្អប្រសើរថែមទៀត។ 
ក្រឡេកទៅស្តាប់សំដី បងស្រី ជា ផេង ដែលរត់តាក់ស៊ីជាមួយប្តី ឱ្យដឹងដែរថា តាំងពីដើមខែមីនាមក ម៉ូយធ្លាប់ជិះហូរហែរ បែរជាស្ងាត់ឈឹង ដោយសារភ័យខ្លាចជំងឺកូវីដ។
យ៉ាងណា បងស្រី អះអាង បានដឹងខ្លះៗពីគោលការណ៍ណែនាំរបស់ក្រសួង ពិសេសរឿងដាក់ម៉ូយជិះឲ្យមានគន្លាតពីគ្នា ងាយស្រួលមានខ្យល់ចេញចូល ក៏ដូចជាការលាងសម្អាតដៃដោយអាល់កុលជាដើម។
បើតាមការអះអាងពីបងប្រុស សេងហាក់ ឯណេះវិញ គឺបងប្រុសមានការប្រុងប្រយ័ត្នច្រើន ដោយមិនឲ្យម៉ូយជិះជិតៗគ្នា ណែនណាន់តាន់តាប់ដូចពីមុនទេ ដើម្បីការពារកុំឲ្យឆ្លងទៅវិញទៅមក។ បងប្រុស ក៏បានអះអាងពីការណែនាំនេះតៗគ្នា ហើយក៏ប្រាប់អ្នករត់តាក់ស៊ីផ្សេងទៀត ដូចគ្នានេះដែរ។
យោងតាមសេចក្តីណែនាំរបស់ក្រសួងសុខាភិបាល កាលពីពេលថ្មីៗ ដើម្បីទប់ស្កាត់ការចម្លងវីរុសកូវីដ១៩ ឲ្យកាន់តែមានប្រសិទ្ធថែមទៀត និងការចូលការពារការចម្លងវីរុសកូវីដ១៩ បានណែនាំដល់ម្ចាស់រថយន្ត និងអ្នកធ្វើដំណើរដោយមធ្យោបាយដឹកជញ្ជូន រួមមានរថយន្តក្រុង និង Mini Bus មិនឲ្យផ្ទុកអ្នកដំណើរច្រើនលើសពី ១០នាក់ នោះឡើយ និងតម្រូវឲ្យពាក់ម៉ាស់ រក្សាអនាម័យ លាងដៃនឹងសាប៊ូ ឬអទឹកអាល់កុលឲ្យបានត្រឹមត្រូវ៕ ដោយ៖ ឃួន លក្ខិណា
