Sign In 
អារ៉ាប៊ីសាអ៊ូឌីតប្រកាសឈប់បាញ់ និងផ្តល់ជំនួយវាល់លានដុល្លារ ក្រុមហ៊ូធីតបវិញ ដោយមីស៊ីលប៉ាលិស្ទិក
អនុរដ្ឋមន្រ្តីក្រសួងការពារជាតិអារ៉ាប៊ីសាអ៊ូឌីត លោក Khalid bin Salman al Saud បានថ្លែង កាលពីថ្ងៃទី៩ ខែមេសា ឆ្នាំ២០២០ថា ប្រទេសអារ៉ាប៊ីសាអ៊ូឌីត នឹងផ្តល់ជំនួយមនុស្សធម៌ ចំនួន៥០០លានដុល្លារ ដល់ប្រទេសយេមែន និង២៥លានដុល្លារបន្ថែមទៀត ដើម្បីប្រយុទ្ធប្រឆាំងនឹងការរីករាលដាល នៃវីរុស COVID-19 ។
កាលពីថ្ងៃទី៨ ខែមេសា ប្រព័ន្ធផ្សព្វផ្សាយអារ៉ាប៊ីសាអ៊ូឌីត បានផ្សាយថា កងកម្លាំងសម្ពន្ធមិត្តដឹកនាំដោយអារ៉ាប៊ីសាអ៊ូឌីត បានផ្អាកប្រតិបត្តិការ រយៈពេល២សប្តាហ៍ទៀត ។ សកម្មភាពនេះទទួលបានការស្វាគមន៍ពីប្រេសិតពិសេសរបស់អង្គការសហប្រជាជាតិ ទទួលបន្ទុកកិច្ចការ នៅប្រទេសយេមែន គឺលោក Martin Griffiths។
មន្ត្រីអារ៉ាប៊ីសាអ៊ូឌីត បានថ្លែងថា «ថ្ងៃនេះ យេមែនប្រហែលប្រឈមមុខនឹងគ្រោះមហន្តរាយកាន់តែធ្ងន់ធ្ងរថែមទៀត ដោយសារការឆ្លងរាតត្បាត នៃវីរុស COVID-19 ។ នេះជាមូលហេតុ ដែលអារ៉ាប៊ីសាអ៊ូឌីត ប្រកាសផ្តល់ជំនួយ៥០០លានដុល្លារ ជាជំនួយមនុស្សធម៌ដល់អង្គការសហប្រជាតិ សម្រាប់ប្រទេសយេមែន ក្នុងឆ្នាំ២០២០ និងជំនួយបន្ថែម២៥លានដុល្លារផ្សេងទៀត ដើម្បីប្រយុទ្ធប្រឆាំងនឹងវីរុស COVID-19»។
អនុរដ្ឋមន្ត្រីក្រសួងការពារជាតិអារ៉ាប៊ីសាអ៊ូឌីត បានបញ្ជាក់ថា កិច្ចព្រមព្រៀងឈប់បាញ់ រយៈពេល២សប្តាហ៍នេះ គឺដើម្បីសម្រួលស្ថានការណ៍កុំឲ្យតានតឹងខ្លាំងពេក ក្នុងជម្លោះនៅប្រទេសយេមែន ។ លោក Khalid bin Salman al Saud បានបន្តថា «ក្រុមហ៊ូធីត្រូវតែបង្ហាញឆន្ទៈល្អចុងក្រោយបំផុត ដោយគោរពខ្ជាប់ខ្ជួនតាមប្រេសិតពិសេសអង្គការសហប្រជាជាតិ លោក Martin Grifiths បញ្ចៀសកុំឲ្យប្រជាជនយេមែន រងទុក្ខសោក និងការពារប្រជាជនយេមែន ឲ្យគេចផុតពីការរាតត្បាត នៃជំងឺ COVID-19 ខណៈពិភពលោកមិនធ្លាប់ជួបប្រទះពីមុនមក»។ 
យេមែនបានជាប់គាំងនៅក្នុងសង្គ្រាមហែកហួរ រវាងរដ្ឋាភិបាលគាំទ្រដោយអង្គការសហប្រជាជាតិ ដឹកនាំដោយប្រធានាធិបតីនិរទេសខ្លួន លោក Abdrabuh Mansour Hadi និងជីវពលហ៊ូធីស៊ីអ៊ីដ ជាគូប្រជែងនយោបាយប្រឆាំងនោះ តាំងពីឆ្នាំ២០១៥រហូតមក ។ ភាគីពាក់ព័ន្ធ នៅក្នុងជម្លោះនេះ បានចុះហត្ថលេខាលើកិច្ចឈប់បាញ់ កាលពីចុងឆ្នាំ២០១៨ ប៉ុន្តែកិច្ចព្រមព្រៀងនោះអនុវត្ដបានបន្តិច ហើយក្រោយមកក៏បានប្រេះឆាគ្នាសាឡើងវិញ។
កាលពីចុងខែមីនា ឆ្នាំ២០២០ អគ្គលេខាធិការអង្គការសហប្រជាជាតិ លោក Antonio Guterres បានអំពាវនាវឲ្យមានកិច្ចឈប់បាញ់ នៅក្នុងជម្លោះទាំងអស់ ជុំវិញពិភពលោក ដោយផ្តោតការយកចិត្តទុកដាក់លើធាតុពិតជាក់ស្តែង គឺការ «ប្រយុទ្ធដើម្បីរស់រានមានជីវិត» ដោយប្រឆាំងជាមួយនឹងការឆ្លងរាតត្បាត នៃវីរុស COVID-19 ។ ភាគីជម្លោះក្នុងប្រទេសយេមែន សុទ្ធតែបានសម្តែងការសាទរ និងគាំទ្រគំនិតផ្តួចផ្តើមរបស់អគ្គលេខាធិការអង្គការសហប្រជាជាតិ ។ ប៉ុន្តែការបាញ់ប្រហារគ្នានៅតែមានដដែល ។ 
ទូរទស្សន៍រដ្ឋអារ៉ាប៊ីសាអ៊ូឌីត បានផ្សាយថា ក្រុមហ៊ូធីបានបាញ់មីស៊ីលប៉ាលិស្ទិកចូលទៅកាន់ទីតាំងភាគខាងជើង នៃទីក្រុង Ma’rib របស់យេមែន ដែលគ្រប់គ្រងដោយកងកម្លាំងគាំទ្រដោយរដ្ឋាភិបាលអារ៉ាប៊ីសាអ៊ូឌីត ។ ការវាយប្រហារនេះបានកើតឡើងប៉ុន្មានម៉ោងប៉ុណ្ណោះ បន្ទាប់ពីទីក្រុង Riyadh អំពាវនាវឲ្យមានបទឈប់បាញ់គ្នា ដើម្បីប្រយុទ្ធប្រឆាំងនឹងការរាតត្បាត នៃវីរុស COVID-19 នៅក្នុងប្រទេសយេមែន។ 
ការបាញ់ប្រហាររបស់ក្រុមហ៊ូធី បានកើតឡើង នៅព្រឹកព្រលឹមថ្ងៃទី៩ ខែមេសា ឆ្នាំ២០២០ ហើយគេនៅមិនទាន់ដឹងថា មានអ្នកស្លាប់ ឬរបួសប៉ុន្មាននាក់នៅឡើយដែរ៕ ប្រែសម្រួលដោយ៖ thach yat
